Дзагурти Дигорхан.
Уазай рӕсугъд.
Арви айдӕнӕ ӕрттевгӕйУазай цъопп исӕвзурста:
Куд рӕсугъд дӕ,хуӕнхти кизгӕ!
Мӕ уод дин аккаг феста...
Рӕстӕг цӕуй,хӕлттӕ 'лвесгӕ,
Ӕлхуйнӕбӕл - царди над,
Хуӕнхти кизгӕ,Уазӕй рӕсугъд
Уарзти гьарӕй- боцӕй дард.
Мӕ зӕрдӕ дин,тӕмӕн калгӕй,
Дӕ къӕхтӕмӕ 'сивӕрдзӕн,
Дӕ рохс цӕсгон,реуи даргӕй,
Цардӕй аргъау искӕндзӕн!
Мӕйи рохсӕй тар изӕрти
Уарзгӕй кӕссӕнӕн дӕумӕ,
Ирд стъалутӕй дӕ къахфӕндаг
Исараззӕнӕ мӕнмӕ!
Думги хъаурӕй цӕугӕ дӕнттӕ
Искӕндзӕнӕн минӕвар,
Ме 'гас уод дин хори гъарӕй
Бакӕндзӕнӕн ӕз лӕвар...
Арви айдӕнӕ,ӕрттевгӕй,
Уазай цъопп исӕвзурста,
Дорти федар ин ӕ уарзтӕй
Дидингутӕ исуагъта...
Уазцирагъ.
Уарзти ковӕндони содзуйУацӕрохс цирагъ тӕмӕн,
Ӕ цӕрайӕй,ӕ фӕлдистӕй
Хуасинӕ ӕйӕй кемӕн.
Уоди фӕлдзох идзаг кӕнун-
Ӕ ерисхӕ,ӕ уӕлвонг,
Ӕ тайунӕй рохс ахедуй,
Кӕнуй си дуйне ӕрвонг.
Нӕй фӕзгъери,хӕлин цӕфсуй,
Ӕ фӕлгӕт - налмаз ӕрттивд,
Ӕ фӕдзӕл мони фӕдгаг ӕй,
Ӕ адзал - мӕнгӕ,фӕлдивд.
Курдиадӕ.
Бонивайӕн йе 'хсир ӕрбакалдта,-
Арви ицӕг тар фунӕй ӕдас.
Раги уа-ӕрӕги мегъти хъумуз
Исараззӕй хезнӕбӕл къӕрцгъаст.
Зӕрин хор лӕфийнӕ ку истаха,
Ӕ фӕндур уӕлиӕуттӕй ку зӕла,-
Сердзӕнцӕ, гупп кӕнгӕй, нӕ къӕдзӕхтӕ,
Нӕуӕг киндзау син ӕнос лӕууа.
Бауайсадӕ, рӕстӕг, уорссӕр тегътӕн,
Дӕ сасугӕн ӕфсар уа талас,
Дзиллитӕн дӕ хуарззӕнхӕ ахедӕ,
Ӕфидбилиз дӕ ун ма де'нгас.
Кӕдмӕ Хуцау зӕгьӕн, кӕдмӕ ковӕн,
Нӕ дин - иман ма зонӕд цъола,
Диндара нӕ монӕн уӕд баредзӕ,
Байауодӕ ,кӕнӕ нӕ цӕра.
Мӕйи уайдзӕф.
Мӕйӕ бӕрзонд стъалу арвӕй,Ходгӕй, цӕстӕ 'рникъулдта,
Хуӕрзконд кизгӕй кедӕр реуи
Уарзти цӕхӕр бакалдта.
Тунтӕ уафдзӕй,зингӕй соддзӕй
Федар реуи уарзти хор,
Кӕддӕр адтӕй аци лӕхъуӕн
Зӕрди хаттӕй - къӕйнаг дор.
Нур ӕй зондзӕй,ӕнӕмӕнгӕй,
Уарзтӕй расуг ку кӕна,
Мӕйхуз кизги цӕсти 'нгасӕй
Къӕхтӕ къуӕргӕ ку цӕуа,
'Сдзурд игъосгӕй зӕрдӕ кӕндзӕй
Алли 'суолӕфтӕн ӕрдзӕф,
Уарзти дзӕгӕргути тӕфӕй
Рӕсог уодзӕнӕй уӕлдӕф.
-Уарзис,реудор,рӕсугъд кизги?
Гирццӕ мӕйӕ рафарста,
Уарзон кизги фурӕнгӕсӕй
Ӕхе арвӕй равдиста.
-Берӕ рӕстӕг,цард нӕ хъӕртгӕй,
Ӕнӕ уарзтӕй рарвистай,
Куд ӕнгъалдтай,къӕлӕтӕрфуг,
Хуарзӕй хуӕрзтӕ ӕвзурстай?
Рӕстӕг тӕхуй,бӕнттӕ давгӕй,
Ци фӕнди ку уай къӕйдор,-
Еу уӕхӕни'й бамбардзӕнӕ,
Куд неци'й дӕ зӕрди дор...
Уарзти уӕлдӕф.
Ка уи адтӕй арви хузӕн,
Цьӕхӕй ирддӕр,ма кӕдзос,
Ке уи реуи тар изӕрти
Адтӕй стъалутӕн мӕйрохс?
Дони 'ртӕхтӕй уи ка 'фсастӕй,
Хор сурх зингӕй ку сугъта,
Цӕсти никъулдмӕ дуйнетӕ
Идзаг армӕй ка игъта?
Ке бӕлдити уи фур цийнӕй
Цагьдта уалдзигон фӕндур,
Тӕккӕ рӕсугъддӕр бунатӕй
Кӕмӕ кастӕй цъӕх будур?
Дидингутӕ фуни уингӕй
Ка син ахӕста сӕ тӕф,
Йе гъӕуама,ӕнӕмӕнгӕ,
Бамбара уарзти уӕлдӕф...
Ме 'вдесӕн.
Зӕрдӕ,ду ме 'вдесӕн,Мӕ зин,ма мӕ цийнӕн,
Мӕ ахсгиаг гъудитӕ
Фӕдзӕхсун ӕз дӕуӕн.
Дӕуӕй уӕларвон зӕлтау
Мӕ зарун агорун,
Дӕуӕй фӕндури гъестау
Мӕ мӕтӕ расорун.
Мӕ уарунти,мӕ хорти
Мӕ зӕрдӕ,ду ме 'мбал,
Дӕ рист,дӕ фӕллад гуппӕн
Нӕ бухсун ӕз,нӕбал...
Мӕ уарзт,мӕ рохс бӕлдитӕ
Не 'фхуӕрис,нӕ сӕттис,
Ӕносмӕ царди хъаурӕ
Ме 'уӕнгтӕн ду дӕттис.
Мӕ зӕрдӕ,ду ме 'вдесӕн
Мӕ раст,ма мӕ фудӕн,
Дӕуӕй,Хуцаумӕ ковгӕй,
Рӕсог донау ӕдӕн...
Нӕ ӕзинӕ
Зӕронд зӕна мӕтъӕлдзаст ӕй.
Нидӕн инӕфт искӕнгӕй,
Ӕримисуй рагон бӕнттӕ -
Ӕ тала ма рӕутас ӕй.
Куд никкизгӕ 'нцӕ бӕлӕстӕ,
Сӕ тъулин ма ӕгӕрон...
Симди зелгӕй цӕнгӕринттӕ
Рӕу калдтонцӕ,дзӕнгӕргӕй.
Къӕс-къӕс кодта сӕ тӕмӕнӕй
Сӕумӕй изӕрмӕ уӕлдӕф,
Арви цӕстӕ си не 'фсастӕй,
Сӕ риуӕн кодта ӕрдзӕф.
Дзӕгӕргути ес-бес хӕсгӕй
Дунгӕ едӕгтӕн кувта:
Уӕ зӕрийнӕ,уӕ фӕлвӕра,
Ӕнӕкӕрон уӕ цӕра!
Ци дирзӕг дӕ,нивхуар рӕстӕг,
Ӕййевдзи дин куд нӕййес!
Ӕбони дӕр мӕ медзӕрдӕ
Рӕуӕг тасӕ ӕй мӕ уес...
Фӕсмон
Мӕ тар сагъӕсти сау бӕхтӕИзӕр хӕссунцӕ зӕрдӕн.
Аци царди нӕ бӕллӕхтӕ
Ӕнӕ 'ргъудийӕй кӕрдӕн.
Гъӕйт кӕнӕн исмаст кӕнунмӕ,
Рӕстаг ба зелуй ӕ цалх...
Ма,ку ракӕсай фӕстӕмӕ,-
Фӕсмонӕй идзаг дӕ рагъ!
Ци'й рӕстӕг ба?
Уотид ругӕ!...
Ни'й хӕлеу кӕндзӕй думги...
Фал,куд зин ӕй,еудадзугӕй,
Цард рарветун ӕ бунти!..
Цал уолӕфти,уӕззау гуппи
Искӕнуй дӕ фӕллад реу,
Царди медӕгӕ дӕ нӕдтӕй
Ку нӕ фӕббӕзза сӕ еу?..
...Уайгӕ догъи,тар сагъӕстӕ,
Кӕд бафехсуйа уӕ над!...
Къахӕй сӕрмӕ уин уӕ уӕзӕй
Адӕймаг ниууй фӕллад...
фото Михаила Ткаченко.
Сафарби
Къаппӕ-къуппӕ ӕрӕмпурста
Гъурна тикиси фӕлмӕн,
Зӕлди реубӕл ӕрминӕг ӕй
Зӕри фӕллад Сафарӕн.
Нур ӕ фунти тукуна йӕй,
Бокуна ма хори тун,
Тург дӕр йибӕл неке кӕнуй,
Ӕ фудаг дӕр - ходунӕн.
Рӕхцӕ-рӕхцӕ,зӕронд тикис,
Уасӕг фунӕй - ӕгӕрон,
Пеци рӕбун,гъар тъӕрӕбӕл
Бонуоддӕртӕ дӕ кӕрон...
Хуӕрифурттӕ.
Туртунатӕй,къӕлуппатӕйИдзаг хӕдзари гъӕбес,
Хуӕрифурттӕй ниббедау ӕй
Фӕрнугадӕ ма циййес!
Цӕгиндзитӕй ирӕзунцӕ,
Ӕндозунцӕ нӕ бундор,
Ка цӕра,- ӕвдесӕн уодзӕй,
Куд пака кӕндзӕй се 'сон...
Нӕ ахилӕн,нивтӕ 'лвесгӕ,
Сӕ исуйнаг бӕрӕг ӕй,
Кӕдмӕ къӕсӕр - къайнифедар
Зӕгӕлӕй нӕ,фал лӕгӕй!
