ӔРВГЪУЗ СИРЕНТӔ
ГАДАТИ БАРИСИ РОХС НОМ ЕРУНӔН
Ци адгин ӕй, ӕдта, райгурӕн къӕс!? Алцидӕр си зӕрди медӕгӕ уӕлдай бунат ахӕссуй! Игон итигъд къӕрӕзтӕй уалдзигон рагагъон деденгути имонау мудадӕ искусийнӕ - «ӕфсийнӕ» ӕй ӕрхӕнзӕрдӕ, рист тугъдон хӕдзари уӕтти. Незӕфхуӕрд нӕлгоймаг ӕма ӕ фӕллонфунх царди ӕмбали реутӕ си зудӕлвасӕ кодтонцӕ. Хӕдзари курухон хецау фур ӕхцӕуӕнӕй ӕ хъануати нӕбал ниггац кодта ӕма ӕхе хӕрдмӕ раргъувта. Еу гӕзӕмӕ зӕнхӕмӕ сӕццӕкӕсӕй, ӕ мӕтӕйдзаг цӕститӕ дони разилдта, уӕдта уотӕ исфӕразта:
- Гъе, гъе гъс! И зин тогӕйӕхснад Уӕлахези бон бабӕй ӕрхӕстӕг ӕй… - Дзӕбӕх ма ’й гъуди кӕнун: ӕнахур гъар рӕстӕг рахаста и деденгути ниййаразти рӕстӕги. Бӕзӕрхгутӕ, бӕрзондарӕзт, саухелӕ хӕдзари хецау сӕбӕл донӕй даргъхъур, ӕрхин гогойни хъурӕй бафсаста. Деденгути цӕсгоми е бафӕсмардта е ’фсӕддон алли кари нӕлгоймӕгтӕ, силгоймӕгтип.
О, еци Уӕлахези бон! Адӕймаги гъар тогӕй ӕхснад бӕрӕгбон. Цӕйбӕрцӕ цӕстисугтӕ расайдта ӕ хӕццӕ? Цал ӕнӕбари бӕлццони фиццаг ӕма фӕстаг хатти фембӕлунӕй — рӕхги ӕриздӕхунӕй сор сайд фӕккодтонцӕ боц ниййергути, уонӕхсарӕ ӕнсувӕрти, тӕнзӕрдӕ хуӕрти, сосӕг уарзӕнтти, цибӕлӕй ӕнгъӕлдзау царди ӕмбӕлтти, ӕнагъом сабийти… Цал адтӕнцӕ, цал? Цал уотид ӕфсӕйнаг циртдзӕвӕни рарӕнгъитӕ ӕнцӕ уӕлмӕрдти сау турусатӕ ӕма сурх ӕстъалути хӕццӕ?!
Игон къӕрӕзтӕй уайтагъддӕр рагуалдзигон ӕрвхуз деденгутӕ сиреньти зӕрдӕагайгӕ мудтӕф «исӕфсийнӕ ӕй» зонгӕ тугъдони хӕдзари хуӕрзӕфснайд уати. Ӕрмӕст хӕдзари хецау ӕма ӕ рӕстзӕрдӕ цардӕмбал ба раздӕрау зудӕлвасӕ, арф ӕхцӕуӕн уолӕвтитӕ, фиццаг хатт нӕбал искодтонцӕ…
Уо, уо! Фиццаг хатт, уӕдта ӕппун некӕдбал барӕвдаудзӕцӕнцӕ деденгути къотӕрти сӕ дирзӕг, кустӕфхуӕрд урзӕй, алциӕстӕфагӕ зӕрдити таведзӕй, донӕй дӕр ӕй нӕбал бафсаддзӕнӕнцӕ… Уӕлахези цитгин бӕрӕгбон… Зӕу зӕу, цӕстисугтӕй ӕмидолӕ… Зӕрди гъӕдгинти никъӕттитӕ тухаст асдзӕгъдунцӕ… Зундамонӕг, синхон тугъдон ӕма ӕ уарзон цардӕмбали гъӕрзгӕ, нӕуӕг циртитӕбӕл сӕ арӕзт сиреньтӕй армидзаг ӕрбахастонцӕ сӕ ӕртӕ фурти, дууӕ кизги, уони цӕуӕт… Ӕрвхуз деденгутӕ сӕ «сӕртӕ» гӕзӕмӕ ӕруагътонцӕ, ӕмпулӕгау…
Кӕд етӕ дӕр хъонц кӕнунцӕ Уӕлахези бӕрӕгбони сӕ ниййаразӕги ӕнӕнгъӕлти фӕгъудбӕл? Ка’й зонуй! Мадӕ ӕрдзӕмӕ ма, дан, берӕ ӕнӕӕргомгонд, сосӕгдзийнӕдтӕ ес…
Хохойти Энвер
9 май, 1993 анзи, Сурх Дигори гъӕу.
