КОЗУРТИ ТАЙМУРАЗИ ТАУÆРÆХЪ
Цардӕй Козурти Таймураз хонхи. Алли бон дӕр мардта сирдтӕ; ӕрхӕссидӕ сӕ, еу адтайдӕ, дууӕ адтайдӕ, уӕддӕр. Ӕхецӕн ба адтӕй искӕнгӕ ӕнсувӕртӕ ӕртӕ лӕги (сӕ нӕндтӕ син нӕ зонун). Мадæй райгургӕ ба ин адтӕй еунӕг ӕнсувӕр. Сирди мӕрдтӕ ку ӕрхӕссидӕ, уӕд йе 'ртӕ ӕнсувӕремӕ фӕдздзоридӕ ӕма фӕммийнасӕ кӕниуонцӕ, уӕдта син сӕ бийнонтӕн дӕр раттидӕ алли сирди мардӕй дӕр ӕма фӕххӕссиуонцӕ хӕйттӕ. Ӕхе еунӕг ӕнсувӕрмӕ ба дзоргӕ дӕр нӕ кодта, кӕрӕдземӕ нӕ дзурдтонцӕ.
Уотемæй хъӕбӕр берӕ ӕнзтӕ рацудæй, хаста сæ йе скӕнгӕ ӕнсувӕрти ӕд бийнонтæ.
Еу хатт кӕми адтӕй, уоми ба ин кадӕр баамудта, сирдтӕ берӕ кӕми е, уӕхӕн ком, Хӕрхиком.
Ӕрбацудæй ӕма дзоруй ӕ мадӕмӕ:
- Уӕ, дзицца, рагъӕн рӕуӕг ӕма мин губунӕн дзӕбӕх хуаллаг рарӕвдзӕ кӕнӕ, цауæни цӕун Хӕрхикоммӕ!
Хуаллаг ин рарӕвдзӕ кодта ӕ мадӕ, ӕма рандӕй. Исхъӕрттӕй Хӕрхикоммӕ ема зелæн кӕнуй, кӕсуй, агоруй Таймураз, уотемӕй ибӕл ӕризӕр ӕй. Сӕдсиуон саг рамардта, ӕма е ба гали асӕ адтæй. Саг ку'рхъан ӕй, ӕма 'й Таймураз ку ӕривгарста, уӕд ин ӕ бон н'адтӕй багъуд кӕнун дӕр, рахӕссун дӕр. Ӕ зӕрди уӕдта ӕрӕфтудӕй Таймуразӕн, цæй, æма ме 'скӕнгӕ ӕнсувӕрти бавзарон, зӕгъгӕ, цума мӕмӕ ци зӕрдихат дарунцӕ.
Ӕ саги мард бафснайдта, нийбӕлцурхта пихситӕ, ӕндӕртӕ ӕма рацудӕй; рахъӕрттӕй Таймураз гъӕумӕ, ӕма ймӕ хӕстӕгдӕр ци 'скӕнгӕ ӕнсувӕр адтӕй, уомӕ дуар бахуаста, бадзурдта ймӕ.
Е дӕр имӕ радзурдта:
- Ка дæ, циуавӕр дӕ ауӕхӕн ӕнафон ӕхсӕви?
Загъта ин Таймураз:
- Ма тӕрсӕ, ӕз Таймураз дӕн!
Ракастӕй имӕ:
- Ци дӕ фӕндуй? - зæгъгæ.
Загъта ин:
- Бӕлах мӕбӕл ӕрцудӕй аци бон, саги рӕуаги лæг рамардтон, ӕма мӕмӕ фӕккӕсӕ, цалдӕнги нӕма ӕрбон ӕй, уӕдмӕ и мард бафснайӕн!
Е ба ин загъта:
- Ду лӕгтӕ марай, ӕз ба дин сӕ ӕфснайгӕ кӕндзӕнæн, - зӕгъгӕ, - уӕхӕн ӕнсувӕр дин нӕ дӕн, зӕгъгæ, ӕма 'й лӕугӕ фӕууагъта.
Таймураз уомӕй рацудӕй ӕма иннемӕ бадзурдта, ӕма ин иннӕ дӕр еци дзуапп равардта. Уӕдта ӕртиккагмӕ дӕр бадзурдта, ӕма е дӕр уотӕ, уӕхӕн дзуапп ин равардта.
Ӕндӕр син нецибал загъта Таймураз ӕма рацудӕй, цӕй, зӕгъгӕ, нур ба, берӕ ӕнзти дӕргъи кӕмӕ не 'сдзурдтон, мӕ еунӕг ӕнсувӕрмӕ бадзорон, цума е ба ци зӕгъдзӕнӕй, зæгъгӕ.
Бадзурдта ймӕ, ӕма, «ка дӕ?», зӕгъгӕ, ймӕ радзурдта е дӕр.
- Рамӕмӕкӕсӕ, Таймураз дӕн ӕз!
Ралӕуирдта ӕ хуссӕнӕй, Таймураз ӕй, уой ку базудта, уӕд, цидӕр ибӕл ӕрцудӕй, зӕгъгӕ.
Дзоруй имӕ Таймураз:
- Ме’нсувӕр, абони уалдӕнгӕ кӕрӕдземӕ не 'сдзурдтан, нур ба исӕфун, саги рӕуагӕ, рамӕбӕл талингӕ ‘й, ӕма лæг рамардтон Хӕрхикоми.
Е’рвадӕ уой куддӕр райгъуста, уотӕ загъта:
- Йа, уууæй! Уомӕй дин ку фӕттарстӕн, ӕма уатмӕ бауадӕй ӕма рагъӕнӕй топп раскъафта ӕма загъта:
- Гъе нур тӕрсгӕ мабал кӕнӕ! Ку не 'рцудайдӕ, уӕд хуӕздӕр бӕргӕ адтӕй, фал кӕми ӕрцудӕй, уоми ба тӕрсгӕ мабал кӕнӕ! Мӕ разӕй рацо, кумӕ цӕун гъӕуй, уой ӕз нæ зонун, ӕма цӕуӕн!
Рандӕнцӕ ӕма исхъӕрттӕнцӕ Хӕрхикоммӕ. Саги марди сӕргъи ӕрлӕудтӕнцӕ.
- Мӕнӕ пихсити буни 'й и лӕги мард, ӕма ин ци бакӕнон - дзоруй Таймураз е 'рвадӕмӕ.
Райгон кодтонцӕ пихситӕ, ӕма дин е ба сӕдсиуон саги
мард.
Е 'нсувӕр ка 'дтӕй, е ниссах ӕй ӕма загъта:
- А саги мард ку ӕй, ӕма мӕ цӕмӕн фӕттӕрсун кодтай?
Гъема еци рауӕн Таймураз ӕ кӕстӕр ӕнсувӕри æ хъури никкодта ӕма ин загъта:
- Нимминхатир кӕнӕ, абони уалдӕнгӕ ӕз, хестӕр уогӕй, дӕумӕ ке нӕ дзурдтон, уой. Фал ӕй нур ба базудтон, мӕнӕн дӕуӕй уӕлдай ке некӕми неке ес, уой, ӕма нур ба абонӕй фӕстӕмӕ зондзинан, цард куд ӕй, уой. Зонис, зӕгъгæ, загъта, - мæнæн ӕртӕ искӕнгӕ ӕнсувӕри ес, дӕу разӕй сӕ еуемӕ бадзурдтон, дӕуӕн куд загътон, уомӕн дӕр уотӕ загътон, ӕма мин загъта, ӕз дӕуӕй лӕги мӕрдтӕ нимӕхсунмӕ ӕнсувӕр нӕ загътон, зӕгъгӕ. Уой ниууагътон ӕма дуккагмӕ бадзурдтон, ӕма мин е дӕр уӕхӕн дзуапп равардта. Ӕртиккагмӕ бадзурдтон, ӕртиккаг дӕр мин уӕхӕн дзуапп равардта. Гъе нур ба, ӕз цауæйнон кæдæй дӕн, уой зонис, ӕма æнӕ сирди мард некӕд ӕрцудтӕн, ӕма 'й хуӕргӕ ба уони бийнонтӕ бакӕниуонцӕ. Гъема сӕ ниууагътон ӕма дӕумӕ бадзурдтон, цума мӕ еунӕг ӕнсувӕр ба ци дзуапп зӕгъдзӕнӕй, зӕгъгӕ. Гъенур ба 'й базудтон, адӕймагӕн мадӕй райгургӕ ӕнсувӕрæй хъазардӕр ке неци ес, уой.
Кӕрӕдзей нихъхъури кодтонцӕ ӕма еци бонӕй фӕстӕмӕ адгин ӕнсувӕртӕй цӕрун райдӕдтонцӕ. Сӕхе исфест кодтонцӕ, саги мард гъуд кӕнун райдӕдтонцӕ, фезонгутӕ дӕр искодтонцӕ, фӕббадтӕнцӕ, уӕдтай нистъигътонцæ.
Гъе уотемӕй сӕбӕл ӕхсӕвӕ ӕрбон ӕй. Ку'рбон ӕй, уӕдта ма сӕбӕл ӕмбӕлгутӕ фӕцӕй, ӕма саги мард рахастонцæ. Сӕ бийнонтӕ дӕр син тарстӕнцӕ, ести сӕбӕл ку ӕрцӕуа, зӕгъгæ.
Загъта уӕдта Таймураз адӕмӕн, кувд искодта ӕма син хабар ӕрдзурдта, уотемӕй:
- Мӕнæй ка 'й, е абонӕй фӕстӕмӕ искӕнгӕ ӕнсувӕр мабал искӕнӕд!
Таймураз уой фӕсте, цауӕйнон куд адтӕй, уотӕ хаттӕй, е 'скӕнгæ ӕнсувӕртӕ ба ймӕ хӕстӕгдӕр нӕбал ӕрцудӕнцӕ, ӕ еунӕг ӕнсувӕри хӕццӕ уарзонӕй фӕццардӕнцӕ берæ.
Уони ци нæ фӕууидтан, ӕндӕр рун ӕма нӕма ӕндӕр нез ма 'рцæуæд.
Дедегкати Дзанболат
