Бузойти Кермен. Стихи.

Бузоев Кермен Тохович был родом из с. Ахсау. До начала войны, его стихи часто публиковали в газетах и журналах. Кермен родился в 1921 году. Когда ему было 9 лет, его семья переехала в с. Сурх-Дигора. Там Кермен окончил среднюю школу. В 1938 году он поступил в Северо-Осетинский педагогический колледж на исторический факультет. В апреле 1941 года его призвали в ряды Красной Армии. Семья получила последнее письмо от Кермена 9 сентября 1941 года.



Æхсæйвон арв

Гъолон мегътæ иуæлхуæнхти
Фæббурунцæ пъæстугай,
Æрхи мæйæ сæ æхсæнти
Гъузуй, лæсуй сабургай.

Æ нидæн рохс мæрдивадæй
Йе дуйнебæл рæдзæхсуй,
Хуæнхтæ, гъæдтæ ма будуртæ
Æ сайд тунтæй йе æхснуй.

Нæ зиннунцæ и уæлмегътæй
Ирд æстъæлфитæ дзæбæх,
Æ фæндагбæл размæ ледзгæй
Нæ æстæфуй сæ мæ бæх…
1940 анз.



Талинги

Талингæ тар мегъти
Сау хуæнхти циргъитæ
Таунцæ римæхсгæ сæхе.
Зиннуй ма се 'хсæнæй
Лæнцауи æнгæсмæ
Æносон цъæх айнæг цъете.
Цауæйнон риндзæбæл.
Сау лæгæти дуармæ
Цæхæрбæл фезонæг кæнуй.
Дæлайнæг бæрзбунæй
Саугурм уг бæласæй
Истугмæ хебари кæуй…
Ирæфæн æ дзæфхъу
Изæйрон уадусмæ
Æрдзæбæл изолмæ хæссуй…
Фиййаутæн сæ куйтæ
И 'ндзæрæй рæйунцæ,
Се згули уæлхæрдмæ цæуй…
1940



Тæходуй, Къоста!

Тæходуй, Къоста, ку игъусидæ
Мæ уйни гъæлæс дæ сау ингæнмæ!
Фæццæуинæ уæд æнæзийнадæ
Дæ цирти гъосмæ нигъгъæр кæнунмæ.

Нигъгъæр кæнинæ: «Мæ уарзон Къоста,
Исæнхæст æнцæ дæ рохс фæндитæ!
Ку лæдæрисæ, тæходуй æма
Куд идзулд æнцæ нæ царди бæнттæ!

Тæходуй, Къоста, ку нин зонисæ
Ни цийни догæ, нæ деси заман,
Дæ унгæг циртмæ ку игъосисæ
Цагъари царди мах ке нæбал ан!

Кавкази хуæнхтæ рæхисти гъæрæй
Исуæгъдæ æнцæ. Нæбал си цæуй
Мæгур адæмæн се ‘носи гъæрзун!
И седзæргæс дæр нæбал си кæуй.

Берæ 'нзти фæсте дæ мæгур зæрдæ
Æрхун-инæфтæй исуæгъдæ уидæ,
Адæми тухæй дæ сау цæститæй
Дæ цæстисуг уæд нæбал тæдзидæ!
1939



Æхсæвæ медхонхи

Æхсæйвон мæйæ цъæх арвæй
Ивадхузæй идзулдæй.
Бæрæг адтæй фуридардæй
Йе уæлхуæнтæ ку тулдæй.

Æ нидæнрохс нæ бæстæмæ
Ниванста йе æнæ фау,
Æстъалутæ æ фæрстæмæ
Æрттивтонцæ цæхæрау.

Мæ фалдзоси дæр и хуæнхтæ
Бæрæг æнцæ æ рохсæй.
Зиннуй форд дæр нæ дæлбилтæ
И мæйрохсмæ фæлорсæй.

Зур-зур кæнгæ далæ коми
Йе будурмæ ку тундзуй,
Æ гъæр нæмæ и уадусмæ
Медæхсæвæ исхæссуй.

Æ билгони нæ Ирæфæн
Колхозон гъæу æрхустæй,
Кæцæйдæр ма фæсевæдæн
Сæ æрдзæфгъæр игъустæй.

Фæндури гъæр мæ гъостæбæл
Æрнидзæфсуй хаттæй-хатт,
Ма мæ зæрдæ нæ фæллæууй
Хебæраги уæд æнцад.

Рохс гъудитæ мæ мед сæри
Фæззелунцæ кезугай –
Раст цалинмæ и уæлиндзи
Æрфунæй ун сабургай.

И мæйæ дæр рохс мæ сæрмæ
Æнæцохæй нивæндуй,
Цæветтоигæй сабур æрдзи
Ести зæгъун æрфæндуй…
1938



Уалдзигон сæумæ

Ци зæрдæйесгæй уалдзигон сæумæ!
Ци ма уодзæнæй уомæй дзæбæхдæр!
Ку рафæлгæсун рæсугъд æрдзæмæ,
Деденæг уингæй идзулун æз дæр.

Арви кæронæй æ фæлмæн тунтæ,
Сугъзæрийнау хор ку иснивæндуй,
Мæргъти зарунгъæр нæ гъæдрæбунти
Алли æвзагæй низзæлланг кæнуй.

Сæнт-сурх дзæгæрæг бæласи сæрбæл
И хори тунтæй зингау æрттевуй.
Колхозон фиййау и цъæх зæлдæбæл
Зæрдигъæлдзæгæй æ дзогæ хезуй.

Урух будурæ æфсæн бæхи гъæр
Кæдзос уæлдæфи идардмæ цæуй.
И арф комæй ин нæ цурд Ирæф дæр,
Размæ æхсæндгæй ниффæрсаг кæнуй.
1939