Гадати Лазæр
Идарди уогæй
Бафхуӕрунцӕ мӕ сӕ уӕлбекъон, усхъӕз дзурдӕй, сӕ гурумухъ зуст кастӕй, ме'нсувӕртӕ, ме'мгъӕуккӕгтӕ, мӕ ахил. Мӕ зӕрдӕ ниддор уй сӕ билӕскъелӕ кастӕй. Фӕззӕгъун: «Нӕбал мӕ гъӕуй райгурӕн бӕстӕ, цӕйбӕрцӕ си идарддӕр уон, уой бӕрцӕ ӕнӕзӕрдӕсастдӕр фӕуун, нӕбал раздӕхдзӕн се ‘хсӕнмӕ!»
Фӕсси тӕхун авд денгизей уордӕгмӕ, авд хонхей сӕрти, ӕнӕзонгӕ гъӕздуг бӕстӕмӕ, хъал царди ранигъулун, аргъауи галауанти мӕ цард; фӕлмӕн, кӕдзос хуссӕнти мӕ хуссӕн. Минкъий рӕстӕги фӕсте мӕ зӕрдӕ искатай уй. Ӕхсӕвӕ игон къӕразӕй ӕрбайгъусуй уаруни сӕх-сӕх, дони гъӕр, бӕласи
сифти сӕр-сӕр.
Мӕ уод фӕттӕхуй ӕцӕгӕлон зӕнхӕй мӕ мӕгур къӕсмӕ, Къулдуни гъӕумӕ, 'ма лӕмбунӕг фегъосун тута бӕласи сифти сӕр-сӕрмӕ хӕдзари рази, цъизи дони унӕрмӕ гъӕугӕронӕй. Мӕ хуссӕнуатӕй фестун, кӕд нӕ хӕдзари сӕри гъосин саст ес, аци сах уаруни ку ӕртӕдза, ма‘й бацалцӕг кӕнон. Къӕразӕй рауинун устур, гъӕздуг горӕти ӕнӕкӕрон, ирд рохситӕ, ма фӕстӕмӕ мӕ хуссӕни ӕруадзун мӕхе. Сӕуми уӕнгӕ хуссӕг фесӕфуй; нур кӕд Къулдуни гъӕуи дӕр уотӕ уаруй, уӕд куддитӕй нӕ мӕгур къӕс? Кӕд уи еске надбӕл бафӕстеуат ӕй ауӕхӕн ахӕри рӕстӕги, ме'нсувӕртӕ, мӕ гъӕуккӕгтӕ, мӕ ахил. Ме 'хсӕвӕ катаййӕй рарветун.
Кӕд уӕ уарун ӕрӕййафта, хуцау уӕ гъар хӕдзарӕбӕл ӕмбӕлун кӕнӕд, уæ къахи них дӕр куд некӕд исреса...
13.3.90 анз. Лондон.
Еу изæр
Раги цъизи донбӕл къада курӕнттӕ берӕ зилдӕй. Къулдуни гъæуæн æ еу кӕронӕй иннемӕ гъӕйт-мардзӕй сӕ уодӕй уод кодтонцӕ, инсадтонцӕ гъӕуи цӕргути инсуйнӕгтӕ. Къада курӕнттӕй ка кауӕй арӕзт адтӕй, ка ба - фӕйнӕгӕй. Сӕ сӕртӕ дӕр аллихузон ӕмбӕрзт, фал сӕ фулдӕр гъӕмпин сӕртӕ адтӕнцӕ. Алли къуар хӕдзаремӕн дӕр - еу куройнӕ. Сӕ тӕккӕ астӕу ба, фиййау фусти дзоги ӕхсӕн куд уа, уотӕ устур, гъосинӕй ӕмбӕрзт, къолхози куройнӕ. Фал е ӕнггӕтебӕл нӕ хъӕрттӕй, уӕдта къолхози цигъӕуӕгтӕ дӕр берӕ адтӕнцӕ, ма уони фагӕй фулдӕр нӕ кодта. Хонгӕ дӕр ӕй Дабани куройнӕ кодтан, куронгӕси номбӕл.
Махӕн дӕр, уӕллаг синхи цӕргутӕн, адтӕй нӕхе къада финддӕс хӕдзаремӕн. Дегъоти Куцук ба нӕ къуарӕн хестӕргонд адтӕй.
Еу нӕ ради бон нӕмӕ Куцук дӕгъӕлтӕ ӕрбалӕвардта «уӕ инсуйнӕгтӕ баинсетӕ». Тугъди фӕсте адтӕй е, ма нӕмӕ инсуйнаг дӕр цанӕбӕрӕг адтӕй, мӕгур цардӕнцӕ адӕн, ӕ дарӕг тугъди будури кӕмӕн байзадӕй, етӕ ба никки мӕгурдӕр. Нӕ фидӕ махӕн дӕр нӕбал исӕздагъдӕй, фал имӕ уӕддӕр ӕнгъӕл кастан, кӕди-майди ба разиннидӕ, ци нӕ фӕууй царди. Кӕрӕдзей сосӕггӕй мӕ мадӕ 'ма мӕ фиди мадӕ сӕ цӕсти сугӕй сӕхе фехснионцӕ мӕ фидӕбӕл. Еци бон, бон нӕ адтӕй, фал дууӕ изӕрей астӕу, Куцуки къохӕй мӕ мадӕ куройни дӕгъӕлтӕ райста ма мӕмӕ фӕдздзурдта: «Цӕуӕн, мӕ зӕрдтаг, мӕ хӕццӕ куройнӕмӕ, уӕртӕ къӕссай нартихуар никкӕндзйан, голлаги ба-мӕнӕуӕ, ци минкъий ма си ес уой, ма сӕ бадавӕн инсунмӕ». Мӕ уод, мӕ цӕстӕ, куройнӕмӕ цӕун мӕ мади хӕццӕ.
Ӕз къӕссай хъурбӕл хуӕстӕн, мӕ мадӕ ба гъӕдин къосæй ӕвгӕдта нартихуари ӕгъзалд. Пути бӕрцӕ си ӕнхӕст нӕма никкодта уӕдта мин уотӕ - фагӕ дин ӕй, нӕй бафӕраздзӕнӕ дони цормӕ, идард ӕй.»
«Нӕ, никкӕнӕ ма си, фӕйхӕсдзӕнӕн», - мӕхе фӕллӕг кодтон, 'ма ма си еу къуар къоси никкодтан. Цудайдӕ мӕбӕл уоци рӕстӕг ӕхсӕз анзи, цанӕбӕрӕг адтӕй мӕ хъаурӕ?
Ӕхе уаргъ дӕр фӕррӕвдзӕй ма фӕннӕхстӕр ан. Цалинмӕ ма гъӕунгти цудан, уӕдмӕ рӕуӕг ӕфсардтӕн, фал куддӕр гъæуæй фӕххецӕн ан, уотӕ ба мӕ къӕхтӕ фӕттасионцӕ, фал мӕхе нихъхъӕбӕр кодтон, ма тунзтӕн размӕ мӕ мади фӕсте. Рӕстӕгӕй-рӕстӕгмӕ мӕмӕ фӕстӕмӕ ракӕсидӕ «ци фӕдтӕ, мӕ зӕрдтаг, рауай», зӕгъгӕ, уӕдта ӕ цуди кой кодта. Гъӕугӕрон нӕбӕл фембалдӕй еу бӕрзонд, рацӕргӕ тӕнтъех силгоймаг сау дарӕси, ма дзубандибӕл исхуӕстӕй мӕ мади хӕццӕ:
- Æзина сӕ иской кодтан биццеуи дӕр ӕма и лӕги дӕр, мадта са кӕдмӕ ӕнӕгъдау уадзон», - дзурдта саударӕг уосӕ. Рохсаг уӕнтӕ, рохсаг, ци син кӕнӕн, айдагъ ду нӕ дӕ, берӕ ӕнамонд мӕгуртӕ ес.
- Ду ба циуавӕр гӕгъӕди райстай? - фӕрсуй саударӕг силгоймаг мӕ мади.
- Ӕнӕбӕрӕгӕй фесавдӕй, зæгъгӕ, си финст адтӕй, ма ма адӕймаг ӕнгъӕлдзау фӕууй, кӕди-майди ба... Ци нӕ фӕууй?! Хуцау дӕбӕл уӕхӕн хуарз бафедаун кӕнӕд, ке нӕ фӕндуй, е æй æ цӕститӕй фӕууинӕд, ӕвгъайуаг лӕг адтӕй, - дзоруй силгоймаг.
Мӕ къӕсса зӕнхӕбӕл ӕрӕвардтайнӕ, фал ӕй фӕстӕмӕ исесун ку нӕбал бафӕразон, уомӕй тарстӕн. Мӕстгун кодтон,
саударӕг уосӕ ӕгӕр берӕ ке дзоруй, уомӕ.
Уалинмӕ кӕрӕдземӕн хуӕрзизӕр загътонцӕ дууӕ уоси ма саударӕг уосӕ гъӕумӕ баевгъудӕй, мах ба фӕццӕуӕн куройни ӕрдӕмӕ.
- Ка ӕй еци уосӕ? - фӕрсун мӕстгунӕй мӕ мади.
- Е, мӕгур, Гуӕсӕнагъуæ æй, чиколайӕг уосӕ. Кизгӕй гъӕуггаг кизгӕ адтӕй. Ӕ лӕг дӕу фиди хӕццӕ хӕларӕй берӕ фӕццардӕй, ма, мӕгур, ӕ фурти хӕццӕ аци ӕнамонд тугъди байзадӕнцӕ. Нур син ӕрӕги искодта хист, се'гъдау.
Урдуги ниууадан, мӕ къӕхтӕ фӕттассионцӕ къӕссай уӕзӕй. Цума мӕ уаргъ уӕззауӕй-уӕззаудӕр кодта, уотӕ. Еу минкъий ма лигъзи бауадан ма бахъӕрдтан донгӕронмӕ. Бацудан ӕнӕдон къанауи сӕрти фӕйнӕг хедбӕл, ма мӕнӕ нӕ къада. Цалинмӕ куройнӕмӕ цудан, уӕдмӕ ӕрталингӕ'й. Арвбӕл еугай ӕстъалутӕ фӕззиндтӕнцӕ. Дони уӕлцъарӕ ӕрттивдтитӕ калдта. Къада нӕ зилдӕй, донауазӕн фӕйнӕг ӕнгон ӕвӕрд адтӕй мухцури сӕри. Ауазни листӕг цъӕстӕй дон лӕдӕрстӕй куройни бунмӕ, ма сабур цъис-цъис кодта. Æхсӕви тари куройни пернӕ уӕйуги дӕндӕгутау зиндтӕй. Къада еуварсмӕ никъкъолӕй, цума нуртӕккӕ донмӕ ниххаудзӕй, уотӕ.
Мӕ мадӕ байгон кодта дуар ма бацудӕй медӕгмӕ. Ӕз еунӕгӕй лӕудтӕн донгӕрон мӕ къӕссай рази. Куройни цъилингай рохс фӕззиндтӕй, мамӕ къӕсса мӕ фӕсте баластон ниллӕг дуарбӕл.
Куройни хурфи дууӕ фиди ма гуӕркъуӕрагӕ ӕдзамӕй лӕудтӕнцӕ. Цъилингай рохс ирдгӕмӕ фезмӕлидӕ. Қъуми мистити унӕр игъустӕй.
Мӕнӕ голлагӕбӕл фӕххуӕцӕ, мӕ зӕрдтаг, мах ӕй фӕлгури никкӕнӕн. Раздӕр бал нӕ мӕнӕуӕ райинсӕн; мах разӕй си мӕнӕуӕ инсадӕй», - дзоруй мӕмӕ мӕ мадӕ.
Нӕ уаргъ туххӕйти исистан асийнӕбӕл май никкодтан фӕлгури. Ӕз ӕдзинӕг кастӕн цъилингай рохси ӕзмӕлдмӕ. Куройни къумтӕ таси аууӕнттӕй идзаг адтӕнцӕ.
Дони ӕзмалд фӕффулдӕр ӕй, уӕдта, ӕвеппайди ниссӕххӕт кодта, ма куройни фидтӕ зуст зелӕ райдӕдтонцӕ, райгъустӕй гуӕркъуӕраги дӕгар-дугур дори уӕле, ма мӕнӕуи нӕмгутӕ дууӕ фидей ӕхсӕнмӕ сабургай хаун райдӕдтонцӕ. Уӕдта мӕ мадӕ ӕрбаздахтӕй донуадзунӕй ма инсади тӕгтӕмӕ ӕ къох бадардта. Къада гъӕйттӕй ӕ куст кӕнун райдӕдта, ӕмрезӕги ризтӕй егас бауӕр дӕр ма асийнӕбӕл бадгӕй мӕ гъос и зир-зирӕй дзиги кӕнун райдӕдта.
Мӕ мадӕ еунӕг минут дӕр ӕнцад нӕ бадтӕй: инсад урзæй рауинидӕ, ма уӕд нӕмгути хауд фӕффулдӕр кӕнидӕ, уæд æ фӕмминкъийдӕр кӕнидӕ. Кенӕ куройни зӕнхӕ фехсуд цъилинӕй сӕрфта.
Еу рӕстӕг басабур ӕй, фӕйнӕги кӕронбӕл ӕхе ӕруагъта ма сӕццӕ кӕсӕ кодта инсади тагӕмӕ, ӕ цӕститӕй ӕставд цӕстисугтӕ инсадмӕ ниххауиуонцӕ.
Нур бабӕй гъарӕнгӕ дӕр кодта, фал ӕй не 'гъустон куройни гъӕрӕй. Мӕ зӕрдӕ исхъурмӕй уомӕ кӕсгӕй, ма цалинмӕ нӕма никкудтӕн, уӕдмӕ сабургай фестадтӕн ма рацудтӕн куройнӕй.
- Дони ма ниххауӕ, биццеу, - ӕ кӕун уорамгӕй дзоруй мӕ мадӕ.
Донгӕрон зӕлдӕбӕл мӕхе ӕруагътон, ма сабургай хӕдони дусӕй мӕ цӕстисугтӕ сӕрфтон.
Арв ӕстъалуйӕй байдзаг ӕй, сӕ астӕу ба мӕйи ӕрдӕг ауигъдӕй лӕудтӕй, Сӕрдигон сабур ӕхсӕвӕ ӕ берӕ хӕзнатӕ зӕнхӕбӕл итудта, фал мӕнмӕ нӕ гъардтонцӕ. Мӕ мади тӕрегъӕдӕй мӕ зӕрдӕ тонгӕ кодта.
Еу рӕстаги фӕсте кӕунвӕлладӕй ниффунӕй дӕн. Устур лӕг мӕ рази февзурдӕй, сабургай мӕ бӕрзонд исиста æ къохти ма мӕ е усхъӕбӕл ӕрӕвардта. Уотӕ бӕрзонд адтӕн ма мӕйӕмӕ мӕ къохӕй исхъӕрдтайнӕ.
- Е дӕ фидӕ'й, дӕ фидӕ, - кӕцӕйдӕр мӕмӕ игъустӕй Даджджей дзурд.
Мӕ фур цийнӕй мӕ гъӕлӕси дзаг нигъгъӕр кодтон мӕ медфуни, ма мӕ гъӕрмӕ фегъал дӕн. Мӕ мадӕ тарстхузӕй рауадæй куройнӕй, фелваста мӕ зӕнхӕй ма мӕ ӕ хъури никкодта.
- Ма тӕрсӕ, - цӕстисугӕй уомӕл росбӕл мӕ цӕсгом нинцъулдтон ма уотемӕй фӕстӕмӕ куройнӕмӕ бацудан. Къада гъӕйттӕй зилдӕй, цума есгумӕ тагъд кодта, уоййау. Ӕхсӕвӕ е'мбеси адтӕй...
20.3.85. Мӕску.
Гекиййи мæлæт
Тебо ӕхуӕдӕг дӕр ӕнахъӕл адтӕй, ӕ фурт ба уомӕй дӕр фуддӕр. Естӕбӕл фӕммӕстгун ӕй, уӕд нецӕмӕй аурста: кардай, фӕрӕтӕй, ӕ къохи ци фӕцайдӕ, уомӕй ниццӕвунмӕ ӕвзиста. Фал си ауӕхӕн хабар ба некӕдма райгъустӕй:
Дууӕ лæппой киндзӕхсӕвӕри адтӕнцӕ, ма уордигӕй фӕстӕмӕ цудӕнцӕ хуӕнхаг нарӕг къахвӕндагбӕл. Цудӕнцӕ кӕрӕдзей фӕсте; разӕй Гекий, ӕ фӕсте ба Тебой фурт Мусуй, берӕгъи зӕрдӕ кӕмӕн адтӕй, е.
- Къуӕрей фӕсте мийнӕвӕрттӕ ӕрветун Дарицкай кизгӕ Сафиатмӕ, - загъта Мусуй мӕстгунхузӕй, - ма бавзарӕд нӕ зӕгъун.
- Хӕснӕ кӕнун дӕ хӕццӕ: нӕ дӕмӕ бакомдзӕй, - гъазӕн ӕмхасӕй дзурдта Хъатути Баделий фурт Гекий.
- Цæмӕннӕ? - цидӕр сосӕг ӕма мӕстгун хузæй фӕрсуй Мусуй.
- Дзантей уарзон ӕй рагӕй дӕр, ма мӕмӕ уотӕ кӕсуй, Дзантей рази дӕу нӕ равзардзӕй.
- Ма Дзанте ба мӕнӕй лӕгдӕр ӕй?
- Лӕгӕй лӕгдӕртӕ берӕ ес.
- Нӕ ӕз дӕ уотӕ фӕрсун, Дзанте, мӕнӕй лӕгдӕр ӕй ӕви нæ?
- Дзанте мӕнӕй дӕр лӕгдӕр ӕй, ма уоми уадессагӕй ци ес? Уӕдта кизги зӕрдӕ зин балӕдӕрӕн ӕй, хатгай уӕхӕн лӕппой равзаруй рӕсуґъд кизгӕ, ма си нӕдӕр бакаст, нӕдӕр лӕгигъӕдӕ. Æвӕццӕгӕн си ести хуарздзийнадӕ фӕууинуй.
Гекий ӕ цуди кой кодта, ма сабургай дзурдта е'мбали хӕццæ.
Уӕддӕр куд загътон, уотӕ сӕ маст уорамунмӕ дӕсни на 'дтӕнца Тебо ӕхуӕдӕг дӕр, ма ӕ цӕуӕт дӕр. Тебойӕн ӕ цӕсгони еу фарс сӕрӕй бунмӕ устур нос адтӕй. Е'нсувӕри уоси байста, ма’й е ӕхсаргардӕй ниццавта. Уотӕ дзориуонцӕ.
Мусуййи маст фулдӕрӕй фулдӕр кодта. Цӕбӕл уотӕ хъӕбӕр мӕстгун кодта, уой ӕхуӕдӕг дӕр хуарз нӕ лӕдӕрдтӕй. Ӕппунфӕстаг мийнӕвӕрттӕ дӕр нӕма барвиста, кӕд Сафиат исарази уодзӕй, уӕддӕр ин ци бӕрӕг ӕй, фал имӕ уотӕ кастӕй, ма еугур адӕн дӕр уой нихмӕ ӕнцӕ, неке ӕй уарзуй. Мӕнӕ æмбал, ӕ синхон Текий дӕр ӕ нихмӕ цума дзоруй, уотӕ имæ кӕсуй. Никки ма ниуӕзти тухӕ дӕр тог ирайун кодта.
Ма ӕппунфӕстаг искалдӕй ӕ маст.
- Ду дӕр, мӕ нихмӕ дӕ. Дӕумӕ гӕсгӕ ӕз нӕ балӕдӕрдтӕн Сафиати хӕццӕ ку кафтай, уӕд ин ци дзурдтай уой? - мӕстгунӕй бабӕй загъта Мусуй.
- Ци? - ходгай рафарста Гекий.
- Мӕ фудкой ин кодтай, ӕндӕр ци! - зустӕй загъта Мусуй.
Гекиймӕ хардау фӕккастӕй йеци загъд ма ӕрлӕудтӕй. Ӕхе разилдта Мусуймӕ ма ӕ маст уорангӕ, сабур, фал федарай загъта:
- Ӕз лӕг дӕн ма хахур дзубандитӕ, есге фудкой некӕд кӕнун, уӕлдайдӕр ба силгоймагӕн. Дӕ цъухӕй ба куд исхаудтæй уӕхӕн уӕззау гъуди?!
- Мадта цӕбӕл худтайтӕ мӕнӕрдӕмӕ кӕсгӕй? - Мусуй ӕ маст нӕбал римахста.
- Дӕу хабар нӕмӕ нӕ адтӕй уой хуарз гъуди кӕнун, - загъта Гекий.
Мусуйи къох ниддӕвдӕг ӕй карди фестойнӕбӕл, ӕ сӕр пеллон арт уагъта фур мӕстӕй. «Мӕн хабар сӕмӕ нӕ адтӕй, мӕн гъуди дӕр нӕ кӕнунцӕ, лӕгбӕл дӕр мӕ нӕ нимайунцӕ».
Еци рӕстӕг имӕ уотӕ кастӕй ма ӕгас дуйне дӕр уой нихмӕ ӕй. Ӕ цард имӕ мулдзуги цард фӕккастӕй. Маст ӕма ниуӕзти тухӕ исхӕлӕмулӕ ӕнцӕ. Еугур адӕн дӕр имӕ ӕзнаги цӕстӕй кӕсунцӕ. Ӕ еугур фудти сӕр ба иссӕй Гекий, мӕнӕ разӕй ка цӕуй, е, йе'мбал. Ӕ цӕститӕ ратар ӕнцӕ уолӕнӕй, ма кард ӕ фестойни уӕнгӕ рацавта Гекиййи фарси. Тӕнӕг курӕт ӕма хӕдонӕ цанӕбӕрӕг бауорӕдтайонцӕ карди цӕф. Гекий уӕззау унӕргъд никкодта ма къахнади фарсмӕ, зӕлдӕбӕл рахаудтӕй.
Мусуй уорс ӕхсӕггаги хузӕн фӕлорсӕй ӕдзинӕг кастӕй Гекиййи ӕнӕзмӕлгӕ гурӕмӕ, ма си не'руагӕс кодта, уотӕ имӕ кастӕй ма нуртӕккӕ фестдзӕнӕй. Фалӕ дӕ ралгъетӕг отӕ ку ниссабур уидӕ. Гекий, цума ести исдзорунмӕ гъавта, ма ин нӕбал бантӕстӕй, уоци хузӕнӕй, игон цӕстӕй ниссабур æй.
Ӕхсӕви тар ӕваст ӕрӕмбарзта ком. Арвбӕл еугай сау мегъи цъоппитӕ тунзтӕнцӕ комӕй будурӕмӕ. Мусуй ӕдзӕмӕй лӕудтӕй ма ку тогӕйгъӕстӕ кардмӕ ӕркӕсидӕ, ку ба Геккиййи фӕлорс цӕсгоммӕ, Ӕ сӕр ӕртау сугъдӕй, ма цӕйбӕрцӕ ӕрвонгдӕр кодта, уотӕ хуӕздӕр лӕдӕрун райдӕдта, ци устур бӕллах ӕрцудӕй, уой. Ӕ фур адӕргӕй ӕ къӕхтӕ бадонзонуг ӕнцӕ, 'ма Гекиййи рази зӕлдӕбӕл ӕхе ӕруагъта. Уӕздан, ӕд зунд, ӕд ӕгъдау лӕг Гекий ӕнанхосӕй доникъоси исӕвд фӕккодта.
Мусуй ӕ карди ком æ хӕдони кӕронӕй ниссӕрфта, ма æ къохи ци лӕдзӕг адтӕй, уой амайун райдӕдта. Дзӕвгарӕ рӕуой ӕнхӕст нӕ лӕдӕрдтӕй ӕхуӕдӕг дӕр, фал рӕстӕгӕй-рӕстӕгмӕ а зӕрдӕ ӕрлӕууидӕ ӕ фур тасӕй.
Тар ӕхсӕвӕ е'мбесæй рахизтӕй, Мусуййи зунд уотӕ исфӕлтардта ци ӕрцудӕй уобӕл, ма зӕрдӕй уӕлдай тас фесавдӕй, ӕрмӕст ма си байзадӕй тӕрегъӕд. Кӕмӕн тӕрегъӕд кодта Гекиййи мадӕ Сасинкъайӕн, ӕви Геккиййи уарзон Заретӕн? Нӕ, Мусуй ӕхецӕн тӕрегъӕд кодта; хуарз лӕдӕрттӕй ци имӕ ӕнгъӕл кастӕй, уой.
Бон ивайун райдӕдта, Ирӕфи зуст гъӕр фӕттухгиндӕр ӕй, уотӕ фӕккастӕй Мусуймӕ, цума имӕ ӕвзедгӕ кодта дон дӕр. Нур тагъд гъӕуама нӕдтӕбӕл цӕугутӕ фӕззинна. Мусуй æ уӕлейӕй раласта ӕ курӕт, ма си Гекиййи цӕсгом бамбарзта. Ӕ кард еуварс фехста, 'ма рараст ӕй будури гъӕуи тӕрхондонӕмӕ. Ӕ фӕндӕ конд адтӕй: гъӕуама радзора ӕхе цъухӕй, ци ӕрцудӕй уой. Уой фӕсте дзориуонцӕ еугай зонгитӕ, еци сӕумӕцъӕхӕй Мусуййи надбӕл ка фӕууидта, етӕ: ка дзурдта, «ӕ каст сирди каст адтӕй», ка ба «фӕлорс ӕма фӕлладхуз адтӕй». Фал сӕ еугур дӕр дес кодтонцӕ, уотӕ раги хонхӕй будурмӕ цӕмӕн цӕуй уӕгъдхӕдони, уобӕл. Бафӕрсун ӕй неке бандиудта.
Еци бон, хор нӕма искастӕй, еци афони Фӕрӕскъӕттаг дууӕ лӕги рацудӕнцӕ гъӕуӕй, ма гъӕугӕрон минкъий ковӕндонӕмӕ хӕстӕг, къахнади билӕбӕл фӕууидтонцӕ, курӕтӕй ӕмбӕрзт ӕ цӕсгон, уотемӕй хъанӕй лӕудтӕй лӕг. Ӕ рази дзӕвгарӕ лӕдзаги амӕдздзагтӕ. Дессаг сӕмӕ фӕккастӕй йеци афони уомӕл зӕнхӕбӕл ке хустӕй лӕг, е, май райгъал кӕнунмӕ гъавтонцӕ, фал лӕг не змалдӕй, Фӕффӕдес кодтонцӕ Фӕрӕскъӕттӕмӕ ма гъӕу ӕрӕмбурд ӕнцӕ марди сӕргъи. Ӕ цӕсгон ин ку байгон кодтонцӕ, уӕд адӕн ахӕй никкуддӕнцӕ. Гекиййӕн Фӕрӕскъӕтти хӕстӕгутӕ дӕр куд нӕ адтайдӕ. Сӕ кӕунгъӕр ӕма силгоймӕгти гъарӕнгӕмӕ иннӕ гъӕутӕй дӕр цӕун райдӕдтонцӕ.
Уотӕ ӕнӕнгъӕлтӕбӕл рахецӕн ӕй Гекийи цард.
Май, 1985 анз. Мӕску.
См.: Ирæф 1991 №1.
