Тетцойти Таймураз
Гибизти Дебола
Балладæ
Е уинуй унгӕг арф коми:
уомӕл къӕйрӕбун, болат
нарти Батразау, уӕсгоммӕ
хъанæй лӕууй Дебола.
Кӕмидӕр - уӕлйау - фӕндӕгтӕ,
цардбӕл тох ӕма дуйне,
ами ба нӕййес ӕзнӕгтӕ,
ӕ лимӕнтæй дæр неке.
Куд нӕбал схеза уӕлкоммӕ,
куд нӕбал уина ӕ хор -
дон уӕллӕй кӕлуй цӕсгоммӕ,
æ уӕргутӕбӕл - къӕйдор.
Ӕ цӕсгом зӕронд ни 'мбӕрзуй
резгӕ арми тъӕпӕнтӕй,
нӕ никкӕуй, фал нигъгъӕрзуй
рӕсуд зӕрди ӕрхӕнтӕй.
Гъеуӕддӕр нӕма фе 'рра уй!
Ком ӕ бӕсти никкӕуй,
хонхи тегътӕ ниййарауй,
арв ӕнод хӕкъурцц кӕнуй...
Арӕхсгай сесуй къӕйдор,
нийцӕлхъ ласуй цъӕх къӕбурбӕл -
фурти 'лвасуй ӕ уӕлхъурмӕ:
- Ниххатир кӕнӕ, мӕ хор...
Цӕмӕй дин тарстӕн гъеотӕ,
гъе нæ ракъуӕрдта уӕддӕр, -
фасуй ин ӕ сау дзигготӕ,
резгӕ дауй ин ӕ сӕр,
- Ниммин кӕнӕ фурти хатир,
цӕргæ бӕнтти дӕ, куд нур,
гъе ӕрмӕстдӕр цалдӕр хатти
ӕз никкодтон мӕ уӕлхъур.
Нӕ фадуатӕй гъигӕдардӕй,
нӕ амондмӕ ӕнгъӕлдзау,
ӕгӕр раги сготондар дӕ,
ӕгӕр раги 'сдӕ гъӕддзау.
Мӕ рӕвдудӕй нӕ ба 'фсастӕ,
нӕ ба 'фсастӕн дӕуӕй ӕз:
адӕммӕ ми райервазтӕ,
цума арвмӕ цъӕх цӕргӕс».
Ӕ бӕгъатӕр фурти рази
йе не 'ндеуй искӕун,
цӕстисугтӕ бафӕразуй,
цӕхгун донау, нихъуӕрун.
Кӕсгӕй фурти тад цӕсгоммӕ,
фӕрсунгъон уӕддӕр фӕцӕй:
- Куд ӕрхаудтӕ аци коммӕ,
кутемӕй ӕма кӕцӕй?»
Фурт цума мӕнкъӕй фе'змалдӕй
ма фӕсос хъурӕй сдзурдта:
- Нӕ гъудтаг еу цъос фе 'халдӕй…
Знаг нӕ Гурдзимӕ сурдта.
Мах адтан тӕссаг бунати
сӕйгӕ, стонг ӕма фӕллад.
Ӕсхуста нӕ ӕнӕхатир
къӕдзтӕ-мӕдзтӕ ӕвӕд над.
Хуӕнхтӕбӕл лигъдан арф мети,
гъизт бурдӕнӕй кодтан хъан.
Знӕгти къуарбӕл Хевсуретий
ӕвеппайди 'мбӕлд фӕцан.
Сау Икъо мӕ бафӕсмардта.
Къуар, ӕ цийни цъӕхахстау,
мӕнбӕл еу залп ку равардта,
уӕд мӕ уӕлбилӕй ра 'хста.
Рами лигъдӕнцӕ къӕдзӕхтӕ,
бунмӕ хаугӕй, цӕбӕлдӕр
ӕз цума къуӕрдтон мӕ къӕхтӕ,
ӕз цума цавтон мӕ сӕр.
Сатӕг метбӕл ку фе 'мбалдтӕн,
уӕд ми фе 'схъиудтӕй мӕ цард.
Уой фӕсте ӕз нецибал дӕн.
Отид мард нӕ дӕн - дзухъмард...»
Фидӕ кӕун нӕ фӕразуй,
ком ӕ бӕсти никкӕуй,
хонх ӕ бӕсти нидздзиназуй,
арв ӕнод хӕкъурцц кӕнуй...
Арф нийнӕфуй гъезӕмарӕй,
бателуй ӕ сӕр зӕронд:
- Эх, ӕза уарзтон де 'хсарӕ,
куд мӕ нифс ӕма амонд.
Бархе цардбӕл тохи хъарӕ
Уӕрӕсейӕй исхастай,
нӕ уӕлхуӕнхтӕ сӕребари
туруса бӕрзонд систай.
Фестӕгӕй кӕми не 'рхаттӕ
нӕ хуӕнхбӕстӕй, будурӕй,
кети хӕццӕ нӕ бабадтӕ
ма нӕ дзурдтай лигъз хъурӕй,
нӕ рист адӕм, тумбулкъохау,
куд исеу уонцӕ хъарӕй,
куд фе 'сафонцӕ стур тохи
сӕ тогцъирти бундзарӕй.
Цӕстӕ дӕр нӕ фӕнникъолгӕй,
ӕрлӕудтӕнцӕ уӕд де 'нварс:
нӕ Шамиль ӕма нӕ Колкӕ,
нӕ Ӕндре ӕма Тарас.
Уӕ нифсхаст, зундгин хъаугъати,
куд дууӕ дунгей ӕгъатир
кæрӕдзей цӕфӕй цирен,
уӕд райгурдӕй Тулаттати
Черменӕй сӕдӕ мин хатти
зӕрдтагондӕр, зундиндӕр,
адӕмондӕр, тухгиндӕр
ӕма номдзуддӕр «Кермен»!
«Кермен» райгурдӕй зинтӕй
тогцъиртӕмӕ содзгӕ мастӕй,
мӕгуртӕмӕ содзгӕ уарзтӕй,
сӕребарӕмӕ бӕлдӕй!»
- Ӕримбурд кодтай лӕгдӕрти,
ма «Кермени» хъазауат бӕсти
къумти ку ниннӕрдтӕй,
куд бархей тухи набат.
Косӕг дзиллӕ ку фӕббадтӕй
ӕ даргъ думӕг бӕхтӕбӕл,
хъал Туйгъантӕ 'ма Хъубадти
систа мудзурай финдзбӕл,
Къохмӕ 'рбайста сӕребарӕ,
æ зӕнхитӕ 'ма йе 'сон.
Сӕрӕстур ди дӕн, ме 'фсарӕ,
нӕуӕг доги фӕдесон!..
Нӕ дӕ стаун, лӕгигъӕдӕй, -
Фидӕ фе 'рхуӕстӕй куддӕр, -
ду айдагъ мӕ фурт ку нӕ дӕ –
адӕми фурт дӕ фулдӕр!
Фал уадзис нура зӕронди.
Гӕр, фӕцан уи фудӕнгъӕл?
Гӕр, байзадан ӕнамондӕй?
Гӕр, уӕ тох фӕцӕй дзӕгъӕл?»
Раст цума мӕнкъӕй ба 'змалдӕй,
дзоруй саст хъурӕй лӕппо: -
Уӕхӕн зар кӕнун не 'мбалдӕй
уӕлдайдӕр дӕуӕн, Дӕппо!
Конд гъудтӕгтӕбӕл майхалӕ
ду деууӕнкӕ дӕ зинӕн.
Ду айдагъ фидӕ нӕ,
фалӕ уарзон адӕм дӕ мӕнӕн.
Ниммин кӕнӕ фиди хатир,
кӕд адӕми мӕ зӕрдӕй
зин ӕма тӕссаг сахати
фулдӕр уарзтон мӕ фидӕй.
Ес фидтӕлтӕ хъӕбӕр берӕ,
фал сӕйраг фидӕй адӕм.
Уой амонд ӕма уӕхери
фурт кӕд райста ӕ зӕрдӕн,
кӕд ӕ хӕццӕ ссӕй ӕмвӕндӕ,
цард кӕд дӕттуй уобӕл,
уӕд фурт ӕй адӕмон, ӕууӕндӕ,
уӕд фуртӕн нӕййес мӕлӕт!
Большевик ба адӕмон ӕй.
Большевикти басӕттун
а-дунейбӕл неке бон ӕй,
уой федардӕрӕй зӕгъун.
Нӕ ледзӕн зинтӕй, ӕууӕндӕ,
размӕ ӕй нур дӕр нӕ цуд.
Мембӕлтти хӕццӕ-мӕ зӕрдӕ,
мӕ тӕходуйтӕ, мӕ зунд.
Нӕ лимӕнтӕ 'ма ӕфсӕдтӕ
Серге ма Сергой фӕдбӕл
сугъдӕбӕл ӕма ӕвӕдти,
сӕребарау, куд дӕ бӕлд,
дӕумӕ рӕхги зиндзӕнӕнцӕ,
мӕ уарзон фидӕ ме 'мбал,
дӕу сæ хъури кӕндзӕнӕнцӕ;
ӕрмӕстдӕр ӕза - нӕбал.
Мӕн фе 'хстонцӕ хонхи тегъӕй
дзилли знӕгтӕ фурмӕстӕй.
Сойми кӕнун дӕ орс рехӕй,
фе 'хсдзинан сӕ нӕ бӕстӕй!»
Ци бизиртт ӕй фиди бауӕр,
фал ӕ каст ӕй ӕхцӕуӕн!
Е зӕгъуй ин: «Ести 'гъдауӕй
нӕ хӕдзарӕмӕ цӕуӕн.
Дӕу агорун цалдӕр мӕйи
гъӕдтӕ, хуӕнхти ӕд азар.
Ехгӕдта мин над зуст зӕйӕ,
орӕдта мӕ 'хсӕви тар,
уонӕй фуддӕр ба - не 'знӕгтӕ.
Цӕй, нӕхемӕ нин цӕугӕй,
Ӕз дӕ хуӕртӕ 'ма гъӕуггӕгти
раги ниууагътон кӕугӕй.
Ами дин нӕййес ниууадзӕн
халӕнттӕн ӕма сирдтӕн.»
Е уинуй фехсуд кӕрдбадзӕ,
æ къурццӕвӕнӕй цӕуӕн.
Фурти исесуй уодагӕ,
ӕривӕруй уӕлкъӕйдор:
- Дӕу нӕхемӕ 'рмӕст голлаги
ӕз фӕххӕссдзӕнӕн, мӕ хор...»
Гъигӕ ин содзуй ӕ хъуртӕ,
ӕ рист зӕрдӕ ин хуӕруй:
иуӕнггай кӕнуй ӕ фурти
ма ‘й голлаги ӕвӕруй!
Кӕун уӕддӕр нӕ фӕразуй,
ком ӕ бӕсти никкӕуй,
хонх ӕ бӕсти нидздзиназуй,
арв ӕнод хӕкъурцц кӕнуй...
Ӕнамонддӕр уаргъ йе 'рагъмӕ
уӕззау ист кӕнуй зӕронд,
искӕсуй ма хонхи рагъмӕ
арвбӕл хорау ӕй бӕрзонд!
Лӕгъзӕр хури, дорти 'хсӕнти
хӕрдмӕ сабургай цӕуй,
уафси асӕ ӕрлӕууӕнти
дори 'нцойнæй ӕрлӕууй.
Фал уӕлиау ӕй рагъ, уӕлийау ӕй.
Арвбӕл хорау ӕй бӕрзонд.
Ливзӕ дор æй ку фӕссайуй,
уӕд фӕккеуй рист зӕронд.
Хедӕвдулд, зӕрддзӕф фе 'стадӕй
'ма ӕнод кӕнуй уæгæй,
æ уӕргутӕбӕл 'рбабадуй,
фал исистуй нӕуӕгӕй.
Ӕ фуртӕй кӕнуй ӕфсӕрми,
нецибал зонуй ӕндӕр,
фал цъӕх арв кӕнуй ӕ сӕрмӕ
фӕтӕндӕрӕй-фӕтӕндӕр.
Мӕнӕ рагъ... Фуртӕн ӕ рази
бадуй надбӕл, уолӕфуй,
исистуй ӕма цӕуй,
фурти хӕццӕ ӕрмӕст размӕ.
Игъосуй зӕронд ӕ сӕрмӕ
уарзон фурти хъурихатт:
- Хъӕбӕр ди кӕнун ӕфсӕрми,
ихӕсгинау, аллихатт,
ке дин бафистон «ӕстуд»
тас ӕма зинӕй де 'нцойнӕ,
стур фӕдестӕй - дӕ фӕллойнӕ,
стур катайтӕй - дӕ рӕвдуд.»
- Цитӕ дзори! Ма мӕ марӕ.
Фист ди ‘й адӕми ихӕс.
Дзиллӕн радтун сӕребарӕ
Фист ихӕстӕн сӕ тӕмӕс!..
Сӕдӕ хатти дӕр дӕ бӕсти
бӕргӕ радтинӕ мӕ цард!»
- Цард ку радтай ду дӕ бӕстӕн,
уӕд дӕ лӕг, кӕд нӕ-уӕд-мард!»
Арвгӕрон зиннуй идардмӕ.
Сӕрӕстур фидӕ кӕуй,
ӕнӕмӕлӕт баргин цардмӕ
æ фурти хӕццӕ цӕуй.
