КАРД ӔМА КӔРДБАДЗӔ
Бабочити Руслан «Нифс» «Ир.» 1990 анз.
Анзӕн ӕ кӕцифӕнди афони дӕр ӕнӕкӕрон рӕсугъд ӕнцӕ Ирӕфи донгӕнттӕ. Раст уӕлӕ Къӕрӕугоми ӕносон цъететӕй сауӕнгӕ Теркбӕл кӕми ӕфтуйуй, уой уӕнгӕ. Фал си уӕддӕр ӕмбал нӕййес фӕззӕгӕн; фиуау ку исбор унцӕ бӕлӕсти сифтӕ, нӕугӕрдӕг, еугур дуйне… Ӕрдзӕ куддӕр фӕммӕтъӕлхуз уй. Фал ма идзулд бони сӕрди фӕлхӕнтӕ бӕрӕг фӕддарунцӕ. Ӕ зӕллангмурӕ дзӕнгӕргутӕ гъости азӕлунцӕ.
Дзӕнӕтмӕ цӕуӕгау бабӕй ӕрцудтӕн аци рауӕнмӕ, «Хӕзнидон Ирӕфмӕ кӕми тундзуй», уой фалдзосмӕ. Мӕнӕ аргъӕутти бӕстӕ, хӕртӕ иронхгӕнӕн, рохс гъудитӕбӕл ӕфтауӕг! Донгӕрӕнтти нарӕггомау ивад деденгути лигъз фӕзӕ, боргон сӕ дзӕгӕргутӕ. Фӕстегӕй фахсбӕл сурхзӕрийнӕ дарӕси истунцӕ ӕносон бӕлӕстӕ; къӕдзалмудзултӕ аздухститӕ, лагъзтӕ. Ӕмбал нӕййес сӕ конд, сӕ уиндӕн. Еу фӕззилди дӕмӕ фӕккӕсдзӕнӕнцӕ ӕфсӕрмдзаст кизгуттӕ, уӕзданхузӕй. Цума рӕсог донмӕ, кӕрӕдзей усхъи сӕрти кӕсгӕй, айдӕнӕмӕ кӕсӕгау, нимдзаст ӕнцӕ, уотемӕй сахат истгӕ райзадӕнцӕ.
Кӕрдӕг кӕми фӕффӕсалӕ ӕй, еци фӕзи ӕндзӕр бадун. Евгъуйуй Ирӕфи дон мӕ рӕзти еугӕндзонӕй, лӕгӕмбӕрцӕ дӕлдӕр, копраузи хузӕн цъӕх цъӕхидӕй. Дони бунӕй дзӕбӕх исзиндтӕнцӕ дортӕ дӕр ма. Федар хуӕцунцӕ зӕнхӕбӕл. Уолӕнтӕмӕ кӕсгӕй, куддӕр сагъдау ниддӕн. Ӕрдзӕ мӕ имонауӕй сугур дуйнейӕй ӕ рони пирримахста, ӕхе мӕ бакодта еу рӕстӕги. Ами дӕн, гъе фал цума нӕ дӕи…
О, кӕдзос ӕй нуртӕккӕ Ирӕфи дон. Фӕссӕрдӕ нӕбал игъусуй ӕ уӕззау ӕзнӕт гъӕр. Кумӕдӕр ивулдӕй уотӕ рӕуӕгӕй не ’скъӕфуй тугулдортӕ ӕма ӕдкъуала бӕлӕстӕ. Дзӕвгарӕ ӕртӕнӕг ӕй, ӕруодӕнстӕй ӕрмахур бӕхау. Уинун нӕ сомигӕнӕн цӕугӕдон ӕ уӕздандӕр ӕздӕхи.
Аци минкъий зилди ци ӕдас сабурдзийнадӕ ес, уой фӕрци ӕмдзӕвгитӕ никки хъӕбӕрдӕр ӕмбӕлуицӕ лӕги ӕнкъарӕнтӕбӕл. Абонӕй ардӕмӕ мин ӕмбалеуӕг кӕнуй Бабочити Руслани киунугӕ «Авдӕни зар». Таргон бор ӕ цъарӕ, фӕззӕги ӕнгӕс. Асӕй минкъийгомау, фал зӕрдӕ дӕр устур нæй… Киунугӕ нӕуӕгуагъд нӕ ӕй. Уӕдта ӕй фиццаг хатт дӕр нӕ уинун. Фал си алкӕддӕр иссерун нӕуӕг ести хуарзӕнхӕ. Поэти уадзимистӕ мӕ бафтаунцӕ цардиуаги уӕззау сагъӕстӕбӕл. Раст дӕлӕ дони буни ци дортӕ уинун, уони хузӕн мӕмӕ бундойрон кӕсунцӕ Дигори унгӕг зӕнхӕбӕл. Хумӕтӕги нӕ фӕззӕгъунцӕ: «Дон цӕуй, дор изайуй».
Ӕцӕг поэзий уод тӕлфуй, базургин ӕй. Зӕрдӕ ин ес уӕззау кустгӕнӕг. Уӕларвон изӕдти ӕмбарийнӕ, ӕй, зӕнхон адӕми хӕццӕ ӕмдзӕрийнӕ. Ӕнккӕтей разӕй гъигӕй ӕстъӕлфуй, хуарзӕнхӕй ӕстугути ирӕзуй. Еци еугур ӕууӕлтӕй хайгин ӕнцӕ Руслани ӕмдзӕвгитӕ.
1990 анзи киунугӕ мухургондӕй ку фӕззиндтӕй, уӕд хӕсдзӕф фӕййеу ан поэт Мамукъати Хъазбеги хӕццӕ. Куд нӕ бацийнӕ кодтаййанӕ нӕ еумӕйаг ӕмбали финститӕбӕл. Дзӕвгарӕ фӕдздзурдтан ӕмдзӕвгити туххӕй. Ӕма уӕд фӕстагмӕ Хъазбег уотӕ бакодта: «Кӕд дигорон аййев литератури Блашка, Созур ӕма Геуӕргий финстити фӕсте устурдӕр хӕзна ести фӕззиндтӕй, уӕд е ӕй Бабочити Руслани киунугӕ «Авдӕни зар». Аци хецӕн ӕмдзӕвгити ӕмбурдгондӕй автор никки ирддӕрӕй бавдиста ӕ устур курдиадӕ. Бараггенӕй ӕрлӕудтӕй нӕ цитгин поэтти рӕнгъи аккаг кӕстӕрӕн».
Ӕцӕгӕйдӕр Руслани ӕмдзӕвгитӕ ӕнцӕ сӕрмагонд, лӕмбунӕг равзаруни бунати. Фал нур дзурд уодзӕнӕй киунугӕ «Авдӕни зар» и туххӕй.
Цалдӕр ӕма инсӕй анзи зонун Руслани. Ӕ уадзимистӕ мин фӕккӕсуй къохфинститӕй дӕр. Еу рӕстӕги ахур кодтан университети. Уӕд ирон факультети хъӕбӕр дзӕбӕх литературон еугонд адтӕй. Арӕх си ӕвзурст цудӕнцӕ студентти финститӕ. Еухатт е ’мдзӕвгитӕ кастӕй Руслан. Еугурей зӕрдӕмӕ дӕр фӕццудӕнцӕ. Ӕрмӕст ӕ еу ӕрвон ӕмдзӕвгӕ «Мӕн неке лӕдӕруй дуйнебӕл…» зӕгъгӕ, уомӕн ба ӕ нихмӕ дзурдтан, фаудтан… Ӕмдзӕвгӕ куд бӕрзонд уагбӕл финст адтӕй, ци гъуди си тӕлфтӕй, е мӕнмӕ фӕстӕдӕр багъардта. Абони дӕр ӕй хъӕбӕр хуарз гъуди кӕнун.
Цӕмӕ гæсгӕ ӕримистон аци хабар? Руслан университетмӕ бацӕуни агъоммӕ дӕр хуӕрзцӕттӕ поэт адтӕй. Уӕди уӕнгӕ, уӕдта студент уогӕй берӕ зӕрдӕмӕдзӕугӕ уадзимистӕ ниффинста мухури аккаг. Абони рӕстиуагӕй зӕгъун: аци ӕмбурдгонд ӕ рацӕунмӕ байрӕги кодта тӕккӕ минкъийдӕр инсӕй анзи. Фал уӕддӕр Хуцауӕй боз, ӕрӕгиау хуарзӕнхау…
Мӕнӕй уотӕ Руслан лирикон поэт ӕй. Хъӕбӕр раги, куд зӕгътан, уотӕ, биццеуӕй ӕ размӕ устур ихӕстӕ ӕрӕвардта. Поэзий аллихузон фӕлтӕрӕнтӕ фӕккӕнгӕй, берӕ тохӕнти фӕсте ӕппунвӕстаг ӕрцудӕй ӕхе дзурди азӕлдмӕ, ӕ зӕрди уагмӕ гæсгӕ. Курдиадӕ ӕма фӕллойни фӕрци исфӕлдиста бӕрӕг даргӕ поэтикон дуйне. Нур дигорон аййев дзурди хӕзнадони ӕ уадзимистӕ аккаг бунати ӕнцӕ. Ӕй хуӕд бундорон, еудзурдон, цӕрдӕг, сӕртӕг, арф гъудигӕнаг, дзурдбарагӕ. Мӕнӕ рагон дууадӕстӕнон фӕндури алли тӕнӕн дӕр хецӕн зӕл уогӕй, еумæйаг мелоди куд фӕлдесонцӕ, уой хузи нивӕндуй нӕ догӕ, нӕ рӕстӕги сагъӕстӕ.
Дигоронау уадзимистӕ ка финсуй, етӕ хуарз зонунцӕ, ци устур курдиадӕ имӕ ес уой, уӕдта куд кустгъон ӕй, е. Ӕ еци минеуӕг хъӕбӕр берӕ финсгутӕн дӕнцӕн бӕззуй…
Е ’мдзӕвгити тематикӕ аллихузон ӕй. Ӕхе еу унгӕг фадуати нӕ бакодта. Куд фæззӕгъунцӕ: еу синх, еу хӕдзари сагъӕс нӕ февдесуй. Фал еумӕйагӕй есуй - Адӕймаг. Уой хъисмӕтбӕл ӕнцӕ ӕ устурдӕр сагъӕстӕ.
Фӕнди уарзондзийнадӕбӕл дзора, политикӕ райса, философон гъуди ӕвдеса - ӕ дзубанди билицортӕй некӕд фæууй, фал зӕрдибунӕй, хъӕбӕр тухгин ӕнкъарӕнтӕй финст.
Дзурдӕн райсдзинан ӕмдзӕвгӕ «Ӕмбесӕхсӕвӕ дуйнетӕ…».
Ӕмбесӕхсӕвӕ дуйнетӕ
Ку ниуунцӕ къуругъос,
Ци мӕ расаис ӕндӕмӕ,
Мӕ сайтани хай, мӕйрохс?..
…Ӕма идарддӕр дӕр ӕмдзӕвгӕ цӕуй еци еу ӕлвӕст уагбӕл, итинг ӕрдунау, бауӕри хезгӕй, зӕрдӕмӕ гъаргӕй. Ӕ сайтани хай кӕмӕй зӕгъуй е, ӕнгъӕл дӕн, ӕцӕгӕй ба ӕ изӕди хай ӕй. Уӕларвмӕ’й хонуй цӕрунмӕ, рохс тунтӕ нивӕндуимӕ. Арв - адӕймаги уодибӕстӕ. Уомӕ гæсгӕ ӕносидӕр ӕ рӕсогдӕр гъудитӕ ӕрвон дуйней хӕццӕ баста. Фал, гъулӕггагӕн, лӕгӕн базур зайуй айдагъдӕр ӕ бӕлдӕбӕл. Арв ӕма зӕнхи астӕу ӕнӕкӕрон арӕн уогӕй, ниббостӕ уй ӕ сайтани хайбӕл:
Мӕ мӕгурбӕл мӕ ниууадзӕ,
Ма мин кӕнӕ зӕрдинез.
Аци зӕнхӕ, аци бӕстӕй
Уотӕ цӕуӕнтӕ нæййес…
Ӕллӕх, ӕллӕх, алли хатт дӕр аци рӕнгъитӕ кӕсгӕй, мæ бауӕр ниббизирт уй.
Ӕндӕр ӕздӕхт зиннуй еци уӕхӕн темӕбӕл дзорӕг ӕмдзӕвгӕ «Ӕз арвӕй исхунц кодтон»-и. Ӕрмӕст си нифсдӕттӕг хъаурӕ фулдӕр ес. Ӕвдесунӕн си райсӕн дууӕ рӕнгъи:
Ӕз зӕнхӕн фурт разагътон,
Арвӕн ба - ӕнсувӕр.
Ӕвзонгадӕ аргъӕутти бӕстӕ ӕй. Алкӕмӕндӕр е ’носон имисуйнаг исуй. Руслани дӕр тавуй еци доги цитгин хор:
Сагартӕн биццеутӕй хор хор бӕхтӕбӕл
Догъи уайанӕ
Арви стъалутӕ не’нгулдзитӕбӕл
Банимайанӕ.
Фал еци сугъзӕрийнӕ цӕфхатгин ӕфсоргъ ӕвзонгадӕ фур хъалхаст ӕй. Уотӕ рӕхги ӕ финдзӕй ниххуррут кӕнуй. Хуӕнхтӕ, кӕмтти ранӕруй ӕ цъӕхснаг тасӕмхӕццӕ уаст. Ӕ рагъӕй пакъуйау фесхъеуӕн ӕма ма, ӕ фӕсте кӕсгӕй, ругӕ мегъау куд исбадуй, ӕ цӕфхӕтти цӕхӕр ба Еляй цӕхӕрау куд исӕрттевуй, уой рауинӕн. Лирикон герой ӕрцӕуй уӕхӕн хатдзӕгмӕ:
…Не ’схъал ан, боцау, нӕ еци фунтӕй, -
Цӕмӕ бӕллианӕ…
Лӕги исбайлахъ, нæ мæгур зундӕй
Муд ӕнгъӕлианӕ…
Мадта гъӕууон нивтӕ кӕнунмӕ дӕр дессаги цӕстгин ӕма зӕрдӕй ӕнкъарагӕ ӕй. Мӕнӕ ӕркӕсӕн ӕмдзӕвгӕ «Фӕззигон тар изӕр»-мӕ. Алли рӕнгъи дæр си зиннуй хецӕн, цӕститӕбӕл гъазӕг фӕлгонц. Цума, ӕмдзӕвгӕ кӕсгӕй, уадзимисмӕ гӕсгӕ конд пивтӕмӕ кӕсис, уоййау. Ӕхсӕн мӕхсӕнти си ӕрхӕсдзӕнӕн еу къуар рӕнгъи:
«Ӕхсӕвгӕсау дзӕхӕрай лӕууй хуаси ласӕг»,
«Тохона - хӕдзари къариндас,
Ӕ хъуӕцӕй арви реубӕл и бийнонти
Сагъӕстӕ финсуй…».
«Нӕ тикис - къостӕ’фснайӕг».
Фӕууй ӕмдзӕвгӕ. Фӕззигон изӕри мӕтъӕйладӕ фӕддӕр ирох уй. Цӕветтонги тар лӕгӕти иссугъдӕуй цъилинга ӕма уазал дорвӕрстӕ исзиннунцӕ.
Иппӕ «гъӕуккаг» ӕмдзӕвгӕ «Ка ма кӕнуй дзол хӕдзари…», уоми автор феппайуй царди ӕндӕр рӕвгӕ.
Нӕ йамӕнтӕн - нӕ тугури,
Нӕ сарсинӕ - мисти хай…
Гъӕуи цӕргӕй нӕ мӕгури
Исгорӕт ан сабургай…
Киунуги ес уарзондзийнадӕбӕл финст ӕмдзӕвгитӕ дӕр. Ба сӕ еу кӕнӕ, зӕгъгӕ, уӕд сӕ рахонун ӕнгъезуй ӕнӕнцойнӕ зӕрди кадӕнгӕ. Царди астонӕ уарзти зӕлтӕй бид ӕй. Цардӕй уарзт рагӕлдзӕ, уӕд си, ӕвӕдзи, нецибал байзайдзӕнӕй. Уарзтӕн ӕ хуарзӕнхӕй фӕххайгин упӕн берӕ фӕрӕзнитӕ ес. Ӕрмӕст Руслани лирикон герой уарзӕгой бӕгъатӕрӕй байзайуй, кӕд алкӕд не ’снивгун уй, уӕддӕр. Ӕмдзӕвгити бастӕфӕн ӕ кӕдзос уод. Уой хæццӕ ма фӕууинӕн цитгин сӕрустурдзийнадӕ. Ӕма, куд фӕззӕгъунцӕ, фат ӕ нисанбӕл исӕмбӕлуй. Еу дзурдӕй, базонӕн, лӕг куд уарзунгъон ӕй, уой.
Аци темӕбӕл финститӕй зӕрдӕбӕл хъӕбӕрдӕр ӕмбӕлунцӕ «Ӕз дӕуӕй лигъдтӕн, ду ба мӕнмӕ цудтӕ…», «Экспромт», «Уарзтӕй дин хай нæййес»…, «Мӕ фӕндитӕ - сугур изгӕ…» ӕма ӕндӕртӕ.
Поэт ӕносидӕр рӕстиуаги фарс фæууй. Ӕ лирикон герой дӕр ӕхе хумӕтӕги нӕ хонуй «рӕстдзийнади цагъар». Еминӕ ин ӕнцӕ фӕливд, мӕнгӕттӕ дзоргутӕ.
Ӕмдзӕвгӕ «Цӕйти, ниууадзӕн нӕ мæнгӕттӕ…». Кӕсис ӕй ӕма ӕнкъарис уой, еу уӕззау уолӕвдӕй финст ке ӕй:
Ниууадзӕн нӕ мæнгӕттӕ
Нӕхуӕдтӕ!
Хорх ӕй никкӕнӕн…
Идарддӕр:
Скъунуй зӕнхи къори
Сабургай ӕ худтӕбӕл,
Ӕ къӕс-къӕс игъусуй,
Ӕй мӕнгӕттӕн уой бӕрцӕ сӕ уӕзӕ…
Ӕма хатдзӕг:
Нӕ мæнгӕтти буни
Расти бомбӕ байвӕрӕн
Зӕрди къохӕй!
Философон арф гъуди байвардта ӕмдзӕвгӕ «Царди зинтӕй мӕ гъуди хинцун», уоми. Рӕстбӕл дзоргӕй ӕрцӕуй мӕнӕ уӕхӕн гъудимӕ:
…Ӕй царди рӕстдзийнадӕ денгиз
Ку адгин, ку цӕхгун хӕлӕмулӕй…
Циргъфий науӕ ӕ хурфи - мӕ нифс,
Хатгай си ци хъӕбӕр ранигъулуй…
Адӕмон исфӕлдистадӕ - нӕ сугъзӕрийнӕ ӕвӕрӕнтӕ. Сӕрӕй есгӕ ӕма бунӕй ахедгӕ. Поэти зӕрдӕбӕл ӕхцӕуӕн ӕмбӕлд кӕнунцӕ рагон зартӕ, таурӕхътӕ, аргъӕуттӕ. Ис ӕй разӕнгард кӕнунцӕ хецӕн ӕмдзӕвгитӕ ниффинсунмӕ «Авдӕни зар», «Фур берӕ равардта» ӕма ӕндӕртӕ.
Адӕм бакастӕй куд фӕйнӕхузи ӕнцӕ, ӕвӕдзи сӕ цард, сӕ гъуддӕгтӕ дӕр уотӕ аллихузон ӕнцӕ. Еу рӕстиуагӕй цӕруй - ӕхе уодвӕллойнӕй. Иннӕ ба хӕраймадӕ кӕнуй еугур ӕхсӕнадӕн дæр. Поэт нӕ ниббухсуй еци миутӕн. Ӕмдзӕвгӕ «Цӕбӕл асдзӕгъдис, мӕ зӕрдӕ».
- Цӕбӕл агъуис, мӕ зӕрдӕ,
Цӕмӕ уотӕ дӕ тингун?
Царди тонхи мӕ цӕститӕй
Ӕгӕр алцитӕ уинун…
Ӕма фӕстагмӕ:
- Цӕмӕн ма цӕрис, мӕ зӕрдӕ,
Кӕмӕн кӕнис хе цитгип?
- Кӕмӕн ниууадзон мӕ уӕргътӕ,
Кӕмӕн ниууадзон мӕ зин?!
Куд ма ес хуӕздӕр ӕма тухгиндӕр зӕгъӕн! Нæййес фадуат еугур ӕмдзӕвгитӕбӕл бӕстон ӕрдзорунмӕ. Фал киунуги ци ӕлваст, базургин гъудитӕ исӕртастон, хецӕн ӕмдзӕвгитӕ кӕсгӕй, уонӕй еу цалдӕр ӕрхӕсдзӕнӕн:
«Лӕги дзурдтӕ хумӕ нӕ кӕнунцӕ,
…Цард аразӕг ӕнцӕ нӕ гъуддӕгтӕ»
«И бӕлӕстӕ - ӕхсинӕнтӕ,
Хӕрӕ мегъӕ сӕбӕл - цъопп».
«Ку фӕууис ни, нӕ нивӕ, идард,
Ку сойнӕй нӕ билтӕбӕл ӕртӕдзи…»
Кедӕр зӕнхи, кедӕр бӕсти
Къӕбӕрбӕл кӕнун хумӕ…
«Царди комбӕл мӕ гъуди инсун,
Царди къохӕй дӕмун мӕ сагъӕстӕ…»
«Ӕ цъумуртӕ дуйнейӕн
Цӕстисугӕй ӕхснун».
«Схезинӕ дӕ размӕ, фал мӕ ку нӕ уадзис,
Мӕ къох ракъуӕринӕ, фал ми нӕ ададзис…»
«Мӕ рӕзти уайтӕккӕ, нивау раевгъудтӕ…
Ду мин мӕ уодбӕл бӕгъӕмбадӕй бауадтӕ…»
«Нӕуӕг мӕйӕн зӕронд метбӕл
Ӕ хораууон гъосицӕг…»
«Мӕ зӕрдӕ разилдӕй дӕ билтӕбӕл…»
«Тӕнӕг ӕнгъӕл, кизгай,
Ци арф хъуми ниххаудтӕ…»
«Нӕ гъуддӕгтӕ цӕрунцӕ дивилти
Нӕ дзубзиди хуӕрзрӕвдзӕ, ездон…»
Киунуги автор кӕд карӕмӕ гӕсгӕ нурма ӕригон фӕлтӕрмӕ хӕстӕгдӕр лӕууй, уӕддӕр ӕ поэзи ба, куд фӕззӕгъунцӕ, бацудӕй ӕ лӕги кари. Аккаг къӕпхӕнмӕ исхизтӕй ӕ поэтикон дӕсниадӕ. Бӕстон зонуй литературон теори. Арӕхстгинӕй пайда кӕнуй еугур гъӕугӕ фӕрӕзнитæй. Иссеруй ӕмдзӕвги уагмӕ гӕсгӕ ритмикӕ. Ӕнахур дессаг азӕлд ес ӕ еугур уадзимистӕн дӕр. Фӕймӕ уиндзӕнӕ, ӕнгъӕл куд нæ уай, уӕхӕн цӕстӕбӕл гъазгӕ рабарститӕ. Ӕмдзӕвгити арӕзти ӕрмӕст классикон формитӕй нæ пайда кӕнуй, фал агоруй нӕуӕгдзийнӕдтӕ. Уартӕ студент уогӕй ниффинста дигоронау сонетти бид.
Уӕддӕр уотӕ загъӕн нӕййес ӕма киунугӕ бунтон ан ’аййепп рауадӕй. Еуӕй еу ӕмдзӕвгитӕ фӕццубурдӕр кӕнун ӕнгъизтæй («Авдӕни зар».) Баервазтӕй ӕмбурдгондмӕ ӕмӕнгӕс гъудитӕ:
«Минкъий корӕгӕн - ӕ фагӕ,
Берӕ корӕгӕн - минкъий!»
(25 фарс)
«Фуди берӕ ссерӕн минкъий коргӕй.
Берӕ коргӕй - амонди минкъий».
(32 фарс)
Етӕ рауадӕнцӕ автор ӕма редактори устур зӕрдӕдзийнади анхосӕй. Уогӕ мӕ аййеппитӕ айки хурфи ӕрдо бауинӕгау ӕнцӕ.
Еумӕйагӕй райсгӕй, аци ӕмдзӕвгити ӕмбурдгонд курднадгун поэти устур ӕнтӕст ӕй. Бабочити Руслан ӕй хънамӕтгӕнӕг, гъудигӕнӕг, бӕрзонд поэзи фӕлдесӕг. Дигорон поэзиуарзгутӕ ӕцӕгӕй кӕмӕ ӕнгъӕл кӕсунцӕ, уонӕй.
Руслан, уодфедар уо. Ӕмраст цо, лигъз надмӕ ма рахезӕ. Амӕй фӕстӕмӕ дӕр, дӕ дзурд кард уӕд, гӕгъӕди ба - кӕрдбадзӕ!
Амурхан Къибирти
