МӔ ЦӔСТИНГАС ЕУ КУВДМӔ
Дигорон адӕми царди ахсгиаг бунат ахӕссунцӕ зйани ӕма цийни финги ӕгъдӕуттӕ. Зундгонд нин ӕй, финги ӕгъдӕуттӕ кувдтитӕй ке федаунцӕ, е.
Арӕх исӕмбӕлун зйӕнтти дӕр ӕма цийнити дӕр. Еугур хабӕрттӕбӕл нӕ рахъӕртдзӕнӕн, (уӕдта сӕ зонгӕ дӕр хуарз нӕ кӕнун), фал ӕрлӕудзӕнӕн, ниййергути туххӕн ке фӕккӕнунцӕ, еци кувдбӕл. Райдайӕ хестӕртӕй ӕма кӕстӕрти уӕнгӕ уобӕл беретӕ фӕррӕдуйунцӕ. Бадти медӕгӕ ескӕмӕн (никки ба ма хестӕр ку уа) бауайдзӕф кӕнун нӕ фӕткуй, уӕдта ӕй нур дӕр зундамонуни хузи нӕ зӕгъун, фал мӕ фӕндуй журнали фӕрстӕбӕл мӕ гъудитӕ раргом кӕнун, уомӕн ӕма цидӕр пъӕззу ниббадуй мӕ зӕрдӕбӕл.
Ниййергути туххӕн фӕкковунцӕ дууӕ хузи: еу - ӕгас ма ка ӕй, уӕдта ка нӕбал ӕй, уони туххӕн фӕззӕгъунцӕ хецӕнтӕй; иннӕ ба - еугурей туххӕн дӕр фæззӕгъунцӕ еумӕйагӕй, ӕрмӕст дууӕ хаййемӕй (финги равгитӕ ку нӕ амононцӕ, кувдтитӕ цубурдӕр ку кӕнонцӕ, уӕд. Уотӕ арӕх фæууй цийни ӕма хумӕтӕг бабаддзийнӕдти).
Зӕгъӕн: «Ниййергутӕй ма ӕгас катӕ ’нцӕ, етӕ хуӕрззӕруӕ кӕнӕтӕ. Катӕ си нӕбал ӕнцӕ, етӕ ба, мӕрдти дуйней ци хуарздзийнӕдтӕ ес, уонӕй хайгин уӕнтӕ». Ес ма ин берӕ ӕндӕрхузти зӕгъӕн дӕр, фал ӕй ӕз ӕрхастон дӕнцӕн.
Нур ба мӕ дзубандий сӕр цӕбӕл ӕй, уой бӕлвурддӕр равдесон. Гъуддаг уой медӕгӕ ӕй ӕма ’й берстӕ фӕкковунцӕ ӕнӕраст.
Зӕгъӕн: «Ниййергутӕ кӕмӕн нӕбал ес, етӕ ба рохсаг уӕнтӕ», «Ниййергутӕй ка кӕмӕн нæбал ес, етӕ рохсаг уӕнтӕ, дзенети бадӕнтӕ».
Ами, мӕнмӕ гӕсгӕ, кувд усхъуммӕ ӕрзилдӕй ӕма рахизтӕй ӕлгъистмӕ. Ниййергутӕ кӕмӕн нæбал ес, етӕ ӕнцӕ сувӕллӕнттӕ ӕма ӕлгъист сӕхуӕдтӕ цӕунцӕ, цума сӕхе мӕгурбон сӕ фагӕ нӕ ’й, уоййау. Седзӕртӕн загъд цӕуй «рохсаг». Е ӕй ӕгъатир рӕдуд. Растдӕр ба уодзӕнӕй мӕнӕ атӕ: «Ниййергутӕ кӕнӕбал ес, уонӕн ба рохсаг уӕнтӕ, (дзенети бадӕнтӕ; ӕцӕг дуйней кӕд ести хуарздзийнӕдтӕ ес, уӕд уонӕй хайгин уӕнтӕ ӕма уотӕ идардтӕр). Кенӕдта: «Ниййергутӕй ка кӕмӕн нæбал ес, уонӕн ба рохсаг уӕнтӕ».
Куд уинӕн, уотемӕй дзурд «етӕ» ӕййивд ӕрцудӕй дзурд «уснӕн»-ӕй ӕма кувд ӕ бунати сбадтӕй.
Уӕхӕн дузӕрдуггаг кувдтитӕ ма берӕ ес дигорон фингӕбӕл ӕма нӕмӕ, корӕн уи, уӕ сагъӕстӕ, уӕ гъудитӕ, уӕ феппайуйнӕгтӕ финсетӕ.
Скъодтати Эльбрус.
См.: Журнал "Ираф" №1, 1994г.
