Ацæмæзи уадиндзæ
Нæ культурæ, нæ адæми историй Малити Геуæрги байзадæй цирагъдарæй. Мæгур хæдзари исгъомбæл æй, фал æ сабийбонтæй фæстæмæ æхе рохсмæ ивазта, æма æ устур искурдиадæ, æ агъазиау дæснийади фæрци исхизтæй поэзий бæрзæндтæмæ. Поэтæн æ фиццаг æмдзæвгитæй еуеми, «Цæхъал», зæгъгæ, уоми арви кизгæ мæйи балци уæларви æма æзнæт хуæнхаг дони æмбохун арф коми уотæ агайунцæ адæймаги зæрдæ, æма, ка сæ кастæй, уонæй алкæмæй дæр баруагæс æй, ке нæмæ фæззиндтæй æнæмбал романтик, æхе зундирахаст, æхе хуæдбундор поэтикон гъæлæсиуаги хæццæ.
Æма, æцæгæйдæр, поэт уæхæн бæрзонд æфцæгæй рафæлгæстæй ниййерæг зæнхæбæл, æма æхемæ дæр æма æ кæсгутæмæ дæр разиндтæнцæ рæстæги нæуæг арæнтæ æма исуйнаг доги арвгæрæнттæ.
Рæстадæн кувта нæ поэт рагæйдæр, адæмæн лæггадæ кæнун иссæй æ царди медес. Уой сæрбæлтау кодта рохситауæги куст дæр æма æнæнцойнæ фудæбонæ дæр поэтикон дзурди фарни сæрбæлтау. Берæ фæккуста Иристони скъолати. Сабийти ахури надбæл аразта, цæмæй лæгау лæгтæй райрæзонцæ, æма Фидибæстæн нивондæн æрхæссонцæ сæ ирисхъæ. Уомæн син ниффинста балций æхседгæ зар дæр. «Федог» дæр æй уомæн исхудта:
Рохсмæ, фæсевæд, тундзетæ,
Рохсмæ цæуетæ æнгом,
Нифс, лæгдзийнадæ уарзетæ,
Скæнтæ муггагмæ стур ном.
Арвмæ мæсуг амайетæ,
Хормæ скæнетæ фæндаг,
Гъæйт, зæрдиуагæй уайетæ,
Догъи ма уотæ фæстаг!
Тари цæфсæд сæребарæ,
Мегъи сорæд æ тунтæй,
Цард мабал уæд гъезæмарæ,
Зæнхæ райзол уæд рунтæй.
Зари игъусуй тохи азæлд, уæлахези зæлланг, революцион æзмæлди уолæнти ка ранигъулдæй, еци сахъигурди æхседгæ гъæлæс. Геуæрги иссæй Иристони зæнхкосгути революцион парти «Кермен»-и бундорæвæргутæй еу. Фæстæдæр е æ номæй бафинста зундгонд тел: «Петроград. Председателю Совнаркома тов. Ленину. Осетинская революционно-демократическая партия «Кермен» приветствует в Вашем лице рабочее и крестьянское правительство, осененное Красным Знаменем, знаменующим победу труда над капиталом. Знайте, что мы, сыны Осетии, жаждем осуществления лозунгов третьей революции. Председатель Малиев».
Нæуæг цард æма тох бахсистонцæ поэти исфæлдистадæ нифс æма хъаурæй, æ зартæ, æ сагъæстæбæл зиннуй рæстæги цаутæ æма хабæртти фæд, доги комиуолæфт, фæлтæри меддуйней фæд. Æстъæлфæнтæ нæ, царди вазуггин гулфæнтæ æма размæмпурст тæлфунцæ æ уадзимисти, кæд нивæбæл нæма адтæй нæуæг цардиуагæ, дзиллитæ ма гъезæмæрттæ æвзурстонцæ, уæддæр сæбæл хор ракастæй æма сæ уавæртæ бундзарæй раййевунмæ бæллунцæ æма тундзунцæ.
Поэт æ рагбонти финст миниатюритæй еуеми уотæ финста:
Волны Каспийские мне нашептали
Сказку страдания, сказку печали,
Душу наполнили шумом глухим,
Спели мне песню борьбы и свободы.
Поэти æмдзæвгити исеу æнцæ æрхун æма гъезæмари аргъау тох æма сæребари зари хæццæ. Æнгон бастæй си рауадæй уæхæн поэтикон цæндæ, æма ин æ лирики æнкъарæнти ирд цæхæр æма дзурди уагæн ниссагътонцæ уæлтæмæнади базуртæ, равардтонцæ ин цардгъон тухæ. Еу бакастæй – фæйнæхузон мотивтæ, фал сæ еудзийнадæ æй ахедгæ, гъомусгин. Кæрæдзей нихмæ нæ лæуунцæ, кæрæдземæй еуварс нæ ’нцæ. Айдагъдæр æвдесунцæ, цард вазуггин ке ’й, æ фæззиндтитæ ин еу барæнæй барæн ке нæййес, уæдта нихмæвæрд цаутæ æма æнкъарæнтæн æнæ уæн дæр ке нæ фæууй историон цæхгæр фæззелæнти рæстæг. Поэти меддуйней айдæни зиннунцæ æ поэзий менеугутæ.
Уони нæ зæрдæбæл ку нæ дарæн, уæд ин æ исфæлдистади гармоний фæд нæ иссердзинан. Уобæл ба гъæуама дузæрдуг ма кæнæн. Устур поэти уадзимисти алкæддæр тæлфуй рæстæг æма исфæлдистади æмуолæфтгæнæг тухæ.
Берæвæрсуг æй Малити Геуæргий поэзи, æ уадзимистæ амад æнцæ аллихузон жанрти домæнтæмæ гæсгæ. Ес имæ гъазæн дзурди уагæбæл финст зар, ес имæ мæгур лæги уодагайæг монолог, ес тохмæ разæнгардгæнæг марш дæр æма уæхæн лирикон хæзнатæ, цикорай фæрдуги хузæн ка æрттевуй. Мадта минкъий нæ ’нцæ, адæмон зарти æндæвдæй ка равзурдæй, уæхæн сагъæстæ дæр.
Дессаг е æй, æма сæ еугуребæл дæр ке ес, хуæрзаййев, хуæдбундор нивæфтуд, нæ адæмон дзурди тухæ, адæми зундирахаст æма дуйнелæдæрундзийнадæ ке исуй сæ бундор, цъухæй дзоргæ адæмон исфæлдистади хузгин хуарæнтæй ке исæрттевунцæ.
Малити Геуæргий поэзий игурæнтæ ’нцæ адæми цард, адæми цийнæ æма сагъæстæ, хуæнхбæсти æносон таурæхътæ, хуæнхæгтæ цæбæл æууæндунцæ, еци царциати дессæгтæ. Æ лирикон хъайтар, «Горские мотивы», зæгъгæ, еци киунуги кæунгъæлæсæй дæр фæдздзоруй, е ’лгъистаг ирисхъæй дæр нигъгъæрзуй, уотемæй архайуй адæймаг æма æрдзи рахастдзийнæдтæ балæдæрунбæл, адæймаг æма, æ алливарс цитæ цæуй, уони ’хсæн гармони иссерунбæл æхе хъаури, æма уомæй ервæзуй.
Æма ци агоруй аци æзмæнст дуйней? Агоруй Устур Рæстадæ. Царди мæнгæруагæсдзийнæдтæ æма къурцдзæвæнтæй фæййервæзунбæл архайуй. Æнцон нæй уодварни хæзнатæн ци гургъахъ над амонуй, уобæл цæун. Геуæргий лирикон хъайтар æй еци уодæвзарæнти исфæлдист.
Цикорай фæрдуги хузæн нæ поэзий цæхæр калунцæ Геуæргийæн е ’мдзæвгæ «Æлхуйнæ»-йи хузæн миниатюритæ – «Ци кæнуй, цума, ме ’лхуйнæ, ку нæбал зелуй дзæбæх? Мæ цæститæбæл уайунцæ сау нимæт æма сау бæх»… «Мæ фидбилизæн æ хæццæ цæмæн фæдтæн æз æнгаст?..» «Мæ зæрдæ мин басугътонцæ, ду ме ’вдесæн, уо, Хуцау!» Кæд уотæ адтæй, уæддæр куд фæстæмæ поэт хумæтæги нæ исæновуд æй поэтикон жанртæбæл.
Царди фæлтæрддзийнадæ, евгъуд дзамантæбæл æ рæстæг æма исонибонбæл сагъæстæ домдтонцæ таурæхътæ, кадæнгитæ, æцæг хабæртти парахат сюжеттæ, социалон конфликттæ æнхæстдæрæй кæми равдесун æнгъезуй, уæхæн агъазиау уадзимистæ. Æ фиццаг киунуги адтæй Нарти кадæнгитæбæл амад поэмæ «Симд Нартов». Нарти гуппурсартæ Хæмиц, Сослан, Урузмæг, сæ кæстæр Батрази сорæтбæл ке бафтудæй поэт, е ин фæййагъаз æй арфдæр балæдæрун адæмон уодигъæдæ, æ социалон æма эстетикон медес арфдæр балæдæрунæн.
Æма фæстæдæр поэт е ’ргом ку раздахта хуæнхбæсти цардиуаги цаутæ æма хабæрттæмæ, уæд ефтонг адтæй алцæмæй дæр – зундирахаст æма дæснийадæй. Фау æрхæссæн нæ адтæй æ хъайтарти социалон рахастдзийнæдтæмæ, сæ сорæттæмæ, къласон тохи игурæнтæ æма фæстеугутæ куд æвдиста, уомæ дæр.
Тухгин æй поэти кадæнгити романтикон рахаст – хъайтартæ фескъуæлхунцæ лæгæвзарæни, сæ уарзт æма сæмæ адæймаги ном æма кадæ бæрзонд æвæрд æнцæ, хæранæн нæ уодæнсунцæ ходуйнаги бæсти мæлæтбæл дæр арази фæуунцæ.
Темур-Алсахъ тухæгæнæг æлдарæй райста æ гъæубæсти маст, æлдар Дзанболати мæрдтæмæ барвиста, иссæребарæ ’й æ уарзон Дигиза, фал хъайтар æ хæццæ æ цард исбæттунмæ нæ исарази æй – тоггин дæн æма фенамонд уа, е мæ нæ фæндуй, зæгъгæ. Кизгæ дæр æнæ Темур-Алсахъæй æхецæн цард нæбал исаккаг кодта.
Эпикон характертæ, трагикон цаутæ æма сорæттæ зæрдæ æскъæфунцæ сæ уарзти туххæй, сæ кæдзос зæрдиуагæ æма рæсугъддзийнадæй, сæ цардбæллон æма æнæбасæттон хъаурæй. Социалон хецæндзийнæдтæй фенамонд æнцæ хъайтартæ. Уæхæн ирисхъи азар басугъта гъонгæси фурт мæгур Мæхæмæт æма æ уарзони дæр. Æлдар æ фиййау æ сиахс исуа, зæгъгæ, уой æ сæрмæ не ’рхаста, нæ ибæл байаурста. Уоййадæбæл фенамонд æй æ кизгæ дæр, æхемæ æ къох исиста. Уарзондзийнади романтикæ æма социалон трагеди уотæ æнгон æлваст æнцæ æма, кæд тог никкæллуй, кенæ ба хъайтартæ бацарæфтуд унцæ, уæддæр сæ рæсугъд меддуйней, æнæмбал зундиуагæ æма нифсæй сæ цард исуй кадæнги сæр.
* * *
Е ’мдзæвгæ «Памяти Коста», зæгъгæ, уоми Геуæрги зæрдтагон зæгъуйнæгтæй цитæ кæнуй æ цитгин ахургæнæгæн:
Умолк, – но стих его певучий
В сердцах людей еще звенит.
Зартæгæнæги æносон кадæй фæххайгин æй Геуæрги æхуæдæг дæр. «Геуæргий уадзимисти зиннуй е ’стур культурæ, æ ахургонддзийнадæ», – финста нæ номдзуд поэт Цæрукъати Александр. «Дигорон æвзагбæл ка финста æма ка финсуй, уонæй аййевади дæснийадæй поэзий медæгæ Малити Геуæргий уæнгæ неке ма исхъæрттæй. Поэтæн е ’взаг æй æхсист æма циргъ, æ ритмикæ фæндури зæлау, æ уадзимисти сюжети арæзт композицион æгъдауæй – хали къæбæлау», – финста нæ иннæ номдзуд поэт Хъазбегти Хъазбег.
* * *
Ескæд еу хатт райсуй Геуæрги æ къохмæ публицисти сес, æма æ гъудитæ фæуунцæ арф æма рæстдзæвийнæ. Æ уадзимис «К докладу Г. Цаголова «Об осетинском стихосложении» абони дæр ма цæсти ахедуй, нæ национ æмдзæвги тоникон стихамади фæдбæл ци раст хатдзæгтæ искодта, уомæй.
Ахид нæ дзорæн поэтики фарстатæбæл, æма еци ихæс æхемæ ка райса, е, æнæмæнгæ, арази уодзæнæй Геуæргийæй. Æ иннæ уадзимис «Письмо из Осетии» фæууй уæхæн нистауæнæй:
«Нужны просвещенные, общественные деятели, проникнутые святостью в призвание человека, нужны люди высокого закала, с пламенными духовными мечтами…
«Сейте разумное, доброе, вечное.
Сейте, – спасибо вам скажет сердечное, осетинский народ». Уæхæн адтæй поэти бæлдæ, æ исфæлдистади нисанеуæг, æ устур искурдиади игурæн æма ратæдзæн.
Уомæн ин табу кодтонцæ æ поэзийæн номдзуд исфæлдистадон архайгутæ Къосирати Сæрмæт, Гулути Андрей, Ардасенти Хадзибатæр æма берæ æндæр зундгонд æртасгутæ. Уомæн æй уарзта, уомæн æй æвардта дзурдаййевади бæрзонд тæрхæгбæл нæ номдзуд ахургонд Абайти Васо.
Малити Геуæрги æ рæстæги фагæ рæвдуд нæ баййафта литератури тæрхони лæгти ’рдигæй. Е нæ, фал ма берæ æнзти дæргъи æ исфæлдистадон бунтæй ма ци райервазтæй, етæ дæр лæудтæнцæ къумавæрдæй. Евгъуд æноси 30-аг æнзти нæ бæсти медæгæ фудмиутæгæнгутæ нæ адæми аккагæй-аккагдæр фуртбæл исæвардтонцæ адæми знаги илгъаг ном, æма ин æхе дæр бабун кодтонцæ, æ финститæ ба ин адæмæй фæххецæн кæнунбæл еци архайæги архайдтонцæ, фал син е ба нæ бантæстæй, уомæн æма дзиллæ сæ билицъæрттæ хуардтонцæ æ уадзимистæ зонунмæ. Æма дзилли бæлдæ Поэти исафгути фудвæндитæй тухгиндæр разиндтæй. Фудлæг æма фудбон берæ нæ хæссунцæ, фæззæгъунцæ, уомæ гæсгæ, гадзирахаттæй рацæугутæ цийфæнди кæд фæййархайдтонцæ, уæддæр Геуæргий поэзибæл къæмæ некæд рабадтæй, уæдта, æ рæстдзийнадæ ке исбæрæг æй, уомæ гæсгæ ба некæдбал рабаддзæнæй. Некæд феронх уодзæнæй устур поэти кæдзос æма нæргæ гъæлæс.
Малити Геуæргийæн хуæздæр лæварæн, хуæздæр хуарзæнхæн лæвæрд æрцудæй Нарти Ацæмæзи уадиндзæ, æма муггагмæ азæлдзæнæнцæ æ рæсугъд зæлтæ.
Мæрзойти Сергей (1927-2008), Цæгат Иристони адæмон финсæг
ПОЭЗИЙ СУГЪДÆГ САУÆДОНÆ
Малити Геуæргий исфæлдистадæ æй поэзий сугъдæг сауæдонæ. Нæ номдзуд курухон поэт æхуæдæг хуæнхаг сауæдонæй е ’мдзæвгæ «Дзирасгæ»-йи куд загъта:
Сур-сур кæнуй Дзирасгæ
Зæнхи бунæй рæсог.
Гъæйдæ, бæлццон, ниуазгæ,
Фетинг кæнæ дæ тог.
Æгас дуйне нисгарæ, –
Амæн æмбал нæййес.
Ниуазгæ, цæй, ме ’нгарæ,
Фесæфдзæнæй дæ нез…
Уоййау æ поэзи дæр игуруй зæрди арф уедæгтæй æма адæймагæн унгæг бони феронх кæнуй æ незтæ, æ катайтæ. Батавуй зæрдæ цидæр æнахур æхцæуæндзийнадæй. Геуæргий поэзий хæццæ еухатт ка базонгæ уа, уомæй некæдбал иронх кæнуй æ рамæлæти уæнгæ дæр. Абони хузæн нур дæр ма цæститæбæл рагъазуй, е ’сфæлдистади хæццæ фиццагидæр куд æма кутемæй базонгæ дæн, е. Уæд Устур Фидибæстон тугъд немуцаг фашистти нихмæ адтæй æ тæккæ карзи. Кæд æгудзæг, тухст дзаман адтæй, уæддæр махæн, Лескени скъолай ахурдзаутæн, нæ уæгæ нæ мардæй колхози саугустити дæр æма ахури дæр. Еууæхæни нин нæ ахургæнæг Сагети Рамазан фегъосун кодта, чиколайаг, Ирæфи райони газет «Социалистон Дигорæ»-йи косæг, æригон поэт Кертанти Тъæхирæй райстон цубур рæстæгмæ æмгъудæй Малити Геуæргий киунугæ «Ирæф» æма уин æй фæсуроктæ бакæсдзæн, зæгъгæ. Уой уæнгæ дæр ма цидæртæ фегъустан нæ хестæр фæлтæрти дзубандитæй Геуæргий алæмæттаг уадзимисти туххæй æма нин хъæбæр æхцæуæн адтæй еци хабар. Рамазан æй айдагъ литературон къуари иуæнгтæн бакæсунмæ гъавта, уæди рæстæги Геуæрги æхуæдæг дæр æма æ киунугæ дæр ахæст ке адтæнцæ, æнæ еу ести фудгинæй, уомæ гæсгæ. Фал уайтæккæдæр рахабар æй, æма устур къласи къох бакæнæн дæр нæбал адтæй, уой бæрцæ адæм æрæмбурд æй. Нæ зæрдæмæ уотæ хъæбæр фæццудæй, æма ’й къохæй рафинстан цалдæремæй. Уогæ, аци хабари туххæй ма Рамазан æхуæдæг дæр финста айразмæ. Еци киунугæ ма дуккаг хатт дæр нæ къохи бафтудæй уæди рæстæги ахурдзау æма нури зундгонд журналист Амилахуанти Хизири фæрци. Уæддæр бабæй æй къохæй рафинстонцæ беретæ. Цæй медæгæ ’й Геуæргий исфæлдистади еци æхемæ æлвасундзийнадæ, уобæл сагъæс кæнгæй, тæккæ фиццагидæр зæрдæбæл æрлæуунцæ номдзуд В.Г. Белинскийи гъудитæ поэзий туххæй. Кæддæриддæр е литературон уадзимиси ахсгиагдæр æма хуæздæр менеугутæй еуебæл, устур искурдиади бæрæггæнæнбæл нимадта æ хумæтæг, æнцон лæдæрундзийнадæ. Æнæмæнгæ, уæхæн искурдиадæй хайгин адтæй Геуæрги дæр. Цийфæнди уадзимис дæр ку райсæн поэти исфæлдистадæй, уæд ин фиццагидæр рахатæн æ хумæтæг æнцон лæдæрæн æма зæллангдзийнади муртæ. Дзурдтæ сауæдони цæхъалти сæр-сæрау, мæлгъи заруни хузæн, зæрбатуги цъæбар-цъубурау æгъзæлунцæ æма зæрдæ агайунцæ. Уæхæн адæмон поэти дæсниадæмæ бæлдтæй æхуæдæг дæр, æма æнæмæнгæ æ къохи бафтудæй еци ацъагъуæ. Æрхæсдзæнæн айдагъдæр еунæг цæветтон Геуæргийæн æхе æмдзæвгæ «Тæходуй, æна»-йæй.
Уæд еугур дуйне
Æримбурд уидæ,
Мæ цæгъдтæлтæмæ
Æригъосидæ.
Кæми ци седзæр,
Кæми ци мæгур, –
Бауарзиуонцæ
Мæ дессаг фæндур…
Нæ бон зæгъун æй, поэзи æма музыкæй адæмон исфæлдистади хуæздæр менеугутæ æма адæми рохс бæлдитæ Геуæргий исфæлдистади байеу æнцæ, зæгъгæ. Уой уæлæнхасæн ба ма æ уадзимисти устурдæр ахедундзийнадæ æй сæ арф гъудитæ, зæрдагайæн æнкъарæнтæ æма актуалондзийнади. Цардæй поэт иста æхсæнади сæйраг фарстатæ æма син аргъ кодта демократон цæстингаси бундорбæл æнцойнæ кæнгæй. Е ’сфæлдистади тæккæ зингæдæр бунат ахæссунцæ социалон уавæрти хæццæ æнгом баст фарстатæ. Еци менеуæгæй хайгин æнцæ е ’мдзæвгитæ, поэмитæ æма радзурдтæ сæ еугурдæр. Дзурдæн, райсæн æ фиццагдæр æмдзæвгитæй еу – «Цæхъал» (1907 анз). Уæлæнгай бакастæй бангъæлæн ес, цума æрдзи нивтæбæл финст æй, зæгъгæ. Лæмбунæгдæр æркæсгæй ба ами символикон æгъдауæй æвдист цæунцæ хуæнхаг фæллойнæгæнæг адæми унгæг, тухст уавæртæ æма сæребарæмæ бæллундзийнадæ. Поэт мæйи фæлорс рохс хонуй сæребари фæззинд, фал ма уæддæр фæллойнæгæнæг адæм Терки хузæн, унгæг коми ухери кæнгæй, сæ цæстисугтæ æгъзалунцæ:
Гъулæг неуй дæлбун коми,
Æхсæйвон цæхъал,
Цæвуй æхе æмир къуми
Дорин къæдзæхбæл…
Пурф кæнунцæ сæ фурмæстæй
Листæг тъинггитæ,
Цума хауй есге цæстæй
Ирд цæстисугтæ.
Геуæргий исфæлдистади бафеппайæн ес уæхæн хуарз менеуæг. Æрдзæ æма царди фæззиндтитæ ахид фæрсæй-фæрстæмæ æвдесуй аййев нивæфтудти. Еци поэтикон фæззелæни (параллелизм) фæрци адæми унгæг æма тухст цард хуæздæр багъаруй киунугæкæсæгмæ. Æрдзæ цæйбæрцæ рæсугъддæр æма сугъдæгдæр æй, уой бæрцæ бæлвурддæрæй зиннунцæ царди медæгæ галеудзийнæдтæ.
Геуæргий уадзевзитæ ’нцæ тæккæ «бунæй есгæ – сæрæй ахедгæ», адæмон æма адæмæн уарзон. Сæ уедæгтæй ниххизтæнцæ Дигори историй гъæздуг зæнхи, дигорон адæймаги зæрдихатти; уотæ зонгæ, хецон ин æнцæ, уотæ æнæ гурусхæй арази æй лæг сæ хæццæ, æма имæ хатгай, хебæраги сæ аргъаугæй, фæззиннуй уæхæн гъуди, цума куддæриддæр гъудæй, уотемæй хегъæдон цæттæ хæзнатæ кæцæйдæр райвулдæнцæ, рагулф кодтонцæ, уæдта син нæ уæн, кенæ æндæр хузи уæн дæр нæ адтæй. Фал Хуцау лæвар æма цæттæй неци дæттуй. Малити Геуæргийæн е ’стур искурдиадæ – тæрази еу фарсæй, æ еугур цард æма æ бийнонти гъезæмарæ ба иннердигæй æрæвæргæй, – æмуæзæ ’нцæ. Æ тæнæг фæрстæй ин æгъатир карнæ æнхæстæй исласта е ’стур лæгигъæдæ.
Сабайти Сулейман (1930-2014), профессор, поэт, публицист
ИМИСУЙНАГ АХУРГÆНÆГ
Советон догæ ку ралæудтæй, уæддæр Малити Геуæрги айдагъ æмдзæвгитæ нæ финста дигоронау æма уруссагау, фал кодта ахургæнæги куст дæр. Æ финститæ ин мухур кодтонцæ газет «Рæстдзинад»-и æма æндæр рауагъдæнтти. Уæди цардиуаги уавæртæ æ зæрдæмæ æнхæст нæ цудæнцæ, уомæ гæсгæ ба Дзинагъа æма Гулæри гъæути сабийтæн ци райдайæн скъола адтæй, уоми æрбундорон æй ахургæнæгæй.
Еци рæстæги, 20-аг æнзти æмбеси, æз дæр адтæн æ ахурдзаутæй еу. Æма мæ бон федарæй зæгъун æй: Малити Гадой фурт Геуæрги айдагъ дессаги искурдиадæгин поэт нæ адтæй, фал ма æцæг дæсни педагогон косæг дæр.
Æз ма хуарз гъуди кæнун зæронд, ка фæкъкъолæ ’й, еци къæс. Æмбурд гъæуæй æй цидæр мадзæлттæй барæвдзитæ кодтан. Гъæдин цæгиндзæбæл ауигъд адтæй æфсæйнаги гæппæл, кæций сæумæ еске ниххуайидæ æма еци гъæрмæ мах, бæгъæнвад биццеутæ æма кизгуттæ уадан уордæмæ, нæ къласмæ.
Адтæй си дууæ минкъий къæразги, бадтан, лигъзгонд дæр ка не ’рцудæй, уæхæн фæйнæгутæй конд даргъ стъоли рази къелатæбæл. Райдайиуонцæ ахури надбæл нæ фиццаг къахдзæфтæ. Геуæргий дессаги рæсугъд, æнцон лæдæрæн дзубандимæ игъосгæй нæ æригон уодтæ тæбар-тубур кодтонцæ, еу къахдзæф инней фæдбæл, уотемæй нæ худта зонундзийнæдти дуйнемæ.
Ахид нин дзурдта, æрæги ци цаутæ адтæй, уони туххæй. Бæгъатæр керменистти лæгдзийнади хабæрттæ. Нæ уолæфти æстуф дæр нæбал цæуидæ, уотемæй Къесати Колка, Цæголти Геуæрги æма иннæ æскъуæлхт керменистти хабæрттæмæ игъустан хæлеугъæлæстæй.
Геуæрги кæд фулдæр рæстæг лæвар куста куд ахургæнæг уотæ, уæддæр æ кусти рæстæг некæд фæццубур кодта. Мæнæ бабæй райгъустæй æфсæйнаги дæрæгъдзæгай, фæцæй фæстаг урок. Игъæлдзæг сабийти къуар сæ хъумацин баркъити хæццæ фæххæлеу æнцæ сæ хæдзæрттæмæ, цæмæй еу-дууæ, æртæ сахаттей фæсте бабæй нæуæгæй æрæмбурд уонцæ скъолай минкъий тургъи.
Еци фæсарæфтон сахæттæ тæккæ фулдæр уарзтан. Уалдзæги æма фæззæги цудан æрдзи гъæбесмæ: кæми Ирæфи билæмæ кенæ гъæди къохмæ, сæрди ба нæ над уидæ Хускъæ адаги гъæдæмæ лискъæфдзауæн. Еуæй-еу хатт нарæг къæдзæ-мæдзæ къахнадбæл исхезианæ Гулæрмæ, кæци лæудтæй кæрзкъæхæни билгæрон.
Ами дæр нæ уолæфт бауорамгæй, нæ сибиртт ма цæуа, зæгъгæ, игъустан нæ уарзон ахургæнæги хабæрттæмæ евгъуд рæстæгутæ æма царди фæдбæл. Фал нин фулдæр ба дзурдта нæ исонибони туххæй, цæхуæн дессаг хуарз уавæрти цæрдзæнæнцæ адæм хуæнхбæсти еу-инсæй анзей фæсте.
Гацолати Виктор (1916-1994), инæлар-лейтенант
