Цагъати Тотраз
ХÆЗНИДОНИ ТУГЪДОНТИ ЗАР
Сӕхоли донбӕл сау мегъи фӕлмӕ
Бонивайӕни ниллӕг бабадтӕй.
Дигори коми ӕхсинтти сӕрмӕ
Æнсарӕ гӕнгӕ зӕйӕ ракалдӕй.
Ӕрбацӕунцӕ цъаммар ӕзнӕгтӕ
Нæ арæнтӕбал адӕми цӕгъдгӕ.
Сирдти ӕрдонгтау сӕ сӕртӕ сӕтгӕ.
Ихалунмӕ нин нӕ царди фӕтгӕ.
Хӕзни фӕсевӕд ка нӕ никкӕна
Нӕ тохи зарӕг бӕсти сӕрбӕлтау.
Æзнагӕн ӕ тог цӕфӕй никкӕла
Тугъди будури Ирӕфи донау.
Хӕзни фӕсевӕд размӕ бурстонцӕ
Сӕ реуӕй хуӕцгӕ ӕзнаги нихмӕ.
Сӕ хауӕггӕгти размӕ сурдтонцӕ
Берлини уӕнгӕ бӕрзӕй сӕститӕй.
Нӕ сахъ фӕсевӕд дуйнемӕ уӕ ном,
Нӕ дзилли астӕу уӕ кадӕ нӕра.
Ка нӕ ракодта ӕ зарди кӕрон
Адӕми зӕрди ӕности цӕра.
ГÆБÆЙРАТИ САРӔБИЙ ÆМА КАКОЙ ФУРТТИ ЗАР
Арви тӕмӕни ӕрфӕни фӕдау
Ниррохс ӕй дуйне арӕни сӕрмӕ.
Ку инййазӕлдӕй ахӕри гъӕрау
Никкодта нæбӕл тог уарӕн сӕумӕ.
Æ усхъитӕбӕл ӕнамонд хабар
Дунгӕ бахӕссуй Дигори коммӕ.
Нæбал игъусуй гъӕубӕсти сӕ зар.
Адӕни ӕстур сау сугъди коймӕ.
Саги сиутӕбӕл ниййауиндзунцæ
Сӕ сау нимæттӕ сӕрдтон изӕри.
Нӕ тохи зарӕг ку низзарунцæ.
Гӕбӕйрати уӕд аст ӕнсувæри.
- Хуӕрзбон кӕнетӕ нӕ уорссӕр хуӕнхтӕ,
Нӕ фиди уӕзӕг, нӕ рӕсугъд кӕмттӕ,
Нæ рӕсугъд гъӕутӕ, нӕ цъете дӕнттӕ,
Нӕ кӕстӕр хуӕртӕ, нӕ царди 'мбӕлттӕ.
Сарӕбий ӕма Какой фурттӕ
Сӕ еу иннемӕй сӕрӕндӕр игурд
Ранӕхстӕр унцӕ тог уарӕн тугъдмӕ.
Сӕ исӕмбӕлдмӕ ӕзнагӕн ӕмгъуд.
Тугъди будури сӕ фӕтӕн реутӕй
Размӕ ӕмпурсгӕй ӕзнаги нихмӕ
Ниссӕ кӕнунцӕ сирдти хӕлеутӕ
И сау зӕнхбӕл уӕлгоммӕ хусгӕ.
Дзахо бадзоруй ӕ кӕстӕртӕмӕ:
- Ӕрмӕстдӕр размӕ Берлини уӕнгӕ,
Сирди бакӕнӕн ӕхе лӕгӕтмӕ
Ӕрлӕудтӕй цӕфӕй е 'хседгӕ зӕрдӕ.
Уӕ, Гӕбӕйрати мӕгур мадтӕлтӕ
Сау бон никкодта уӕ фӕсевӕдбӕл.
Дигори коммӕ сау гӕгъӕдитӕ,
Хӕссунцӕ хабар еу - инней фӕдбӕл.
Ӕ фӕстаг дзурдтӕ Рейхстаги рӕбун
Максим никкӕнуй авд хестӕремӕн.
Бӕсти сӕрбӕлтау уӕ фӕсте мӕлун.
Цъаммар ӕзнӕгтӕн сӕ фагӕ фӕдтӕн.
Адӕми астӕу уӕ зарӕг нæра
Нӕ Иристони ӕнӕ рамӕлгӕ.
Æности уӕ ном нӕ астӕу цӕра,
Нӕ бӕгъатӕрти нӕртон кадӕнгӕ.
ДЗОТТИ ЛАЗÆРИ ЗАР
Ӕрбацӕунцӕ арӕнтӕ сӕтгӕ
Хорнигулæнӕй сӕ сиутӕй хуӕцгӕ.
Немуци ‘фсӕдтӕ адӕми цӕгъдгӕ.
Ихалунцӕ нин нӕ царди фӕтгӕ.
Лазӕр бадзоруй нӕ фӕсевӕдмӕ:
«Ка не никкӕна нӕ тохи зарӕг.
Ка нӕ рацӕуа тогуарӕн тугъдмӕ
Уомӕн ӕ мардбӕл никкӕуӕг ма уӕд.
Багъӕуай кӕнӕн нӕ Фидибӕстӕ,
Фиддӕлти намус - кӕстӕрти кадӕ.
Нӕ уорссӕр хуӕнхтӕ - нæ рӕсугъд гъӕутӕ
Маддӕлти уойсат - нæ бӕсти фарнæ».
Мӕлӕтдзаг тохи е нӕ аурста,
Æзнӕгти цагъта - сирдти ӕрдонгтау.
Ӕмбӕлтти разӕй тохмӕ бампурста
Дигорон лӕхъуӕн хуӕнхаг цӕргӕсау.
Тугъди будури ӕ реуӕй хуӕстæй.
Цъаммар ӕзнӕгтӕй ӕ ихӕс райста.
Ӕ содзгӕ цӕфтӕй ӕ тог лӕдӕрсгӕй
Тоги ӕртӕхтӕй фӕдзӕхст ниффинста.
«Ка нӕ бафеда нӕ бӕсти размӕ,
Ӕ хӕстон ихӕс ӕзнӕгти тогӕй.
Тугъдон ӕмбӕлттæ! Ӕрмӕстдӕр размӕ!
Мӕлӕт хуӕздӕр ӕй тӕрсагӕ уодӕй.
Ка балӕудзæнӕй мӕ мади размӕ?
Ка ин зӕгъдзӕнӕй ме сӕвди хабар?
Тугъди будури ӕмбӕлтти размӕ
Ниууагътон мӕ ном — мӕ кадӕ, мӕ зар».
Дур-дуйраг лӕхъуӕн Дзотти Лазӕрӕн
Ка нӕ ракӕна ӕ тохи зарӕг.
Ӕносмӕ сӕ ном нӕ бӕгъатӕртӕн
Адӕми астӕу макӕд рамӕла.
ЗАЛДУЗИ ЗАР
(Адӕмон зарӕги вариантмӕ гӕсгӕ)
Секери билӕбӕл, гъей,
Ци муркъӕ низзадӕй, гъей,
Цӕун имæ гъӕуй, гъей, гъей,
Тонун ӕй гъӕуй, гъей.
Нӕртон Залдузбӕл, гъей,
Ци 'рфгутӕ низзадӕй, гъей,
Цӕун имӕ гъӕуй, гъей, гъей,
Корун ӕй гъӕуй, гъей.
Залдузи рӕсугъд, гъей,
Ӕ хъали бадуй, гъей,
Лæгмӕ на цӕуй, гъей, гъей,
Некӕмӕ комуй, гъей,
Ӕ коргутӕбӕл, гъей,
Фаутӕ ӕвӕруй, гъей,
Фиди тъӕрӕбӕл, гъей, гъей,
Уомӕн ку бадуй, гъей.
Кизгутти астӕу, гъей,
Рӕсугъд ку даруй, гъей,
Гъасти рӕнгъӕбӕл, гъей, гъей,
Хорӕй хуӕрзконддӕр, гъей.
Фӕндури хъурӕй, гъей,
Залдуз низзаруй, гъей.
Цӕмӕн мӕ гъӕуй, гъей, гъей
Хорӕй хуӕрзконддӕр, гъей.
Ири кизгуттӕ, гъей,
Балӕдӕретӕ, гъей,
Залдузи хузӕн гъей, гъей
Уосгорбӕл фаутӕ гъей,
Фӕндури хъурӕй гъей,
Ма ӕвӕретӕ гъей,
Уӕхебӕл фаутӕ гъей, гъей,
Исӕмбӕлдзӕнӕй гьей.
См.: Ирæф №2, 1991 анз.
