АЛАНТИ НАНА
Нифсдæттæг трагеди
Дууæ архайди æма авд фæззинди
Хъайтар - Алайнаг æфсади балхонтæй
Хорческæ -æ уарзон
Т и м у р — эмир
Ю с у п-х а н - Тимури æфсади хестæртæй
Т а з а р - Хорчески æнсувæр
Будзула - цауæйнон
X ъ а р а-С а у
Б а х о р - иуазгутæ
Б а з у г - 15-анздзуд
А ц æ - 12-анздзуд
О р а з - 1О-анздзуд
С а у-С а т æ г - 14-анздзуд
Е с т а р - 12-анздзуд
Б а с е т - 1О анздзуд
Г а г а - 6-7-анздзуд
1-агуосæ
2-аг уосæ
3-аг уосæ
4-аг уосæ
Тугъдонтæ, фæсевæд, сувæллæнтгæ, нукертæ.
Архайд цæуй XIV æноси кæрон æма ХУ-аг æноси райдайæни.
ФИЦЦАГ АРХАЙД
Фиццаг фæззинд
Кæсæн зали рохс æрминæг æй. Оркестри цагъди игъусуй гъарæнгæ, богъ-богъ. Байгон æй устур æмбæрзæн. Гъазæн æмбæрзæнбæл сабургай лæсунцæ сау мегътæ. Хæстæгæй-хæстæгдæр кæнуй бæхгин æфсади унæр, тох, адæми хъæлæба, сонт гъæртæ: «Маргæ! Тох! Мæлæт!», тарст фæдес, æнхъерæнтæ, æлгъиститæ, цæфти гъæрзун, еуæй-еу хатт - бæхти мур-мур, уæртити гуппитæ, церхъити зæлланг æма цъинггитæ, сувæллæнтти кæун. Истухгин æнцæ устур тугъди гæбар-губур æма музыкæ, уæдта æвеппайди фескъудæнцæ. Æрмæст ма айдагъ еунæг гъæлæс гъарæнгæгæнæгау дæргъвæтин зард кæнуй. Фæззиндтæнцæ силгоймæгтæ сау дарæси, бæгъæнсарæй, цæунцæ сæ сæртæ
ма сæ уæргутæ хуайгæй.
1-а г у о с æ. Тогуарæн никкодта, тогуарæн, хуарз адæм! О мæ бон!
И н н е т æ (еумæ). О сау бон, сæрисæфти бон! О сау бон, сæрисæфти бон!
2-а г у о с æ. О, тухгин æма сæрустур алантæ, хуæрз бун ку бацайтæ, лæгæй-лæг хуæздæрæй, о мæ бон!
И н н е т æ. О сау бон, сæрисæфти бон! О сау бон, сæрисæфти бон!
3-а г у о с æ. Уæ уарзон хъæболтæн, æфсæнцъух берæгътæ сæ тог ниуазунцæ, ой! Сау халæнттæ син æнæнигæдæй сæ цæститæ къахунцæ, ой!
И н н е т æ. О сау бон, сæрисæфти бон! О сау бон, сæрисæфти бон!
4-а г у о с æ. Арв сæбæл неуй, зæнхæ дзиназуй, ой! Сумах дæр никкотæ, хуарз адæм, никкотæ, ой, мæ бон!
И н н е т æ. О сау бон, сæрисæфти бон! О сау бон, сæрисæфти бон!
1-а г у о с æ (æ цæнгтæ арвмæ ивазгæй). Ци дин кодтан, Хуцау?! Цæмæн нæ ралгъистай? Цæмæн исафис аланти муггаг?!
Арв ферттивта æма ниггур-гур кодта.
Г ъ æ л æ с. Кæрæдзебæл нæ хуæцетæ!
Азæлгæ рандæй «Нæ хуæцетæ...» Идарддæрæй «Хуæцетæ». Оркестри тухгин аккорд. Силгоймæгтæ фæййаууон æнцæ. Байгон æй дуккаг æмбæрзæн. Фæррохсдæр æй.
Разиндтæй фæстугъди æверхъау будур. Идард кæмидæр содзунцæ гъæутæ, гъæдтæ. Сæ фæсте хъуæцæ æма мегъи аууонæй фæззинунцæ хуæнхтæ. Бустæги хæстæг - цæфтæ, мæрдтæ, æрдæгсугъд бæлæстæ... Еу рауæнмæ рохси цъиртг фæккомкоммæй æма си базмалдæй цæф тугъдон, туххæй рабадтæй æма разиндтæй Хъайтар, æ сæри тог кæлуй.
X ъ а й т а р. Нæ-æ! Сæргубурæй нæ фæиндзинайтæ мах! Некæд! Мæлгæй дæр нæ! (Кæсуй аллирдæмæ.) Цитæ нин бакодтонцæ! Цæмæн? (Кæмæдæр фæккомкоммæй.) Е бабæй ци... У-у, тогмондаг сирдтæ, нæма бафсастайтæ?! Æрбацæуй! Рауай, рауай! (Фат æрцæттæ кодта.) Дæу фагæ ма уæддæр дæн!
Æрбазиндтæй сау æндарг.
Æ н д а р г. Кæми уа, мадта? Адирдигæй ку адтæй? Кæсгæ имæ ку кодтон, се ’хсæнти размæ куд лæгæрста, уомæ... Æ мард ма ин уæддæр ку фæуидтайнæ, Хуцау!
X ъ а й т а р (гъæр имæ кæнуй). У-у, сау халон, мæрдтæмæ деголæ кæнис? (Фæймæ гъавта).
Æ н д а р г (сонт гъæр). Ма фехсæ! Æз дæн!
X ъ а й т а р. Хорческæ!
Х о р ч е с к æ. Хъайтар! (Баймæ уадæй.) Æгас дæ?! Мæ зинаргъ! Мæхе Хъайтар! (Рæвдауй æй.) Фæйнæгфарс дæ ку худтонцæ... Куд син бакумдтай?
X ъ а й т а р. Бæргæ сæ фæккарстон, фал æгæр берæ адтæнцæ. Уæдта син нæхе ’рдигæй дæр хъозонтæ фæцæй. (Æхе исивазта.) Уæйæгæнæг куйтæ! Ехх, уони... сæ бунат зиндони!..
Х о р ч е с к æ. Сабур, сабур! Тæссаг æй ами тæккæ фæндаггæрон. Хæстæг æнцæ нурма... Цæуæн ардигæй... Дæхе бааууон кæнæ!
X ъ а й т а р. Цæугæ? Нæ, Хорческæ, ледзун ахур нæ дæн! Хорческæ. Ледзгæ цæмæн? Æрмæстдæр, цалинмæ дæ къæхтæбæл ислæууай...
X ъ а й т а р. Нæбал ес къæхтæ, мæ уæргутæ мин нимморæ кодтонцæ!
Х о р ч е с к æ. Æверхъау миуæ!
X ъ а й т а р. Сæ уарзон миуæ! Тсс! Кадæр фæззиндтæй!
1-а г у о с æ (рацудæй). Хъиамæти бон искодта! Дуйне исæфуй! Дуйне бабунæй! Фал, барæнтæ, агъуд берæгътæ!
(Кæмæдæр æвзедуй, рандæй).
Б а з у г (æ фæдбæл ласуй Естари). Тагъддæр! Фезмæлæ тагъддæр, кизгæ!
X ъ а й т а р. Биццеу! Барæнтæ, кизгæ!
Б æ з у г. Нæ, нæ! (Фæлледзунцæ.)
2-а г у о с æ (фæззиндтæй, æ гъæбеси сувæллон). Сау халæнттæ! Сау халæнттæ! (Рандæй).
Х о р ч е с к æ. Бабун æнцæ адæм! Уæ, Хуцау, батæрегъæд кæнæ! Гъæйдæ цæуæн ести амалæй!
X ъ а й т а р. Фæйнæгфарс Хъайтар гъæуама тугъди будури исеса æ уод!
3-а г у о с æ (рацудæй сувæллони къохбæл хуæцгæ). Ма тæрсæ, ма тæрсæ, мæ къона, нæбал нæ иссердзæнæнцæ! Цæуæн! (Рандæй).
Х о р ч е с к æ. Мадта уæд æз дæр дæ хæццæ... дæ фарсмæ уодзæнæн!
X ъ а й т а р. Нæ! Дæуæн æндæр æй де ’ихæс... Дзæбæх мæмæ байгъосæ. Мæнæн... мæ цард фæцæй, фал ду...
Х о р ч е с к æ. Нæ фæцæй, нæ! Уæд æз дæр гъæуама...
X ъ а й т а р. Ду гъæуама рандæ уай... (Хорческæ цидæр исцæйдзурдта.) Барæнæ, бамæ уадзæ... бери фагæ нæбал дæн... æз...
Х о р ч е с к æ. Æма æз ба?
X ъ а й т а р. Ду ба... ду гъæуама рандæ уай! Æрмæст еунæгæй нæ! Сувæллæнттæ!.. Æрттити сæ фæккалдтонцæ! Ка ма си раервазтæй, етæ ба тарстæй, æвæгæсæгæй ниххæлеу æнцæ, исæфунцæ, алирдæмæ ледзунцæ... Æрсæ ’мбурд кæнæ! Хуæнхтæмæ сæ кæнгæ! Басæ римæхсæ!
Х о р ч е с к æ. Ци син кæндзæнæн?! Силгоймаг дæн, Хъайтар!
X ъ а й т а р. Дæ хъаурæ дæр гъеууой медæгæ ’й! Уони гъæуй мадæ! Ма бауадзæ исæскъунун Аланти уедагæ! Гъæуама ма фæууæн нæ фудголти фæндæуагæ! Гъæуама фæййервæзонцæ! Игъосис, Хорческæ! Етæ ’нцæ нæ федæн! Уонæй бабæй райдайдзæнæй нæ муггаг! Нæуæгæй райгас уодзæй
нæ бæстæ! Етæ ’нцæ нæ нифс, нæ исомбони хъаурæ æма гъæуама зононцæ сæ фиддæлти нæргæ кадæ! Уæдта син гъæуама зононцæ сæ кæуйнаг фесæфт! Цæмæн? Æмвæндæ, зæгъгæ, на ’дтæнцæ, æмзунд... Ехх, барæн... мæ сæр... барæнæ, мæлæт... Ци фæдтæ, Хорческæ... Мæ цæститæ... Зæгъдзæнæ син... Гъæуай, зæгъæ кæнтæ фидибæстæ... сæребарæ... лæги ном... балæдæрдтæ, Хорческæ?!
Х о р ч е с к æ. Балæдæрдтæн, Хъайтар:
— Фидибæстæ, сæребарæ, лæги ном!
X ъ а й т а р. Ду уодзæнæ уæлæбæл... мæ зунд, мæ нифс, мæ кадæ... Ард, ард бахуæрæ... мæ фæдзæхст мин ке... (Идардæй игъусуй æма хæстæгдæр кæнуй гъæр: «Эмир, Эмир!» Байгъуста.) Æрбацæунцæ! (Еуварсæрдæмæ.) Цæй рæуаги æй рарветон (Хорческæн.) Дон! Цо, дон мин райагорæ!
Х о р ч е с к æ. Нуртæккæ раердзæнæн! (Фæййаууон æй.)
X ъ а й т а р. Мæ кард! (Церхъ æрцæттæ кодта.)
Æрбахæстæг æй бæхти къæхти гъæр. Фæгъгъос æй. Фæззиндтæнцæ дууæ нукери, уæдта Ю с у п-Х а н. Аллирдæмæ рагъæуай кодта, æ зонгутæбæл æрхаудтæй. Рацудæй Т и м у р.
Ю с у п - Х а н. О ханти-хан! О дун-дуйнети Бардар! Гъе ба дин фæстугъд Аланти æфсæдти будур, æ фæйинун дæ ку фæндæ адтæй!
Т и м у р (æдзинæг никкастæй ханмæ). Аланти æфсади, зæгъис?
Ю с у п - Х а н. О кадгин эмир! О паддзæхти паддзах! Ниххатир кæнæ дæ цагъайрагæн. Фæррæдудтæн! Мæрдти будур! Аланти æфсад нæбал ес! Байззадæй ма си æрмæстдæр мæрдтæ... Халæнттæ æма стонг берæгътæн хуали.
X ъ а й т а р. Саис, сау халон! Ка загъта, нæбал æнцæ алантæ? Ка загъта, сæ тоги ферхуæстæнцæ алантæ?! Нæ! Алантæ æнцæ æма уодзæнæнцæ!
Т и м у р. Ка дæ ду?
X ъ а й т а р. Алайнаг!
Юсуп-Хан. Сæ сæрдартæй, нæ кадгин эмир. Махæр-дигонау — мингбаши Кайтар.
Тимури амундмæ гæсгæ ин радавтонцæ тохгæ къæлæтгин.
Т и м у р (æрбадтæй. Æ дууæ фарсемæ æрлсеудтæнцæ дууæ нукери æд арцитæ). Тохгæ дæ фæуидтон абони. Тугъди будур, тугъдон лæгтæ, тугъдон цубур дзубанди. Рацо мæнмæ æма уодзæнæ ме ’фсади устурдæр балхонтæй еу. Устур бунат, устур хæзнатæ, устур кадæ!
X ъ а й т а р. Гъо, адта, хъæбæр «кадæ»: агъуд берæгъти балхонгутæй еу! Æз дæр дæуау æнагъом сабити арцитæбæл есон? Уорссæр мадтæлтæ æма уорсрехæ фиддæлти фусти ’вгарст кæнон?
Т и м у р. Рæдуд миуæ, рæдуд дзурд! Æз æнхæст кæнун уæлæрвти унаффæ! Сумахмæ ба исмæстгун æй Аллах! Е мæн исаккаг кодта дун-дуйнети еунæг сæрдарæй, æма хуæцæнгæрзтæ куд исистайтæ уæ бардарæги нихмæ?! Нæ-æ, пахампармæ ка нæ байгъуста, еци адæмтæн цæруни барæ нæййес!
X ъ а й т а р. Мах игъосæн æрмæст дæр нæ еунæг Хуцаумæ!
Т и м у р. Цæй Хуцау уин ес? Зæнхæбæл ес еунæг Хуцау — Аллах! Æма уой ба нæ гъæуетæ! Уомæн æма неци айтæ: золкъитæ, хъæбузатæ, мулдзугутæ, ругæ! Сумах мæнмæ гъæуама ковгæ кæнайтæ!
X ъ а й т а р. Ковгæ? Дæумæ? Нæ-æ! Дæ мæлæтмæ — гъо!
Т и м у р. Игъосай, алайнаг! Хуарз æй ку зонис, мæ дзурд нæ - ме ’нгулдзи фезмæлд — æма нæбал ес сахартæ, гъæутæ, æгас адæмтæ... Уæд мæнмæ ду ба куд æндеуис уотæ?
X ъ а й т а р. Бæргæ дæмæ бандеуинæ лæгæй-лæгмæ тохи... Ехх! Нæ, фалæ-ма райсæ дæ кард æма рацо, къулух берæгъ, хæстæгдæр мæ размæ!
Т и м у р. Мæ зæрдæмæ никкидæр хъæбæрдæр цæуис. Рагæй бæлдтæн дæу хузæн лæги фæууиндмæ, «къулух берæгъæн» рæстдзийнадæ ка зæгъа, «дуйнети тиранæн» æ цæсгоммæ æргом ка бакæса. Бафæлладтæн коммæгæс, мадзора цæсгæмттæй, губур фæсонтæ æма мæнгард къелæстæртæй... Хийнæ ’ма козбау, æлхæд æма уæййаг — сегас дæр уодхæссæг æнцæ!
X ъ а й т а р. Игъосæ, мадта рæстдзийнадæмæ, кæфхъундар! Дæхе саис «хъæбузатæй», «ругтæй»... Хъазар дин рауадæй мах хæццæ фембалд! Берæ ниууагътай дæ тогцъух сирдтæй! Фал уæддæр уæлахез ба нæ дæ! Ду нæ æрмæстдæр цæгъдгæ никкодтай, фал нин нæ басастай нæ уодтæ! Нæ нин æркъолæ кодтай нæ сæртæ! Нæ нин ес басæттæн, цалинмæ ма ни еунæгдæр æгас уа, уæдмæ!
Т и м у р. Нæбал! Нæбал уи уодзæнæй еунæгдæр æгас! Гъæуама уин тоги цади фæккалон уæ байззæдтæгти. Юсуп-хан! Зæгъæ мæ бæхгин чæгæтайтæн: бундзагъд! Силæй, нæлæй, сувæллонæй, зæрондæй! Зæнхæбæл алайнаг тæф дæр куд некæмибал байззайа, уотæ! Æндзаргæ, содзгæ! Дорбæл дор нæ - æрмæстдæр фунук! Техалугдæр нæбал — æрмæстдæр сугъд будур!
X ъ а й т а р. О, уодесгутæ, хæссетæ мæ тагъддæр! Мæ бон нæбал æй аци æлгъист лæгмартæмæ кæсун!
Т и м у р. Дæ сæр æгæр бæрзæндти хæссис æма й гъæуама æркъолæ кæнай нуртæккæ! Дæ зонгутæбæл!
X ъ а й т а р. Некæд! Фæлтау зиндони арт хуæздæр!
Т и м у р (Юсуп-Ханæн). Устур лæги фæндон æнхæст кæнун гъæуй! Зиндони арт коруй!
Юсуп-Хан ниллæг ковгæй æрзонуг кодта, æ къох æ зæрдæбæл февардта, кард фелваста, Хъайтармæ фæрраст æй.
Барæн! Тагъд мæлæт - æнцон мæлæт, даргъ мæлæт - гъезæмарæ - мæлæт. Байбæдтæ æнæбадт æма фудаг байраги думæгмæ. Уæдта мæмæ æрхæссетæ æ сæр! (Исистадæй).
Юсуп-Хан бацудæй Хъайтармæ. Е ин æнæнгъæлти æ кард фелвæста ама а æхе рарæхуста.
Т и м у р. У-у, шайтан! Байсодзетæ! Фунук дæр си куд нæбал байзайа!
Нукертæ Хъайтари фæххæр-хæр кæнунцæ.
Х о р ч е с к æ. (рагæпп кодта сæ размæ, фелваста Хъайтари церхъ). Нæ! Нæ уин æй ратдзæнæн! Еумæ нæ рамаретæ фалтау!
Т и м у р. Æмбесонди рæсугъд! (Юсуп-Ханмæ.) Мæ цатири федауцæн бæззуй! (Кизгæн). Рамардзинан! Æнæмæнгæ! Ай-гъай! Дæ кадгин эмири, уæлахезхæссæгæн куд æмбæлуй, уотæ ку нæ барæвдауай, уæд!
Райамудта Юсуп-Ханæн, е дæр кизгæмæ фæрраст æй.
Х о р ч е с к æ. Некæд! (Церхъ фæхъхъел кодта).
Т и м у р (Юсупæн). Барæнæ! (Хорнескæн.) Нифсгун дæ, алайнаг. Уотæ бакæнæн мадта: нæ федауй кард дæ фæлмæн къохти. Фал æй кæми райстай, уоми ба равзарæ... кæд гъуддаги дæр уотæ тухгин дæ, уæд уодзæнæ хъæбæр хæстæг мæнмæ. Фал састи бунати байзадтæ, уæдта... раддзæнæн дæ мæ
чагатайтæн! О! Берæ ’нцæ, силæмондаг, мæстгун... (Юсуп-Ханæн.) Еу тугъдон!
Юсуп-Хан (фæссценæмæ). Еу тугъдон! (Æрбацудæй еу тугъдон.) Мæлæт! (Кизгæмæ амонгæй).
Тугъдон æ сæрæй æркувта, уæдта кард фелваста æма Хорчески хæццæ тохун райдæдта. Игъусуй аллирдигæй хъæлæба. Кæми сæ еу фæццæй уæлахез кæнуй, кæми ба иннæ. Кæронмæ ба тугъдон æрхаудтæй.
Т и м у р (фестадæй). Шайтан! (Цидæр исцæйдзурдта.)
Х о р ч е с к æ. Дзурд равардтай, эмир!
Т и м у р (паузи фæсте). О, равардтон! Æма фæндараст! Æрмæст абони! Исон ба 'й иссеретæ, кæми фæндуй ку ри- мæхса, уæддæр æма мæ цатирмæ! (Цæхгæр фæззилдæй æма рандæй.)
Иннетæ рандæнцæ æ фæсте. Æрбайгъустæй берæ бæхти къæхти гъæр æма уайтагъд райдард æй. Хорческæ сабургай æ бунати æрбадтæй, еу рæстæ гъудитæбæл фæцæй, уæдта цидæр æримиста, фæууадæй, Хъайтари кумæ фæлластонцæ, еци ’рдæмæ.
Х о р ч е с к æ (гъæрзæгау никкодта). Хъайтар! (Паузи фæсте.) Раймардтонцæ! Нецибал мин ес аци дуйнебæл! Ци ма ’й мæ цард? Цагъайрагæй? Кæмæндæр гъазæн гъолæй? Нæ-æ, фæлтау... (Æрбайгъустæй сувæллони кæун.) О, фал сувæллæнттæ... Уотæ мин ку загъта... Æ фæстаг фæдзæхст... Сувæллæнтгæ... Седзæрсабитæ... (Гъузгæ рацæунцæ дуккаг æма
æртиккаг уоститæ æд сувæллæнттæ.) Хъайтар! Цæмæн мæ ниууагътай еунæгæй, мæ бон! Бæргæ мæ нæ фæндуй æнæ дæу цæрун, фал мæ дæ фæдзæхстæй ниббастай! Æма дин соми кæнун — исæнхæст æй кæндзæнæн! (Уоститæмæ.) Кумæ цотæ?
2-а г у о с æ. Нæхе кæми баримæхсæн, уордæмæ.
Х о р ч е с к æ. Ами хе баримæхсæн нæййес.
1-а г у о с æ (фæззиндтæй иннердигæй, æ къохи фат æма æндурæ). Римæхсгæ? Нæ-æ! Мæ бийнонти маст си гъæуамæ райсон æз! Цæуæнтæ мæ хæццæ! Еугæйттæй сæ кæми ерæн, уоми цæгъдгæ!
2-а г у о с æ. Нецибал син бакæндзинан мах! Фæлтау ма нæ сувæллæнтти уæддæр фæййервæзун кæнæн!
Х о р ч е с к æ. Раст зæгъис, хуарз уосæ. Æмбурд кæнтæ седзæр сабити æма сæ ести хузи рандæ кæнæн ардигæй! Басæримæхсæн хуæнхти цъæсти, лæгæттæ æма кæмтти...
3-а г у о с æ. Куд? Кæбæлти? Агъуд берæгътæ нæ алли фарс бæз-бæз ку кæнунцæ. Уой бæсти син ами байагорæн ести.
Х о р ч е с к æ. Кæми «ами», кæми? Еу гъæу, еу хæдзарæ æнæ ихæлд ку нæбал ес... Æрмæстдæр уæлмæрдтæ...
3-а г у о с æ. Мадта нин хуæнхтæмæ дæр раервæзæн нæййес...
1-а г у о с æ. Гъæуй раервæзун! Ци фæндуй амалæй дæр! (Хорческæн.) Бæгъатæр кизгæ дæ ду! Сосæггæй дæмæ мæрдти ’хсæнæй кастæн, уæдæйти сæ хæццæ ку тох кодтай, уæд. Хонæ сувæллæнтти! Æрмæст арæхсгай! Ани ба æндæр æрдæмæ нæ фæдбæл расайдзинан мах.
2-а г у о с æ. Ка «мах»?
1-а г у о с æ. Мах! (Амонуй æхемæ дæр, уомæ дæр).
2-а г у о с æ. Е адзалмæ над æй! Комкоммæ мæлæт!
1-а г у о с æ. О, мæлæт! Нæ сабити сæраппонд!
2-а г у о с æ. Нæ мæ фæндуй! Игъосис?! Тæрсгæ кæнун... Фæлтау...
1-а г у о с æ. Ци?! Фæлтау дин мæнæ дæ минкъий гæболи уæрикки ’вгарст никкæнæнтæ, нæ? Дæхуæдæг ба ма ин æ къæхтæбæл хуæцæг?!
2-а г у о с æ. Нæ! (Сувæллон дæдтуй Хорческæмæ.) Мæ царди рохс! Мæ хъæболæ!..
Иннетæ дæр сæ сувæллæнтти бакодтонцæ Хорческæмæ.
Æрбайгъустæй бæхти къæхти гъæр.
1-а г у о с æ. Æрбацæунцæ! Римæхсгæ уæхе! (Хорческæн.) Хонæ сувæллæнтти!
Хорческæ. Æмбурд кæнтæ иннæ седзæрти дæр уалæ гъæдрæбунмæ, Сау адагæмæ! Уæдта син ести хуæруйнаг сæ хæццæ! Цотæ! (Уоститæ фæййаууон æнцæ. Бацудæй, Хъайтари кумæ фæлластонще, еци ‘рдæмæ, сувæллони хæрдмæ исиста.) Хъайтар! Ард дин хуæрун мæ мард мадæ æма фидæй, дæ тоги пурхæнтæй, аци сабитæн нивондæн æрхæсдзæнæн мæ цард, мæ фæстаг исолæфт, мæ фæстаг тоги цъирт - сегасейдæр æрхæсдзæнæн нивондæн Аланти федæни сæраппонд, Хъайтар!
Æмбæрзæн
Дуккаг фæззинд
Æрдозæ гъæди. Бонивайæнтæ. Гъузгæ рацудæй Б а з у г, æ къохи арцæ. Æдзинæг кæсуй аллирдæмæ, игъосуй. Æ цæстæ рахаста æрдозæбæл, уæдта рандæй фæстæмæ æма уайтагъд фæззиндтæй X о р ч е с к и хæццæ. Уомæ дæр фат æма æндурæ, æ усхъи цидæр дзæкъолтæ, æ гъæбеси - сувæллон. Сæ фæдбæл - А ц æ.
Б а з у г. Мæнæ замманай æрдозæ. Ами бауолæфæн ес. Изæрæрдæмæ ба рараст уодзинан. Уогæ... ахсæви ами байзайун дæр бæргæ хуарз уидæ. Сувæллæнттæ сæхе æрлæдæрионцæ, нæ фæллад иссæуидæ...
Пихсити цидæр базмалдæй.
Х о р ч е с к æ. Тсс! Ести фегъустай? Ци уа, цума? (Сувæллони Ацæмæ февардта, райста фат æма æндурæ).
Б а з у г. Магъа, нæ зонун.
Х о р ч е с к æ. Гъæуама ’й зонай! Нæ раздзау дæ, нæ бæрæгзонæг! Тсс! Нæуæгæй бабæй... (Сосæгкæй.) Гæр, нæ фæдбæл бафтудайуонцæ? Фал нæмæ уæд афонмæ куд нæ лæборунцæ? (Игъосуй, кæсуй.) Сирд ести уайдæ...
Фæззиндтæнцæ Сау-Сатæг æма Е с т а р, фур-фæлладæй кæрдæгбæл бахаудтæнцæ.
С а у – С а т æ г. Уау, мæ къæхтæ! Мæнæ сæ тог куд кæлуй...
Е с т а р. Æз некумæбал цæун! Нæгъ, нæгъ!
Х о р ч е с к æ. Тсс! Сабур, сабур, фæттæрсун нæ кодтайтæ.
Б а з у г. Нур цæбæл тъезетæ? (Хорческæн.) Мадта лæууæн ами? Зæгъон иннетæн дæр.
Х о р ч е с к æ. Барæнæ. Тергади хуæздæр æй. Уæрдуннад ардæмæ æгæр хæстæг æй æма тæссаг æй. Да-алæ еци арф мæскъæ уинис? Тагъд се ’гасейдæр хонетæ уордæмæ. Уоми бæлæсти буни, аууони æрбунат кæнæн абони.
А ц æ (хъур-хъур кæнуй). Мæскъи, адаги, хæрдмæ, урдугмæ... Нур цал бони! Мæ къæхтæ хаунцæ... уæлдайдæр ба аци пихсити лæсун, никки æхсæвигон.
Х о р ч е с к æ. Бабухсетæ, мæ хортæ, берæ нæ нæбал гъæуй. Хуæнхтæмæ фæххæстæг кæнæн, уоми нин тас нæбал уодзæнæй. Лæдæрун æй... Зин æй, хъæбæр зин уин æй, фал нин æндæр гæнæн нæййес! Фæййервæзун гъæуй! (Рæвдауæгау.) Уæу-уа, Базуг, Ацæ, сумахбæл ма ку дарун мæ зæрдæ! Лæгтæ айтæ, гæлæхха, лæгтæ... фæммæмæ кæсетæ! (Сувæллон дæдтуй Сау-Сатæгмæ.) Хонетæ сувæллæнтти, æз ма разелон. Агоретæ дон, листæнтæ кæнтæ.
Б а з у г. Хуæруйнагæн ести амал гъæуй... бæласи сифтæ, кæрдæгутæ хуæрунцæ.
Х о р ч е с к æ. Æзиниккон дзæбодури дæркъæй нецибал райззадæй?
Б а з у г. Минкъий цидæртæ, ма сæ некæмæн дæдтæн. Дæхуæдæг ку загътай.
Х о р ч е с к æ. Хестæр биццеутæн зæгъæ - гъæддаг рæзæ бабæй райагорæнтæ. Æрмæст идардмæ нæ... Æз рацауæн кæнон, кæд ма мæ къохи ести бафтуидæ, кенæ ма кæд еу фæндаггон, еу цæрæг иссеринæ. (Сувæллæнттæ рандæ ’нцæ.) Куд ма ракæнон?! Куд сæ бауадзон судæй рамæлун? (Пихсити бабæй цидæр фезмалдæй. Фатæй имæ фæгъгъавта.) Ка дæ, ци дæ?! Æма дæ ци гъæуй?
Г ъ æ л æ с. Ма фæттæрсæ, æз дæн!
Х о р ч е с к æ. Ка «æз»?
Г ъ æ л æ с. Де ’нсувæр Тазар.
Х о р ч е с к æ. Сайис! Ме ’нсувæр фæммардæй! Тугъди будури байззадæй!
Г ъ æ л æ с. Нæ фæммардæй, Хорческæ! Æгас æй! Мæнæ дæн! (Рацудæй.)
Х о р ч е с к æ. Тазар! (Æхе ибæл багæлста.) Ме ’нсувæр Тазар! Æгас æй ме ’нсувæр. Фæммардæй дан... Нæ, нæ, мæнæ Тазар! Фунæй дæн æви игъал? Æцæг æй, æви аргъау? Сау гъæди астæу мæ мард æнсувæр райгас æй! (Гъæр кæнуй.) Сау-Сатæг, Базуг! Сувæллæнттæ, кæми айтæ? Рауаетæ тагъд! Ами мæнæ дессæгтæ ку цæуй! (Еугай-дугай æмбурд кæнунцæ сувæллæнттæ.) Мæнæ ме ’нсувæр! Æгас æй, уинетæ?! Байбæл æмбæлайтæ. Ма тæрсетæ, хæстæгдæр... (Сувæллæнттæн.) Цо-цо, марауадзæ! (Базуг æма Ацæ бацудæнцæ Тазармæ хæстæгдæр. Е дæр сæ æнæбари æ хъури кæнуй.) Гъæйдæ, дзоргæ тагъддæр, кæми адтæ? Ами куд равзурстæ?
Т а з а р. Е даргъ дзубанди æй... Хъайтари æфсади ке адтæн, уой дæхуæдæг зонис... Еу уæхæни... басæмæ лæбурдтан, фал етæ цалдæр хатти фулдæр... ниннæ цагътонцæ. Уæззау цæфтæй сæмæ уацари бафтудтæн æма нæ косæг фонсæн сæхецæн фæццæй тардтонцæ. Еу рауæн син раервазтæн куддæр амæлдтæй... Уæдæй ардæмæ рахау-бахау кæнун, кæд ма зæгъун, нæхеонтæй еске иссеринæ... Æма, Хуцауæй арази, мæ еунæг хуæрæ мæнæ!
Х о р ч е с к æ. Куд мæ иссердтай?
Т а з а р. Нæ бийнонтæй ма еунæг ду ке фæййервазтæ, уой ку базудтон, уæд дæ агорун байдæдтон. Исдин ирдтон дæ фæд. Æдосæ изæр коми ку фæххæрд кодтайтæ, уæдæй ардæмæ уæ фæдбæл гъузун.
Х о р ч е с к æ. Æдосæ изæр! Гæр æма уой бæрцæ куд бафæразтай? Уайтагъддæр мæмæ куд не ’рбауадтæ?
Т а з а р. Бæргæ бауадайнæ, бæргæ мæ фæндæ адтæй, фал... зæгъун... кунæ мæ, зæгъун, балæдæрай...
Х о р ч е с к æ. Ци гъæуама балæдæрон? (Æрбайгъустæй сувæллони кæун, уæдта инней, æртигкаги.) Исæстонг æнцæ... (Æ размæ уонæн.) Цотæ æма син февæретæ, ци мортæ ма нæмæ байзадæй, уони. Минкъийдæртæн æрмæст... Уæдмæ ба уæмæ мах дæр зиндзинан... Нур нин фенцондæр уодзæнæй, æвæдзи... Тазар дæр нæмæ фæккæсдзæнæй, æццæйнæ?
Т а з а р. Гъай-гъай, мадта! Дæ рахес цонг уодзæнæн! Уæддæр бабæй силгоймаг силгоймаг æй, мæ хуæрæ! Æз ба...
X о р ч е с к æ. Ду ба син уодзæнæ хестæр æнсувæр, сæ нифс, сæ зæрдæдарæн! (Кæстæртæ рандæ ’нцæ.) Фал уæдæйти нæ дзубанди нæ фæцæй. Ци гъæуама балæдæрон æз?
Т а з а р. А-а, е... Мæ катайтæ, мæ гъудитæ, мæ сагъæс... Зæгъуйнаг дин ке дæн, мæ еци дзубанди...
Х о р ч е с к æ. Уома ’й зæгъæ... Рагацау ку стухстæ. Æви дæ хуæрæ уотæ зиндзурд æй æма дæ нæ балæдæрдзæнæй?
Т а з а р. Бæргæ на ’дтæй зиндзурд, фал ами гъуддаг...
Х о р ч е с к æ. Гъæйдæуай ниууадзæ дæ бацеу-бацеутæ. Дзорæ, игъосун!
Т а з а р. Исæфунцæ сахартæ, гъæутæ, бийнонтæ, муггæгтæ... Цæгъдунцæ сæ фудголтæ, незтæ, мæлунцæ судæй... Ралæудтæй мæйдар æхсæвæ. Ду ба... еци мæйдари кумæдæр лæгæрдис...
Х о р ч е с к æ. Уома?
Т а з а р. Цæмæн есис аци седзæрти тæрегъæд дæхемæ? Уæддæр исæвд æнцæ æма сæ ниууадзæ.
Х о р ч е с к æ. Куд исæвд æнцæ?
Т а з а р. Цæмæй сæ дардзæнæ?
Х о р ч е с к æ. Нур бал... гм... гъæддаг рæзæ, кæрдæгутæ... маргъæй, сирдæй... еститæ кæндзинан...
Т а з а р. Цæргæ ба кæми? Уазалтæ, незтæ, алли хъилматæ... Мæнæ гъенур уарун райдæдта æма син ци кæнæн? Ци син дæ зæрди ес æнæ мадæ, æнæ фидæ, æвæгæсæгæй? Уони фæдбæл уодхари бæсти раздæхæ нæхемæ! Æнæ гъенцъун, æнæ хъип-суп цæрдзинан æма нæмæ некебал бавналдзæнæй, ма тæрсæ!
Х о р ч е с к æ. «Æнæ гъенцъун, æнæ хъип-суп»... Цъимарай золкъау!
Т а з а р. Багъæуай кæнæн нæ хæдзари фарнæ! Ма бауадзæн нæ фиди артдзæстæ ниххуссун! Куд нæ ’й лæдæрис - ду сæ кумæ хонис, уоми фæййервæзæн нæййес! Æрмæстдæр айнæг къæдзæхтæ, гъæдтæ æма дортæ. Сæ мæлæт ма син цæмæн фæстæтæрæ кæнис?
Х о р ч е с к æ. О Хуцау, куд фæйнæхузи ’нцæ де ’сфæлдист адæм: еуемæн сувæллæнттæ — æ базуртæ, æ федæн, иннемæн ба - хъадаматæ, е ’сæфт. Рæдуис, ме ’нсувæр! Сау гъæди дæр раервæзæн ес. Хонхи цъæстæ, айнæг къæдзæхтæбæл дæр рæрвæзæн ес! Æрмæст уарзун гъæуй исон бони цард, æ сæрбæл тох кæнун гъæуй! Гъæуама нæ фиддæлти тогæйдзаг зæнхæбæл исирæза цард æма ин сæрæвæрæг уонцæ атæ! Уæдта айдагъ атæ нæ — никкидæр ма агордзæнæн седзæртæ, ниффедар кæндзæнæн мæхе, алцæмæн дæр ниффæраздзæнæн, æрмæст нин цæрæнтæ аци сабитæ. Ду ба мæ нæ хæдзари сугъд æхседæрфтæмæ хонис!
С а у – С а т æ г (фæссценæй). Хорческæ, тагъд! (Æрбауадæй, æ гъæбеси сувæллон.) Цидæр кæнуй! (Дæттуй æй Хорческæмæ).
Х о р ч е с к æ (есуй сувæллони). Ци кодта? Кæд æнæхуæргæ ’й? Кæд æдонуг æй?
С а у – С а т æ г. Бæргæ ин лæвардтон дон дæр, хуæруйнаг дæр...
Х о р ч е с к æ. Æхсир! Æхсир æй гъудæй! Фал ин кæми ссерæн æхсир?
Т а з а р. Гъеууонитæбæл гъуди кæнун æз дæр! Бамæ лæдæрæ, Хорческæ!
Х о р ч е с к æ. Куд дæ балæдæрон! Мæнæ уомæ ’ркæсай - ивазуй мæмæ æ лæмæгъ гоккитæ, лигъстæ мин кæнунцæ æ минкъий дзæццитæ... мæлæтæй мæ бахезетæ, зæгъгæ... Ду ба мин æй уадзун кæнис ами. Цæмæн? Ци дин кодта?
Т а з а р. О, о, ци дин кодтонцæ? Бафæрсай дæхе?!
Х о р ч е с к æ (сувæллонæн). Бафæразæ, мæ цæсти гагу! Барæнæ, гæллæха, мæ хори тунæ! О ме скæнæг Хуцау, ме сфæлдесæг изæдтæ, аци цæрунгъæуагæ саби уæ фæдзæхст фæууæд... Мæлæтæй æй бахезетæ, Хуцау! (Паузæ.) Рахецæн æй... (Паузæ.) Куд нæ дæ багъæуай кодтон! Æ мадæ ба, мæгур, æ хъæболæн тæрсгæй, фудголти гъæлæсмæ багæлста æхе! Барвæндонæй! Цæмæй сæ мах фæндагæй æндæр æрдæмæ расайа... (Сувæллонæн.) Ду ба? Фудæнгъæл æй фæккодтай, биццеу.
Т а з а р. Фæйидтай! Нæ дин загътон? Идарддæр дæр уотæ уодзæнæй. Дæ фæндон æма дæ гæнæгтæ æнхузæн нæ ’нцæ. Дæ фæндаг исæфти фæндаг æй æма ’й ниууадзæ!
Х о р ч е с к æ. Куд æй уома «ниууадзæ»? Сувæллæнтти богъ-богъмæ къæдзæх æскъунуй, сæ тæрегъæдæй æ цæстисуг калуй арв! Уæд, цума, дæуæн циуавæр зæрдæ ес?
Т а з а р. Æ еунæг хуæри мæтæй ка гъæрзуй, гъеуæхæн зæрдæ.
Х о р ч е с к æ. Дæ еунæг хуæри мæтæй кæд уотæ хъæбæр гъæрзис, уæд имæ фæккæсæ, къулумпитæ кæнуни бæсти.
Т а з а р (æ надбæл æрлæудтæй). Рагъуди кæнæ, фæффæсмон кæндзæнæ!
Х о р ч е с к æ. Тазар! Дзурд равардтон Хуцауи рази, «æнæ гъенцъун, æнæ хъип-суппæй» цæруни бæсти мæлæт ка равзурста, уомæн æма ’й нæ фæссайдзæнæй! Некæд!
Т а з а р. Дзурдæй цард хъазардæр æй, кизгæ!
Х о р ч е с к æ. Мæн уæхæн цард нецæмæн гъæуй! Еуварс мæ фæндагæй, Тазар! (Рандæй æд сувæллон).
Базур æма Сау-Сатæг дæр рандæнцæ æ фæсте.
Æ м б æ р з æ н
Æртиккаг фæззинд
Устур лæгæт. Ка бацæуй, е кæмидæр æрбайсæфуй арф фæззелæнти. Æ фæрстæ кæми тæрхæгау æрзæболæ ’нцæ, кæми ба сæ цума еске медæмæ бакъахта, уотæ. Хатгай кæцæйдæр разиннуй нæзи цирæгъти гæзæмæ рохс. Тæккæ бацæуæни, еуварсæрдигæй къæдзæхи æнхæли Хорчески хуссæнгонд. Инне ’рдигæй - тъæригъос, æ сæрмæ самакъа ауигъд. Хорческæ исæрдуй тъæригъос, агъаз ин кæнуй Б а с е т. Сæ гъæбесидзæгтæ хуасæ æрбахастонцæ Сау-Сатæг æма О р а з.
Х о р ч е с к æ (фæцæй æ куст, еуварс ралæудтæй). Уинетæ?! Е ба уин нæ тъæригъос! Нæ нæуæг бунати бундор. Ис си цæфстæй арт æма гъæуама еци зинг макæдбал ниххусса!
С а у – С а т æ г. О не скæнæг Хуцау, амондгун бунат нин æй фæккæнæ! (Æрæвардта æ хуасæ).
Х о р ч е с к æ. Амондгун уодзæнæй! Лæгæт устур æма сор. Æ бунат хуарз. Æ алли фарс — райдзаст, алцæмæй гъæздуг: дон, сог, кæрдæг, гъæддаг рæзæ, хуæргæ зайæгойтæ, сирдтæ, мæргътæ... Сауæнгæ ма си зумæг дæр ес цæрæн, æрмæст имæ базелун гъæуй: æ цъæстæ ма ин æ къаппилтæ дортæй исдасдзинан, æ бацæуæнтæ ба ин цæрттæй нимбæрздзинан.
С а у – С а т æ г. Етæ хуарз, фал... æдас æй цума? Еци цъундæцæститæ нæ ами дæр ку иссеронцæ, уæдта! Дæ-дæ-дæй!
Х о р ч е с к æ. Мæнмæ гæсгæ, æдас. Æзинæ æрзилдтæн... Фал æркæсун гъæуй. Базонæн бæлвурддæр. Кæд ести тас уа, уæд хуæнхти арфдæр байесдзинан нæхе. Нурба бал алцæмæ дæр кæсетæ, гъæуай кæнтæ уæхе. Де ’мбæлттæ кæми ’нцæ?
С а у – С а т æ г. Агорунцæ фæсалæ, хуасæ, фæлмæн къалеутæ, сор сифтæ. Хуссæнуатæн син ке загътай, уони. Мæнæ сæ ами хæстæг амайунцæ. Биццеутæ ба... ка гъæди, ка кæми... (Æ хæссуйнаг фæцæй иста, æрбайгъустæй зар, æ хæссуйнаг фæстæмæ æрæвардта.) Еци зар бабæй! (Игъосуй).
Е с т а р (рауадæй лæгæтæй). Игъосетæ? Æдосиккон зар! (Игъосуй.) Ка уа, цума?
Х о р ч е с к æ. Алæмæти зар! (Æ цæститæ бацъундæ кодта æма игъосуй).
С а у – С а т æ г. Æзинæ дæр æй... Раст цума аргъауи фæуун!
Х о р ч е с к æ. Тсс! Сау-Сатæг, Естар, барæнтæ, гæлæхха, еу минкъий аргъауи рацæрæн! О, о, аргъауæй е: нæхе хуæнхтæ, нæхе лæгæт, нæхе тъæрæ æма алæмæти зар... тсс! (Игъосунцæ. Æрбайгъустæй сувæллæнтти кæун. Бостæхузæй.) Барæнтæ минкъи! (Нурма имæ нур багъардта, ка кæуй, е.) Мæ сувæллæнттæ! (Естарæн) Ци кæнунцæ?
Е с т а р. Хуæруйнаг агорунцæ.
Х о р ч е с к æ. Сау-Сатæг, марауадзæ бабал сæ рæвдауæ. Ести син æргъуди гъæуй. (Фæссценæмæ.) Базуг!
Б а з у г (гъæлæс). Уæй!
Еугурæй дæр рандæ ’нцæ Хорческæй фæстæмæ.
Б а з у г рацудæй, æ дустæ медæмæ тулд.
Х о р ч е с к æ. Ци фæцæй уæ косарт? Кæдмæ ибæл архайетæ?
Б а з у г. Нуртæккæ фæууодзинан.
Х о р ч е с к æ. Загътай Тазарæн, сæйгæ сувæллæттæн басæ рафицун гъæуй, зæгъгæ?
Б а з у г. Загътон ин, фал...
Х о р ч е с к æ. Ци?
Б а з у г. Исмæбæл гъæртæ кодта...
Х о р ч е с к æ. Фæймæ дзорай ардæмæ.
Б а з у г. Дæхуæдæг ин ку зæгъисæ... Мæнмæ мæстгун кæнуй.
Х о р ч е с к æ (фæссценæмæ). Тазар! Гъæуис мæ еу мин-
къи.
Т а з а р (рацудæй хъур-хъур кæнгæ, æ дустæ медæмæ тулд, æ къохи кард). Ци ’рцудæй, ци хабар æй?
Х о р ч е с к æ. Кæдмæ ’йбæл архайетæ, дзæбодурæй æндæр ма ести æй?
Т а з а р. Ка мин архайуй мæхецæй æндæр?! Ци лæдæрунцæ аци хæлеугъæлæстæ, мæнæ? (Базугмæ амонуй).
Х о р ч е с к æ. Æма син райамонæ, дæ кæстæртæ ’нцæ! Марауагътæ фæррæвдзæдæр кæнтæ. Тагъддæр еу баси цумд, гæлæхха! Тæрегъæд æнцæ сæйгæ сабитæ!
Т а з а р (нитътъæлланг ласта). Æнирай фæууо дæ сæйгæ сабитæй! Кæцæй син æрдавон еци баси цумд? Куд æй рафицон? Цæбæл? Цæми? Мæ ухсти финдзбæл, æви мæ хъонцарухъти?
Х о р ч е с к æ. Уанцон нæй, гæлæхха, тугъдон лæг ку дæ, уæд уобæл бабæй силгоймаги куд фæрсис? Цауæйнæндтæ куд фæффицунцæ, уотæ.
Т а з а р. Цауæйнæндтæ физонæг фæккæнунцæ, кизгæ!
Х о р ч е с к æ. Идард нæдтæбæл басæ дæр рафицунцæ, биццеу! Уæцъæфи, ме ’нсувæр, косарти уæцъæфи. Хуæрзæхснад æй никкæнтæ, райхатетæ усхъуммæ, æ дирзæгæрдæмæ, бай идзаг кæнтæ дон æма фидæй, гъемай уæдта фæууæларт кæнтæ. Æрмæст имæ цирен куд не ’схъæрта, уотæ,
æндæра басодздзæй. Ес ма уотæ гæнæн дæр: зæнхæ ракъахетæ, цæхæртæй æй истæвдæ кæнтæ æма уæцъæф уоми æрæмбæрзетæ.
Лæгæтæй рацудæй Сау-Сатæг. Нæй уинунцæ.
Т а з а р (Базугæн). Фегъустай, гæлех? Гъема цæугæ æма дин куд загъта, уотæ бакæнæ! Ци мæмæ кæсис? Кæмæ дзорун æз?! (Æ уадолæ ин цæвуй.) Цæугæ дин ку загътон!
Х о р ч е с к æ. Тазар! (Базуг еудзæвгарæ Тазармæ кæсгæй райзадæй, уæдта рауидта Сау-Сатæги æма фендæбилæй. Сау-Сатæг дæр æ фæсте фæййаууон æй.) Цæмæн æй ниццавтай?! Æнæуой дæр сæбæл минкъи цæфтæ ку нæ рауадæй, сæ хъисмæти æгъатир цæфтæ?!. Æма син сæ ирæзгæ уодтæ дзæбæх кæнун гъæуй! Сæ зæрдитæ, сæ тогæй син фæссорун гъæуй тас, фудонхæ, фудзæрдæдзийнадæ! Гъæуама си бауадзæн нифс, æууæнкæ æма рохс уарзондзийнадæ! Ду ба?!
Т а з а р. Æз ба ци? Æз Тимури уацарæй уой туххæй нæ ралигъдтæн æма ами къæбурти ирагъбæл кедæр къæбулатæн хæрæги хафт кæнон? Нæ, мæ хуæрæ, мæн кедæр хъибилтæ нецæмæн гъæунцæ! Мæхе байзæттаг мæ гъæуй, балæдæрдтæ? Мæхе!
Х о р ч е с к æ. Райдæдтай бабæй еци дзубанди...
Т а з а р. О, райдæдтон! Æма ’й некæд фæууодзæнæн! Æрмæст дæуæн нæбал. Нæмæ балæдæрдзæнæ, уомæн æма, дæхемæ гæсгæ, хуардзинадæ кæнис. Фал нæ! Тæрегъæд гъуддаг, устур тæрегъæд! Кедæр æнамонд цæуæт сосæггæй радавтай æма сæ æнæсæр уæриккитау, скъæппæгмæ тæрис... Æма сæ еуетæ билæй хаудзæнæнцæ, иннетæ ба ервæздзæнæнцæ... фонсау æнæ ном, æнæ муггагæй... кæд раервæзонцæ, уæд. Уотæ ’нгъæл дæ, ниддинæй хатир кæндзæнæнцæ? Некæд!
Х о р ч е с к æ. Рæдуис, Тазар...
Т а з а р. Нæ рæдуйун, нæ! Ду ба син дæ уод хуæрун кæнис... Мæнæй дин кедæр къæбистæ хъазардæр æнцæ. Гъе-ма сæ уарзæ! Де ’нсувæр ба бунисæфт фæууæд, нæ? Гъæди халонау еунæгæй цæрæд, нæ?!
Х о р ч е с к æ. Нæ, нæ, Тазар!
Т а з а р. Мадта цæуæн мæ хæццæ! Нæ муггаг исæфуй, Хорческæ! Мæнæй æндæр нæмæ нæлгоймаг нæбал байзадæй... Цæуæн! Исараздзинан нæуæг хæдзарæ - нæ фиццагæй хуæздæр... Ес мæмæ уой бæрцæ... Уодзæнæй нæмæ фонси дзогтæ, бæхрæгъæуттæ, мулк...
Х о р ч е с к æ. Бæхрæгъæуттæ, мулк... Кæцæй?!
Т а з а р. Е мæхе гъуддаг æй... Цæуæн?!
Х о р ч е с к æ. Гъе уайдæ, ниххатиргæнæн кæмæн нæййес, уæхæн цъæммар миуæ. Нæ, нæ!
Т а з а р. Гъема ’дта... Мæ къох дæбæл есун абонæй фæстæмæ - некебал дæ мæнæн! Тæккæ исон цæун ардигæй! (Рандæй).
Х о р ч е с к æ (Æ фæдбæл). Барæнæ, Тазар! Бамæ лæдæрæ! (Æхенимæр.) Рандæй! Ку неци бæлах бабæй исаразидæ, рагæй дæр тæвдæ сæр адтæй, хæстмаст... О, фал цæмæн? Ку нецæмæй дæ бафхуардтон, ходуйнаг дæмæ ку не ’рхастон, миййаг?! Тæрегъæд гъуддаг зæгъис? Нæ, нæ, тæрегъæд гъуддаг адтайдæ, уоми сæ ку ниууагътайнæ, уæд! Æз ба сæ фидбилизи гъæлæсæй ку ратудтон! Гъе тæрегъæд миуæ нæй! О, фал мæ цæгæй ескæд ку нæ балæдæронцæ, уæдта? Мæнгард æй цард... Фудгин дæр ма разиннон кай зонуй... Æццæйнæ мæ гæболтæ, мæ минкъи гагитæ... Куд ракæнон, мадта?! (Еу рауæнмæ никъкъех æй, æ цæстисугтæ сæрфуй).
Г а г а (æнæ стуфæй рацудæй лæгæтæй). Нана... (Æ къохæй амонуй.) Нана кæуй. (Фæззиндтæнцæ Басет, уæдта Ораз. Уонæн дæр амонуй Хорческæмæ.) Нана кæуй.
Б а с е т. Нана кæуй?
Х о р ч е с к æ (игъосгæ райззадæй). Мæ минкъи бæдæлттæ... Сæ нанати бабæй агорунцæ, мæгур. А-гъай, уони гъар гъæбеси бæргæ радзæбæх адтайайтæ, мæ хортæ... Фал кæми ’нцæ, мæгур сæ бон, кæми? Кæд сæ уод ескæй сумахæн
курдтонцæ цард не ’сфæлдесæгæй, кæд сæ фæстаг дзурдтæ сумах нæмттæ адтæнцæ...
Г а г а (гъæрдæрæй). Нана!
Х о р ч е с к æ (фæймæ зилдæй æвеппайди). Гага! Мæ минкъи гæболæ! Цæмæн рацудтæ дæ хуссæнæй, мæ хор? Цæмæн исисдадтæ?
Г а г а. Цæбæл кæуис, Нана?
Х о р ч е с к æ. Ци загътай, ци? Нана?! (Æ хъурий ниттухта.) Нана!.. (Кæмидæр нийазалдæй «Нана!», «Нана!») О, О! Æз дæ Нана дæн!
Б а с е т. Нæгъ, мæн!
О р а з. Нæгъ, мæн!
Фæззиндтæнцæ Сау-Сатæг, Естар, Базуг.
Х о р ч е с к æ (радугай сæ æ хъури кæнуй). Дæу дæр! Дæу дæр! Дæу дæр! (Гъæрæй.) Æз уе ’гасей Нана дæн! Гъай-гъай! (Кумæдæр гъæр кæнуй.) Нана!
Аллирдигæй игъусуй берæ гъæлæсти хъæлæба, Нана, зæгъгæ, тухгиндæр кæнуй, уæдта æрсабур æй.
А ц æ (æрбацудæй, йе ’ккой тæскъæ гъæддаг рæзæ æма кæрдæгути хæццæ). Уæ бонтæ хуарз!
Б а з у г. Æгас цо! Цитæ ’рбампъухтай? (Тæскъæмæ æвналуй).
А ц æ. Берæ цидæртæ. (Базугæн.) Барæн, ма ’вналæ, Нана сæ райуардзæй.
Н а н а. Æма ма дин Годах ма Арсалан ба кæми ’нцæ, Ацæ?
А ц æ. Етæ ба ма арси бæдолæ ахæссунцæ...
Н а н а. Циуавæр арси бæдолæ, кæми?
А ц æ. Гъæдий иссирдтан, еу арф лæгæти, минкъи бæдолæ... Уæхæн дзæбæхæй, уæхæн... Æма, дан, æй нæхемæ хæссæн. Фал син раледзуй. Гъема уой ахæссунцæ. Мах Бадæги хæццæ рафардæг ан нæхемæ.
Н а н а (тарстæй). Æ мадæ! Æ мадæ сæ ракъабæзтæ кæндзæнæй! (Æ фарсбæл кард бæдтуй.) Базуг, Тазари бæх тагъд!
Б а з у г. Нуртæккæ! (Фендæдуар æй).
Н а н а (есуй фат æма æндурæ). Ацæ, тагъд — мæ фæсабæрцæ! Хонгæ мæ кæми ’нцæ, уордæмæ! (Иннетæн.) Сумах — змæлгæ дæр некумæ! Ци не ’рцæуй - нæуæг бунат æй! Базуг, Сау-Сатæг, кæстæртæмæ фæккæсетæ!
Æрбайгъустæй бæхи къæхти гъæр æма райдардæй.
Цуппæрæймаг фæззинд
Лæгæтмæ бацæуæн. Изæр. Б а з у г цидæр къалеутæй есойнæ
бæдтуй. Сау-Сатæг царæй æркъетæ хуйуй.
С а у – С а т æ г. Мæнæ дессаг, кæмий æдта аци афонмæ Нана? Дæ-дæ-дæй, маци йбæл æрцæуæд!
Б а з у г. Тсс! Игъосунцæ дæ! Æнæуой дæр айсонккæй «Нана», «Нана» кæнунцæ! Нæ минкъитæ сæхе кæунæй марунцæ.
С а у – С а т æ г. Басæмæ кæсон... (фæцæйцудæй).
Б а з у г. Барæнæ, рабал бадæ мæ рази.
С а у – С а т æ г. Цæмæн?
Б а з у г. Магъа.
С а у – С а т æ г (райфæнзта). «Магъа»!.. Æндæр неци зонис?
Б а з у г. Магъа...
С а у – С а т æ г. Æви тæрсгæ кæнис?
Б а з у г. Тæрсун... Нанайæн. Арси нихмæ тох... Цæун имæ гъæуй!
С а у – С а т æ г. Бæгъæмбадæй? Фæинай мæнæ аци æркъетæ. (Дæдтуй имæ æркъетæ).
Б а з у г (еу æркъе рабарста). Хуарз æй. Дæсни дæ хуйунмæ.
С а у – С а т æ г. Хестæр кизгуттæ еугурæйдæр исдæсни æнцæ. Æрмæст нин сæ кæрдгæ Нана æхуæдæг фæккæнуй.
Рацудæй Б а с е т, кæуй.
Б а з у г. Цæбæл кæуис, когга? Ци бабæй кодтай?
Б а с е т. Абони мæ Нана фудуаг исхудта. Къæсибадæг, дан, дæ!
С а у – С а т æ г Æма имæ цæмæн дзурдтай фæстæмæ?
Б а з у г. Хестæрмæ, дæ мадæмæ... Куд нæ фæууорæдтай дæхе?
Б а с е т. Уома ин уæхæнæй ку неци загътон.
Б а з у г. «Уæхæнæй». Æнцон æй хестæри фæрресун кæнун. Уомæн æма æ уод истæнæг уй, æ зæрдæ баехсуйуй æ кæстæрти мæтæй, хъурдохæнтæй, мастæй, дæу мæтæй! Ду ба? Цо дæхе нихснæ!
Басет рандæй.
С а у – С а т æ г. Гæр... ести сæбæл æрцудайдæ мадта?
Б а з у г. Магъа, фал... ма тæрсæ... Уанцон тарст нæй...
С а у – С а т æ г. Куд нæ тæрсон... еу зиннæг си ку нæййес...
Г а г а (рацудæй кæугæ). Нана! Нана!..
С а у – С а т æ г.Æрсабур уо, ма ко, мæ хор. Тагъд æрцæудзæнæй Нана!
Г а г а. Неци ’рцæудзæнæй, сайгæ мæ кæнис! Арс æй бахуардта!
С а у – С а т æ г.Гъæла дзубандитæ! Ка дин загъта уотæ?
Г а г а. Уартæ Билахан! Мадта ’й бафæрсай! (Кæуй).
С а у - С а т æ г. Ма ’йн ци лæдæруй е ба? Ка ин радзурдта уотитæ?
Е с т а р (рацудæй инне ’рдигæй). Абони къуæр-къуæрагæ.
Б а с е т (рацудæй). Сау-Сатæг, Базуг, сувæллæнттæ кæунцæ, Нанай агорунцæ.
Медæгæй райгъустæй сувæллæнтти кæун, рæвдаугути дзубанди, еугай дзурдтæ «Нана», «арси бæдолæ», «фæммардæй», «неци фæммардæй» æма æндæртæ. Сцени ка’й етæ дæр дзубанди кæнунцæ, æма бæстæ дзолгъо-молгъо иссæй. Раст еци рæстæги А ц æ æрбакодта Н а н а й. Æ цæсгон тогæйдзæгтæ, æ дарæс - скъудтæ, æ еу цонг — баст, æ къах - къулух, æнцойнæ кæнуй лæдзæгбæл. Сæ фæсте æрбацудæй æма еуварс æрлæудтæй æнæзонгæ лæг.
Б а з у г (цийни гъæр). Нана! (Æхе ймæ багæлста).
Еу усмæ еугурæйдæр фæгъгъос æнцæ, уæдта лæгæт байдзаг æй цийни хъалабайæй, дзубандитæ, гъæртæ. Еугурæйдæр сæхе ласунцæ Нанамæ. Бæлвурддæр райгъусуй еугай дзубандитæ: «Нана тухгиндæр æй!», «Арси рампурста». «Еци лæг ба ка й?». Нанай æрбадун кодтонцæ æ хуссæнгонди. Сау-Сатæг ин æ цæсгон сæрфуй.
С а у – С а т æ г. Дæ цæсгон еугур цæфтæй, Нана. Хъæбæр дин ресунцæ?
Б а з у г. Гъæйдæуай, ци дин ракæнæн?
Е с т а р. Æццæйнæ, Нана?
Н а н а. Уæ Нана уин уæ рунтæ рахуæра! Ма тæрсетæ, мæ хортæ, радзæбæх уодзæнæн!
Б у д з у л а. Некæдма фæууидтон ауæхæн æригон Нана. Мæ сонт фарст мин ниххатир кæнæ... Ка дин æнцæ атæ?
Н а н а. О, хæдæгай, хатир - нæхебæл фæцан... Дæхе бал æруадзæ. Ка мин æнцæ, загътай? Аланти седзæртæ, æнæ мадæ, æнæ фидæ мæгуртæ. Æрсæ ’мбурд кодтон сахарти, гъæути, сугъд æма ихæлд хæдзæртти буни, будурти, гъæдти, пихсити, хъамилти, къæхтити, уæрмити... ке ’мæрдти ’хсæн, ке ба æрдæгмæрдтæй... Тухамæлдтæй æрбаервастан æвæндаг рауæнтæбæл бонасадæн, æхсæвдзо кæнгæ.
Б у д з у л а. Уойбæрцæ къуарæй тугъди цæхæрбæл? Сæхуæдтæ æгас гъæувагæ!
Н а н а. Берæ гъæути фагæ. Кæд мин сæ карæмæ раервæзонцæ, уæд.
Б у д з у л а. Æма сæ куд ервæзун кæнис еунæгæй? Аци лæгæти?
Н а н а. Нæ зонун, нæ зонун, хуарз лæг. Ести амæлдтæ кæнун гъæудзæнæй. Гъæуама байрæзонцæ бæгъатæр тугъдон лæгтæй, æгъдаугин, тухгинтæй. Сæ фиддæлти фарнæ куд рахæссонцæ. Гъæуама ма байсуса цард нæ уодхайраг тогæйдзаг зæнхæбæл!
Б у дз у л а. О Хуцау æма ейæ нæ федæн ку æй! Ка ма ни раервастæй, уони бæллец! Нæ, ду хумæтæги силгоймаг нæ дæ! Ду, æвæццæгæн, Хуцауæй æрвист дæ! Хатир корун, фал... кæд дин мæ бон естæмæй банхус кæнун æй... Мæ нецæййаг цард нæ бавгъау кæндзæнæн.
Н а н а. Тагъд ма кæнæ, хуарз лæг. Дæ унаффитæ тæвдæ къæйдорбæл ма сорфунх кæнæ. Ами еунæг цард не сфагæ уодзæй.
Б у д з у л а. Зонун æй æма... Мæн цард дуккаг фæууæд. «Нана»... О-о. Гъема Нана кæми ес, уоми Баба дæр гъæуй. Ду кизгутгæн амондзæнæ силгоймаги миутæ, æз ба биццеутæн - лæгау-лæги гъуддæгтæ. Исарази уо, зин дин уодзæнæй...
Н а н а. Нæ бафæраздзæнæ!
Б у д з у л а. Алцæмæн дæр бафæраздзæнæн! Æрмæст дæу фæндон уæд!
Н а н а. Мæн фæндон нæй. Ке фæндон адтæй, е нæбал ес. Дзубандитæбæл дæ ниддардтон. Хæстæгдæр нæмæ ’рбахезæ. Цæнхæ... кæрдзинæй неци рæвдзæ ан, фал нин базонæ нæ цæрæнтæ, нæ уагæ...
Б у д з у л а. Æндæр хатт. Нурба бал дæ цæфтæмæ фæккæсæ. Кæд дæ фæндуй, уæд дин исон хуаси кæрдæгутæ ’рхæссон?
Н а н а. Æгæр дæ ку батухсун кæнон...
Б у д з у л а. Цитæ дзорис... е мæнæн... гъæйдæ... хуæрзизæртæ. Зиндзæнæн бабæй. (Рараст æй).
Н а н а. Дæхе бал нин уæддæр байамудтайсæ. (Сувæллæнттæн.) Байгъосайтæ, мæ хори тунтæ! Мæнæ уин е ба мæ ервæзунгæнæг!
Б у д з у л а. Дæ ервæзунгæнæг - Хуцау, уæдта - дæхуæдæг! Æз ба - хумæтæги цауæйнон.
Н а н а. Нæ й лæдæрун, уоми кутемæй февзурстæ?
Б у д з у л а. Гм... е даргъ дзубанди æй... уæ фæдбæл цудтæн комæй æма арси богъ-богъмæ уæлбилæй ку ’ркастæн, уæд... О Хуцау, æригон силгоймаг биццеути фæйнердæмæ фехста, æхе багæлста арси дзæмбутæмæ æма ин кард æ гъæлæси рацавта. Сирд æрба ’рра æй... идарддæр ба...
Н а н а. Еунæг усмæ фæстæдæр, зæгъгæ — къабазгай мæ ракодтайдæ арс, фал ин уалинмæ арцæ æ зæрди ниссагъта.
Б а з у г. Æма ци фæцæй?
А ц æ. Æ мард ин æрхастан! Æфснайунцæ ’й Годах æмæ Ораз.
С а у – С а т æ г. Æ бæдолæ ба? Минкъи арс ци фæцæй?
А ц æ. Минкъи арсæн минкъи лæгæт æ бунат. Фæйкæнунцæ биццеутæ!
Н а н а. Нанай минкъитæн дæр — сæ минкъи листæнтæ. Хонетæ сæ, Естар, Сау-Сатæг. Хуæруйнаг син ести фæйинетæ æма сæ ниххуссун кæнтæ. Цотæ, мæ хортæ...
Б у д з у л а. Цæй, æгæр уæ ниффæстеуат кодтон. Хуæрзизæртæ! (Фæццæй цудæй).
Т а з а р (рацудæй æ комивазгæ). Гъы, фæззиндтæнцæ бæгъатæр алантæ! Æхе мин алайнаг ка не схондзæнæй! Ка уин загъта, мæ бæхбæл мин фæццотæ, зæгъгæ! Æви бафæрсун дæр уæ сæрмæ нæбал хæссетæ?
Б у д з у л а æрлæудтæй æма листæг кæсуй Т а з а р м æ.
Н а н а. Фæрсунбæл нæбал адтан, биццеу. Фæдесмæ тагъд кодтан!
Т а з а р. Гъæуамæ уæ евдæла! Æз уæ дæлбар нæ дæн! Куд рандæуон исон еци фæллад бæхбæл?!
Н а н а. Фæстæдæр цæудзæнæ, ку бауолæфа, уæд.
Т а з а р. Е дæ гъуддаг нæй! (Рандæй).
Б у д з у л а (Тазари фæстæ кæсгæй). Ка дин æй аци лæг?
Н а н а (æнæбари). А-а, ме ’нсувæр бæргæ адтæй... Фал кæрæдзей нæбал лæдæрæн.
Б у д з у л а (фæкъкъехæй). Де ’нсувæр? Куд де ’нсувæр?.. Дæ хæстæг, де ’рвадæ?
Н а н а. Мæ мадизæнæг, мæ кæстæр. Æма ци? Цæбæлдæр тухсис?
Б у д з у л а. Нæ зонун... куд дин æй зæгъон... Æной дæ цæмæн гъæуй. Æнæ мастдæр уодзæнæ. Цæй, æз цæун!
Н а н а. Æнæмастдæр? Нæ, нæ! Нæбал дæ рауадздзæнæн нур, цалинмæ мин зæгъай... Ци ’рцудæй, ци масти кой кæнис? Дæ хуарзæнхæй, мабал мæ гъезæмарæй марæ.
Б у д з у л а (паузи фæсте). Ардæмæ ’ймæ фæдздзорæ, мадта. Сувæллæнтти рарветæ.
Н а н а. Базуг, Тазармæ радзорай. (Базуг рандæй.) Биццеутæ, цотæ сумахдæр. (Биццеутæ рандæ ’нцæ.) Æрбайгъосай, хуарз лæг. Ме ’нсувæри койтæ мин кæнис, фал дæхуæдæг ба ка дæ, кæцæй дæ, цæмæн фæззиндтæ ами?
Б у д з у л а. Будзула мæ ном. Цæргæс дæр мæ худтонцæ æригонæй кæддæр.
Н а н а. Æвæдзи цæргæсау бæрзæндти тæхун уарзтай.
Б у д з у л а. Уарзтон, гъо, мæ бæллецти, мæ сæнтти... Фал Хуцау æндæр хузи загъта: мæ базуртæ мин æверхъау тугъд æркарста... Цубур дзурдæй, намусгин Хъайтари æфсади адтан де ’нсувæри хæццæ...
Н а н а. Хъайтари æфсади, зæгъис? Будзула. О, Хъайтари, цæбæл фæкъкъех дæ? Зудтай æй, миййаг? Цубур дзурдæй... ниннæ хафтонцæ... Æз ма куддæртæй ардæмæ ’рбафтудтæн...
Н а н а. О, ай-гъай, ами æдасдæр адтæй. Æнцондæр адтæй хе цард багъæуай кæнун.
Б у д з у л а. Æфхуæргæ мæ кæнис. Уæззау цæфтæй, мæхе дæр нæ лæдæрдтæн, уотемæй мæ ’рбахастонцæ бæхбæл. Мæ дамгъатæ мæ уæле. (Æвдесуй æ сæри цæф).
Н а н а (фæкъкъехæй). Нæй ахæссуй мæ сæр... Зæгъайтæ мин, хъалсæр алантæ, уæ хъаурæ, уæ номæй фудголтæ резгæ ку кодтонцæ, уе ’мгæрæндти рауайун дæр ку не ’ндиудтонцæ, уæд нур куд æрхаудтайтæ аци æгади уавæрмæ?
Б у д з у л а. Æз...
Н а н а. «Æз», «Æз» бæргæ кæнтæ, фал ка айтæ нур сумах? Кæмий уæ нæргæ кадæ, кæмиий уæ нифс?
Б у д з у л а. Нифс гъæуагæ бæргæ нæ ’нцæ алантæ. Нæ кард къумух бæргæ некæд адтæй, нæхебæл некæд аурстан. Уой нæ фал тугъди цæхæри адзал иссерун — лæгдзийнадæ хонæн...
Н а н а. Уо мадта куд æрхастайтæ ауæхæн ходуйнаг уæ сæрмæ?!
Б у д з у л а. Раст нæ дæ, силгоймаг! Ходуйнаг не ’руахтан! Уодæгасæй ни неке бахаудтæй уацари, æ гæрзтæ неке æрæвардта сæ рази.
Н а н а. О Хуцау, ци кодтан, мадта?!
Б у д з у л а. Кæрæдзей нæ лæдæрæн! Кæрæдзебæл нæхуæцæн! Ниххæлеу ан алли зæнхæ, алли бæститæбæл. Ихуæрст тугъдонтæй лæггадæ кæнунцæ алантæ. Бæгъатæрæй мæлунцæ кæми сæ еуети, кæми ба иннети сæрбæл. Хатгай ма сауæнгæ кæрæдзейдæр ниццæгъдæн. Æма байззайунцæ æгадæ ма
æдзардай кедæр бæсти алантæ. Нæхе зæнхæ ба хуæрзбун бацæй мæнæ! Содзуй, гъæрзуй, æ сау тоги мæцуй æма еу тохгæнæг нæбал ес æ сæрбæл. Нæ намусгин, нæ бæгъатæр фæсевæд сæхе нивондæн æрхастонцæ бæргæ, фал сæ фесавтонцæ нæ уæйæгæнгутæ. Мулк сæ бабун кодта, сæ фурзудæй бакурмæ ’нцæ, сæ цæсгон бахуардтонцæ, уæйæ кæнунцæ лæги фарнæ, сæ уодтæ!
Н а н а. Гæр уæхæндтæ дæр еси?
Б у д з у л а. Мулкитæ, æхцати фæдбæл лух кæнунцæ се 'нсувæрти, сæ фиддæлти скъелтæ! Е-уæу-уæй, алантæ, уæу-уæй! Ходуйнаг! Ходуйнаг!
Т а з а р (æрбацудæй). Ци мард бабæй уæбæл æрцудæй?
Б у д з у л а. Де ’зæртæ хуарз, Тазар! Нæбал мæ базудтай? Уогæ ци дессаг æй... Еуæй-еу хатт мæхуæдæг дæр мæхе нæбал базонун.
Т а з а р. Нæ дæ зонун æз. (Фæстæмæ фæрраст æй).
Б у дз у л а (æ надбæл æрлæудтæй). Барæнæ минкъи!
Т а з а р. Ка дæ?
Б у д з у л а. Нуртæккæ мæ æргъуди кæндзæнæ. Рагæй бæлдтæн дæ фæууинунмæ, Тазар, æма дæ кæдæй-уæдæй иссирдтон. Ду ба мин исон ледзунмæ гъавис? Уанцон нæй, фиццаг бал æрнимайæн не ихæстæ.
Т а з а р. Еуварс, Будзула, неци ди дарун!
Б у д з у л а. Саис! Кæми æй мæ бæстæ? Кæми ’нцæ мæ бæгъатæр æрдхуæрдтæ: Хъайтар, Барназ, Аспарухъ, Майрæн-Сау? Кæми ’нцæ æрмæстдæр мах æфсади ка ’дтæй, еци фондз мин алайнаг цæргæси?!
Т а з а р. Мæн фуд син неци адтæй!
Сабургай æмбурд кæнунцæ сувæллæнттæ.
Б у д з у л а. Æрмæстдæр дæу фуд! Дæу хузæнтти фуд! Ду дæ мæ тоггин! Ду лæбурдтай агъуд куййау дæхеонтæмæ, мæнмæ!
Н а н а. Нæ, нæ! Е æверхъау æфхуæрд æй! Е æгæр æй, хуарз лæг!
Б у д з у л а. Æгæр, зæгъис? Игъосæ, мадта! Еу бон Хъайтар цæттæ кодта не ’фсади. Гъæуама бабæй сæмæ балæбурдтайанæ. Фал нæбæл æнæнгъæлти нæ фудголтæ фæстегæй сæхе ниццавтонцæ, фид мондаг хонтау... сæ разæй ба тахтæй мæнæ Тазар! Бæргæ ’ймæ гъавтон, фал мин раервастæй. Æрмæст ин
мæ фат æ галеу къах баййафта - æ хæцъæфи ниннæхстæй. Равдесæд æ къах - къулух ибæл цæуй... Уой фæсте базудтон: æлхæд адтæй Тимури адæмæн сугъзæринтæ, лæвæрдтæй.
Н а н а. Нæ! Мæнгæдтæ дзорис! Нæ, нæ, уæд сæ хæццæ цæмæннæ ’й нуртæккæ?
Б у д з у л а. Уомæн æма Тимур уæйгæнгутæн нæ хатир кæнуй, сауæнгæ æхе хуæрзгæнгутæ ку уонцæ, уæдцæр. Ка фæнди уæд - мæлæт! Æвæццæгæн æй Тазар ку балæдæрдтæй, уæд ледзæги фæцæй.
Т а з а р. Ма ймæ игъосæ, кизгæ! Сайгæ дæ кæнуй!
Н а н а. Цæмæн?
Т а з а р. Рагæй дæр ми æ уодесæг уинуй!
Н а н а. Цæмæн?!
Т а з а р. Уомæн æма... лæгдæр си дæн тугъди будури!
Б у д з у л а. Лæгдæр? (Æ кард фелваста.) Кæрдтæй равзарæнтæ!
Т а з а р. Ма мæ тæрсун кæнæ! Æз Хуцауæй æндæр некæмæй тæрсун! (Фæстæрдæмæ.) Мæ кард!
Кард ин рахастонцæ. Кæрæдзей комкоммæ æрлæудтæнцæ.
Б у д з у л а. Не скæнæгæн табу!
И н н е т æ. Табу!
Б у д з у л а. Маргæ!
Т а з а р. Маргæ!
Тох кæнунцæ. Тазар фæццæф æй, æ кард æрхаудтæй.
Б у д з у л а. Маргæ дæ нæма кæнун. Хелæ бал илгъаг золкъау!
Н а н а. Ести зæгъæ, Тазар! Бамæ ’ууæндун кæнæ, æназум ке дæ, уобæл! Кенæ ба, соми дин кæнун, устур бæллах æрцæудзæнæй, Тазар! (Паузи фæсте.) Зæгъай æргом — раст дзоруй аци лæг?
Т а з а р. Нæ дзоруй, нæ!
Н а н а. Басоми кæнæ нæ мард мадæ ма фидæй, не ‘нсувæрти тогæй!
Т а з а р. Æз... гм... соми кæнун...
Н а н а. Мæ зæрдæмæ нæ цæуй дæ дзурд! Мæ цæститæмæ комкоммæ кæсæ! Уæдæйти загътай: «Хуцауæй æндæр некæмæй тæрсун». Ард бахуæрæ æ номæй. Мæнгæ ку зæгъай, уæд зиндони цæхæри содздзæнæй дæ сæр! Рæстдзийнадæ — уæдта дин Хуцау тæрхонгæнæг фæууæд!
Т а з а р. Ард хуæрун... (Фæгъгъосæй.).
Н а н а. Æрмæстдæр рæстдзийнадæ!
Б у д з у л а. Уæд ма дин, кай зонуй, Хуцау фæттæрегъæд кæна.
Т а з а р (æрхаудтæй æ зонгутæбæл). Ниххатир кæнтæ! Туххæй, æнхъерæн кæнгæй мæ тардтонцæ сæ разæй!
Н а н а (имисуй). «Бæхрæгъæуттæ, мулк». Нур æй балæдæрдтæн, кæцæй дæмæ ’нцæ, уой! Æверхъау миуæ! Æверхъау исæфт! Æверхъау ходуйнаг! (Паузæ.) Нæбал ес аланти номдзуд паддзахадæ! Нæ гъæздуг, нæ дидинæгкалгæ зæнхæ æдзæрæг будур фестадæй... Содзунцæ сахартæ ’ма гъæутæ. Нæ фæсевæди тог кæлуй. Зæронд лæгтæ ма æдух силгоймæгти æгъатирæй цæгъдунцæ. Кустгъон адæми уацари тæрунцæ фонси æргъæуттау. Ка си фæййервазтæй, етæ ба сæхе римæхсунцæ гъæддæ ’ма хуæнхти. Мадтæлтæ сæ цæуæти нæбал ерунцæ, цæуæт ба — сæ нийергути. Сæ дууетæ дæр кæунцæ, дзиназунцæ, судæй мæлунцæ, незтæ сæ цæгъдунцæ... Ду ба?! Уони тог æма ровдзæй, уони цæстисугæй мулкитæ кæнис?
Т а з а р. Мæ бон неци адтæй!
Н а н а. Адтæй! Рамардайсæ фæлтау! Дæ нийерæг бæсти сæрбæлтау!
Б у д з у л а. Дори сæрбæл ку райгурдтайнæ, уæддæр æй гъæуай кæнинæ! Уомæн æма мæн дор æй! Мæ райгурæн бунат æй!
Н а н а. Де ’нсувæрти, дæ фиди мæрдтæ лæуунцæ итигъд будури æма сæ нигæнæг нæййес. Халæнттæ син сæ цæститæ къахунцæ, æма сæ еу расорæг нæййес. Фудголтæ сæбæл кæл-кæл кæнгæ сæ бæхтæ баскъæрунцæ, раст цума инайнæ кæнунцæ сæ моси æма сæ еу бауорамæг нæййес. Ду ба?! Сæ сугъдæг ном син мулкитæбæл уæйæ кæнис?! О-о! Ме ’намонд сæр! Ме ’нсувæр уæйæгæнæг.
Б у д з у л а. О, куд цинæ кæнгæ дæ рарветинæ... фал дин мæнæ дæ хуæри хатир. Цæрæ еци ходуйнаги игаки хæццæ!
Н а н а. Хатир? (Кæсуй, æ аллифарс ка лæууй, еци сувæллæнттæмæ.) Æма атæ ба? Ци зæгъдзæнæнцæ атæ? Æрмæст æндагонæн не ’нгъезуй уæхæн фудмиутæ? Хеонæн ба хатир? Нæ! Гъæуама ’й зононцæ, уинонцæ æма сæ зæрдæбæл даронцæ, алантæ некæд некæмæн хатир кодтонцæ гадзирахат миуæ! Æма нурдæр некæмæн ес хатир! Рахæссетæ мин мæ сагъæдахъ!
Неке ймæ неци хæссуй. Æма ’й уæдта æхуæдæг лæгæтæй радавта.
Еугурæйдæр æнæдзоргæй лæуунцæ.
Т а з а р. Барæнæ, мæ хуæрæ. Уотæ ку загътай: «Хуцау дин тæрхонгæнæг фæууæд».
Н а н а. Махæн равардта еци барæ Хуцау. (Райста фат æма æндурæ.) Æ къохтæ ин бабæдтетæ!
Т а з а р. Нæ гъæуй, Будзула!
Н а н а. О Хуцау, ниххатир кæнæ... Силгоймаг гъæуама цард дæдта лæгæн. Æз ба инæй есгæ кæнун нуртæкки. Лæгсирдтæ адæми ’хсæн цæрун аккаг нæ ’нцæ! (Нигъгъавта Тазармæ, æвеппайди æруагъта æ сагъæдахъ.) Нæ-æ! Мæ бон нæй! Куд исесон мæ къох мæ мадизæнæгмæ? (Фехста æ сагъæдахъ æма никкудтæй.) Мæ еунæг æнсувæр! (Æвеппайди фæгъгъос æй.).
Т а з а р. Мадта хатир?! (Бацудæй Будзуламæ.) Мæлæт мин, Будзула! Корун ди мæлæт!
Неке неци дзоруй.
Н а н а. Ра ’й æндæ кæнтæ!.. Кæцæй нæбал раздæха, уордæмæ!
Т а з а р. Боз дæн, мæ хуæрæ!..
Æндæмæ фæррастæй, Будзула, Ацæ æма Базуг æ фæдбæл.
С а у – С а т æ г. Де ’нсувæрæй, Нана!
Н а н а. Ме ’нсувæрбæл фæккудтæн нуртæкки. Ме ’нсувæрæн фæндараст загътон æз. (Архайуй æхе федарæй æвдесунбæл.) Цотæ сумах дæр! (Еугурæйдæр рандæнцæ æнæ стуфæй.) Нана! Мæхе Нана! Зæгъай, куд ма ракæнон? Ку нæбал æй зонун! Ку нецибал лæдæрун! Дæ уарзон еунæг кизгæ
æнсувæрмар иссæй! Мæ тоггин — мæхуæдæг! Фал мин надтæй æндæр гæнæн, Нана! Сувæллæнтгæ гъæуама рæстдзийнадæ уинонцæ! Бамæ лæдæрæ, ниххатир... (Æрхаудтæй).
Æмбæрзæн
ДУККАГ АРХАЙД
Фæндзæймаг фæззинд
Лæгæт. Æ бацæуæн сирди цæрттæй æмбæрзт. Фæззигон мæйрохс æхсæвæ. Тъæригъоси содзуй арт. Кæцæйдæр игъусуй зар. Алли рауæнти бадунцæ кенæ лæуунцæ æма зармæ игъосунцæ Нана, Базуг, Сау-Сатæг.
О айнæг къæдзæх, байгъосæ дзæбæх,
Байгъосæ дзæбæх мæ кадæнгæмæ.
О, адтæн æз дæр лæгау-лæг кæддæр,
Лæгау-лæг кæддæр, амондмæ бæлдтæн.
О, фал мæ амонд разиндтæй мæнгард,
Разиндтæй мæнгард, фæллигъдæй идард.
О, уæууæй, уæууæй, еунæг мæгур æй,
Еунæг мæгур æй, æ сæр æлгъистæй.
О мæгур еунæг, ку фæууа дæ цард,
Ку фæууа дæ цард, ке гъæуй дæ мард?
Кæудзæнæй мæбæл мæ еунæг æмбал,
Мæ еунæг æмбал мæ зарæн хæтæл!
Е ку уодзæнæй гъæргæнæг цæуæг
Гъæргæнæг цæуæг, гъарæнгæ гæнæг.
Б а з у г. Будзула!
С а у – С а т æ г. Будзула!
Н а н а. Будзула!
Б а з у г. Æнкъард зар!
С а у – С а т æ г. Хъæбæр æнкъард!
Н а н а. Зæрдæ имæ унгæг кæнуй. (Лæгæтмæ бацудæй).
Зар æрбахæстæг æй æма банцадæй.
Б а з у г. Замманай мæйрохс æхсæвæ!
С а у – С а т æ г. Рæсугъд æхсæвæ!
Б а з у г. Цæуæн ракæсæн.
С а у – С а т æ г. Цæмæн?
Б а з у г. Магъа.
С а у – С а т æ г. «Магъа»! «Магъа»!.. Цæуæн.
Рандæнцæ.
Идардæй æрбайгъустæй циуавæрдæр гур-гур.
Н а н а (рацудæй). Базуг! Уæ Базуг!
Б а з у г (æрбауадæй). Мæнæ дæн, Нана!
Н а н а. Уæд е циуавæр гур-гур æй, цума?
Б а з у г. Магъа... Кæд арви нæрун æй.
Н а н а. Арви нæрун? Нæ-æ, е нæрун нæй. Биццеутæ кæмити ’нцæ, Базуг?
Б а з у г. Минкъийтæй фæстæмæ еугурæйдæр сæ куститæ кæнунцæ. Ампал, Ацæ æма Балсæг гъæдæмæ рандæ ’нцæ.
Н а н а. Кæци ’рдæмæ?
Б а з у г. Сау хонхи бунмæ.
Н а н а. Сау хонхи, зæгъис? (Тарстæй.) Æнгъæлдæн уоци ’рдигæй цудæй уæдæйти еци æнахур гур-гур. Сæ размæ ракæсун гъæудзæнæй далæ комæй фæххæрдкæнæнмæ. Фиццаг хатт рандæ ’нцæ æнæ мах. Базуг, исон фæйæутти
хæццæ кæстæрти мабал рарветæ, рæстæгбæл æууæнкæ нæййес.
Б у д з у л а (æрбацудæй). Уæ изæртæ хуарз!
Н а н а. Æгас цо, Дзула. Исбадæ. (Базугæн.) Арсалан ба кæми й?
Б а з у г. Цалдæремæй саумæрæ хæссунцæ нæ хумтæмæ.
Н а н а. Годах æма Хорс ба абони кæми цауæн кæнунцæ?
Б а з у г. Ардигæй рандæнцæ Уорс хонх æрдæмæ, цæхгун сауæдонæмæ.
Б у д з у л а. Етæ дæр хайгин уæнтæ Æфсатий лæвæрдтæй, фал нæмæ æрдхуæрæни цауæйнон ку байрæзтæй. Тæхгæ-тæхгæй цъеуи цæстæ ’ргъæвуй (Базугæн.) Æццæйнæ?
Б а з у г. Магъа.
Н а н а. Ка ’й, ка? Ке бабæй æппæлис? Дæуæн се ’гас дæр «ардхуæрæни лæгтæ».
Б у д з у л а. Мæнæ Базуг. Куд нæ дзи ’ппæлон? Цубур рæстæгмæ цалдæр дзабодури, сикъетæ. (Базугæн.) Цал адтæнцæ, цал?
Б а з у г. Магъа.
Н а н а. Оразмæг ба кæми й?
Б а з у г. Нæ аллифарс зелуй. Абони лæгæти гъæуайгæнæг е йæй.
Æрбацудæй Сау-Сатæг.
Н а н а. Мадта уин мæнæ е ба æрдхуæрæни кизгæ. Сау-Сатæгæй зæгъун. Рамулдга Нанай! Уæледарæс хуйунмæ, алдæмбидтæ зæгъай, цæрдтæ æма цъоппити куститæ - сегасемæ дæр мæнæй фæддæснидæр æй.
С а у – С а т æ г. Сæниат дæр дæсни æй, Боллæ дæр, Естар...
Н а н а. Хуарз, хуарз, мæ хор, цæугæ æма уонæн дæр зæгъæ: фæууотæ конд еци цъоппин цъиндатæ, зумæг æй тагъд. Гъе уæдта нæ гъар хъæппæлтæн ести унаффæ гъæуй, цалинмæ нæма фæууазалæй, уæдмæ.
С а у – С а т æ г. Бæргæ гъæуй, фал нæмæ цæрдтæ фагæ нæма ес.
Н а н а. Уобæл ба нæ лæхъуæнтæ байархайæнтæ. Базуг, мæ хор, тæккæ исон нин цауæни цæугæ’й. Фат æма æндурæй, церхъ æма арцæй кадæриддæр арæхсун райдæдта, уони се ’гасейдæр хондзинан нæ хæццæ.
Б у д з у л а. Мæн дæр ма феронх кæнтæ, кæд уин еу-дууæ цари исамал кæнинæ.
Н а н а. Дæ цæрæнбон берæ!
Сау-Сатæг. Хуйгæ ба сæ бæргæ тагъд ракæнианæ мах.
Н а н а. Дзæбæх мин уотæ, мæ хъæболтæ, дзæбæх. Уалинмæ уæ ракиндзитæ кæндзæнæн æма æмбесонди æфсиндтæ уодзинайтæ. (Сау-Сатæг баевгъудæй медæмæ.) Æрмæст бал уæдмæ раервæзун гъæуй. Фал куд, куд? Никкидæр ма еу зумæг аци лæгæти? Нæугæй бабæй еци гъезæмæрдтæ! Уæззау незтæ, мæлæтдзаг сæйгитæ, æдзард сабити тæрегъæддаг исæфт... Ох, дæдæй, Хуцау, куд бафæлладтæн... Тæходуй, есгæд нин хæдзарæ ку исæнтæсидæ!
Б у д з у л а. Æхуæдæг не ’сæнтæсдзæнæй, аразун æй гъæуй!
Н а н а. Хуцау ку зæгъидæ, бæргæ! Æз ма ин замманай бунат дæр иссирдтон! Ардæмæ хæстæг, хор имæ дзæбæх кæсуй, æ аллифарс — игуæрдæнтæ, фонс хезæн бунæттæ, тиллæги кустæн дзæбæх тъæпъæнтæ, сауæдæнтгæ — хæстæг... Цубур дзурдæй, цæрунæн си алцидæр фагæ, æрмæст косгæ
кæнæ. (Паузæ.) Фал нин æй ка аразуй, ка?
Б а з у г. Магъа, фал нæхуæдтæ дæр сувæллæнтгæ нæбал ан.
Б у д з у л а. Мæнæ уин никкидæр дууæ косæг къохи! Нæ аллифарс къæйдори цæндитæ. Гъæдæрмæгæн дæр ести амал уодзæнæй, бæхтæ нæмæ ес...
Б а з у г. О, хæдæгай, еци бæхтæн дон ку нæма бадардтон! (Фендæбилæй).
Н а н а. Нæ зонун, нæ зонун... Хæдзарæ кæнун хъæбæр устур гъуддаг æй. Нæ, нæма хæссун мæ нифс. Дзæбæх имæ барæвдзæ гъæуй... (Будзула сагъæсти ранигъулдæй, цидæр зæгъуйнаг адтæй, æе бауорæдта.) Рагæй дæ бафæрсуйнаг адтæн... Игъосун дæмæ цалдæр анзи. Цæй дессаги рæсугъд
фæуунцæ дæ зартæ, Будзула, фал æнкъард, фурæнкъард...
Б у д з у л а. Уомæн æма... етæ зартæ нæ ’нцæ, фал гъарæнгитæ, нæлгоймаги гъарæнгитæ.
Н а н а. Гъарæнгитæ? Уæу-уа... Гæр æма алли хатт цæбæл гъарæнгæ кæнис?
Б у д з у л а. Мæ мæнгæ нифситæбæл, ме ’нæ ’рцæугæ бæллецтæбæл...
Н а н а. Дессæгтæ! Уанæбæрæг циуавæри дессаг бæллец уодзæнæй дæу хузæн лæгæн æнæ ’рцæугæ ка æй?
Б у д з у л а. Некæд æй загътайнæ... Мæ цæстæнгасæй дæр æй некæд равдистайнæ. Фал мæ еугæр фæрсис, уæдта... Мæнгæдтæ дзурд нæ зонун... Æрмæст ди рагацау Хуцауи хатир корун! Бамæ лæдæрæ...
Н а н а. Дзорæ!
Б у д з у л а. Цалдæр анзи... Цалдæр æнæкæрон анзи рацудæй, еци дессаги бæхгинбæл ку рамбалдтæн, уобæл. Хуæрзарæзт цауæйнон, хуæцæнгæрзтæй дæсни... Нæ, нæ, хумæтæги цауæйнон на ’дтæй, фал алæмæтгаг силгоймаг, гурведауцæ, рæсугъд! Æ цæсгомæй хортæ-мæйтæ кастæй! Дессаг, — зæгъун, — ка уа? Куд æй базундæуа?! Æма ин райдæдтон агорун æ фæд. Иссæйирдтон арси хæццæ гъæбесæй хуæцгæ. Уæдæй ардæмæ... Зонун æй — дзæгъæли, фал мæ бон нæй мæ сагъæстæй фæййервæзун! Нæй! Куд амондгун уайдæ, е æ зæрди тунтæй ке барæвдауа, е!
Н а н а. Будзула...
Б у д з у л а. Нæ, нæ, ма тæрсæ... мæ сæнтти дæр не ’ндеун дæ фарсмæ балæуун. Уомæн æма... ду... Æз ба... Мæ гæлертæ цæсгонæй фæттæрсдзæнæй лæг!
Н а н а. Тæрегъæд дзубанди кæнис. Æгадæ кæнис, тугъд ке бафхуардта, уони. Уæ цæфтæ ’нцæ лæгдзийнади бæрæггæнæнтæ, ковунаккаг бæгъатæрти нисан.
Б у дз у л а. О Хуцау, мадта мин еу минкъи зæрдæдарæн нифс...
Н а н а. Нæ! (Паузæ.) Дæуæй хуæрзконддæр, хуæрзæгъдаудæр, тухгиндæр лæг нæ зонун уодæгæсти ’хсæн! Фал мæ зæрдæ æндæрæн лæвæрд æй!
Б у д з у л а. Зонун æй! Фал... ниххатир кæнæнтæ Хуцау дæр, е дæр, нæбал ес Хъайтар...
Н а н а. Ес! Мæнæн ес! Æма уодзæнæй!
Б у д з у л а. Хатир. (Паузæ.) Гæр, мадта дæ царди бонтæ уотеми рарветунмæ гъавис, уой номбæл бадгæй? Дæхе амонд ба?
Н а н а. Мæхе амонд ба — аци сувæллæнттти амонд!
А ц æ (æрбауадæй). Нана! Нана! (Кæуй).
Æрбауадæй Б а з у г.
Н а н а. Ци кодтай, биццеу?
А ц æ. Æнамод хабар... Зæйæ... Зæйæ... (Кæуй).
Б у д з у л а Ци? Дзоргæ кæнæ, Ацæ!
А ц æ. Зæйæ ракалдæй æма биццеутæ...
Б у д з у л а. Катæ?
А ц æ. Ампал æма Балсæг.
Н а н а. Мæ бон куд бакалдæй! Мæ хæдзарæ куд фехалдæй! (Æ хъæппæлтæ кæнуй.) Цæун гъæуй тагъд! Агорун сæ гъæуй! Мабал лæууетæ! Ракæнтæ мин бæх!
Б у д з у л а. Нæ, нæ! Дæуæн нæййес цæуæн! Æнафонæй, талингæ’й...
Н а н а. Куд нæ сæмæ цæууон, куд нæ, арв ку фæннæруй, уæддæр мæн ку фæййагорунцæ!
Б у д з у л а. Ести дæбæл ку ’рцæуа, уæд та?
Н а н а. Æрцæуæд мæбæл... цифæндидæр! Куд нæй лæдæрис, ме ’намонд хъæболтæ ’нцæ уоми!
Б у д з у л а. Æма иннетæ ба? Æви етæ ба дæ хъæболтæ нæ ’нцæ? (Нана цидæр исцæйдзурдта.) Хъайтари фæдзæхст ба?
А ц æ. Нæбал сæ гъæуй агорун, Нана. (Кæуй.) Мæхуæдæг æй фæйидтон, куд...
Б у д з у л а. Ацæ, Базуг!
Б а з у г. Кизгуттæ, Нанамæ фæккæсетæ!
Н а н а. О Хуцау! (Æ цæсгон æ къохтæй бамбарста æма се тухстæй æрбадтæй. Будзула, Базуг æма Ацæ фæййаууон æнцæ. Райгъустæй сувæллæнтти кæун.) Ка кæуй? Æй? (Игъусуй берæгъти неун.) Нæ, берæгътæ неунцæ. Етæ дæр, æвæдзи, махау судæй мæлунцæ! (Гъæрзæгау никкодта.) Мæ бон нæбал æй! Нæбал фæразун мæлæтдзаг тох кæнун адæми хæццæ, сирдтæ ’ма æрдзи хæццæ. Зумæг æрхæстæг æй, сабитæ æнæхуæргæ, бæгънæг... Цæрæн бунат нæййес, фæккæсæг нæййес... Кæми дæ, Хъайтар, исæфгæ дин ку кæнун?! Кæми дæ, мæ еунæг изæд?! Ниххатир кæнæ еци дзурд, Хуцау! Фал дæхуæдæг дæр бунтон раст нæ дæ — цæмæн мин байстай, арв æма зæнхи ’хсæн ци еунæг равзурстон, фæццæрунмæ ке хæццæ бæлдтæн, мæ хори тунæ, мæ амонд ке худтон, уой?! Цæмæн фе’нæхай дæн мæ кизгон бæллецтæй, мæ сонт зæрди мондæгтæй! (Фæгъгъосæй). О Хуцау, мæ фуртухстæй цитæ фæдздзурдтон... Ниммин хатир кæнæ! Еунæгæй мæ ниууагътонцæ мæ мадæ, мæ фидæ, ме ’нсувæртæ, Хъайтар... Уой фæсте Тазар... (Гъуди кæнуй.) Кай зонуй, раст адтæ, Тазар, — аци сабитæ билæмæ ’рбакодтон, æма мин еугай-дугай хаунцæ... Гæр аци дууæ дæр бабæй... Нæ, нæ, ани тæрегъæд нæбал бауорамдзæнæн! Фæлтау... (Исласта кард.) О ме ’скæнæг, кæд мин мæ цард æрмæстдæр гъезæмарæн равардтай, уæд æй райсæ фæстæмæ! О, о! Алкæд сау уодхæрдти бæсти — сау ингæн хуæздæр! (Кард æ реумæ фæййаразта.) Хъайтар!
X ъ а й т а р (гъæлæс). Барæн! (Рæвдауæгау.) Бафæлладтæ? Æви фæттарстæ?
Лæгæти фарс ниррохс æй æма дзи разиндтæй X ъ а й т а р æ тугъдон дарæси.
Н а н а. Хъайтар!
X ъ а й т а р. Куд тагъд ди ’рбайронх æй мæ фæстаг курдиадæ?
Н а н а. Нæ ми ’рбайронх æй, Хъайтар!
X ъ а й т а р. Мадта куд уадзис зумæги къæсæрбæл æнагъом сабити уазал лæгæти æвæгæсæгæй? Зин æй? О, ай-гъай! Бафæразæ, мæ зинаргъ! Ма бакомæ сæттун цифæнди зиндзийнадæ, циуавæр фæндуй гъезæмайраг фæлтæрæнтæн дæр! Æрмæст багъæуай кæнæ аци сабити!
Н а н а. Хуарз, хуарз, Хъайтар! Корун, ниммин хатир кæнæ мæ уæдæйтиккон аллайаги рæдуд. Тазарæн еци æгъатир тæрхони фæсте... æнæхъаурæ, æнæбазур цæргæсау исдæн.
X ъ а й т а р. Дæу тæрхон надтæй. Хуцауи тæрхон адтæй. Бафæразæ, мæ зинаргъ! (Фæййаууон æй).
Н а н а. Хъайтар! Кæми дæ, Хъайтар?! Ци ’й а? Фун æй? Æви бабæй сæнттæ цæгъдун? Нæ, нæ, уотæ мин загътайдæ, ай-гъай! Нæ, нæ, мæ зинаргъ, нæ сæ ниууадздзæнæн уазал лæгæти. Хæдзарæ! Цифæнди зийнæйдæр аразæн хæдзарæ!
Æмбæрзæн
Æхсæзæймаг фæззинд
Рагон хуæнхаг тъæпæнсæр хæдзарæ, æ кæрон нæ зиннуй. Тургъæ. Æ аллифарс дорæй даст горен. Еу къуми - гомори, инне ’рдигæй колдуар, æ дууæ фарси - дууæ бæласи. Алли рауæнти бадæн дортæ, даргъ къела, бæласи бундзæфхæдтæ, сæнарæ. Фæсарæфтæ. Б а з у г цæгъдуй хæтæлæй, Сау-Сатæг имæ игъосуй æма гъудити ранигъулдæй.
С а у – С а т æ г. Адæмæн дессаги зар! Мæ зæрдæ мин фæррæхуста куддæр... Ду... Ду дæ...
Б а з у г. Магъа. Будзула мæ исахур кодта хæтæлæй цæгъдунбæл... Æндæра æз ци? Неци...
С а у – С а т æ г. О, неци... Будзулайæй дæснидæр дæ ду!
Б а з у г. Магъа... Ду ба æригон Нанайæй рæсугъддæр. (Фефсæрми æй).
С а у – С а т æ г. Цæгæй? Æви «магъа»? (Ходуй).
Н а н а (уæлхæдзарæй кæд фæззиндтæй, уой нæ базудтонцæ). Куд рæсугъд æй сæ уарзт! О не ’скæнæг Хуцау, сæ цард дæр син уотæ рæсугъд искæнæ! Ма син бауадзæ сæ сугъдæг зæрдитæ с’ маргæйдзаг кæнун! Басæ гъæуай кæнæ уæхæн фудæнхæй! (Имисгæй.) О Хъайтар, мах дæр уотæ амондгун бæргæ адтан кæддæр!
А ц æ (рацудæй гæркъа амайгæ). Мæнæн мæ гæркъа нуртæккæ дæр цæттæ ’й, фал ду ци косис, ду?
Б а з у г. Магъа, архайун æз дæр. Ма тæрсæ, дæ гæркъа æнæ цæг нæ уодзæнæй.
Н а н а (уæлхæдзарæй). Нæ бæлццон нæма зиннуй? Будзулайæй зæгъун?
Б а з у г. Магъа... Æнгъæлдæн нæма.
Н а н а. Сау мегътæ бабæй берæгъти каст кæнунцæ. Æвæдзи, тухгин уарун уодзæнæй. Дзæбæхæй ку ’рбацæуидæ...
А ц æ. Æма Будзула кæми й?
Б а з у г. Будури гъæутæмæ рандæй, хуæцæнгæрзтæ агорунмæ махæн. Гъæдин кæрдтæй, дан, уæ кæдмæ ахур кæнон. Афонæ, дан, уин æй æцæг церхъитæ райсун.
А ц æ. Хъæбæр раст зæгъуй!
Б а з у г. Гъей, дзубандибæл фæцан, февналæн нæ кустмæ.
Г ъ æ л æ с (фæссценæй). Базуг! Фæммæмæ кæсай тæскъæ бийунмæ!
А ц æ (фæссценæмæ). Дæхуæдæг, Тулар. Лæг дæ нур... Ходуйнаг æй æдзох æнхус агорун. Лæгау лæг гъæуама алци дæр зона.
Б а з у г. Кæдмæ дæ ахур кæндзæнæй Нана?
Рацудæй Г а г а гъæдин киндзи хæццæ.
Г а г а (киндзæн). Æз Нана дæн, балæдæрдтæ, Нана! Æма мæмæ игъосгæ кæнæ. Ардæмæ рацæуай! Кæмæ дзорун æз?! Мæнæ-ма ами æрлæууæ! Ци ниггубур дæ? Мæ цæститæмæ мин кæсæ! Дæ дзабур цæмæннæ бахудтай? Æви ма минкъи сувæллон дæ? Магоса ходуйнаг æй! Хускъастау — æгадæй. (Æ ростæ ин цъинггитæ кæнуй.) Гъеууотæ дин! Мæнæ дин!
А ц æ. Барæнæ, Гага, цæбæл æй марис?
Г а г а. Мадта Нанамæ цæмæннæ игъосуй?
А ц æ. Æма кæд фæууидтай Нанай сувæллæнттæ нæмгæ? (Гага неци дзоруй.) Некæд. Куд фæззæгъуй, е ди феронх æй: «Кæрæдзей уарзетæ! Кæрæдзей зæрдихудтæй тæрсетæ!» Ду ба? Мадта ’й барæвдауæ, тæрегъæд æй, мæгур!
Г а г а (киндзæн). Цæй, гъо, фæррæдуддæн. Гъæйдæ, æрсабур уо!
Æрбацудæнцæ Б а с е т æма Е с т а р донæйдзаг къустелти хæццæ.
А ц æ. Дес цæбæл фæккæнун, кизгуттæ, уой зонетæ, уæ къустелтæ уæхецæй устурдæр, уотемæй ба сæ цъоппидзагæй куд исхæссетæ? (Базугæн.) Æццæйнæ?
Б а з у г. Магъа. Басетæн нæ зонун... Естар ба тухгин æй. Нæ бийнонтæ еугурæйдæр тухгин адтæнцæ.
А ц æ. Æ бонæй уа, уой ка ’ркордзæнæй! О, хæдæгай, уæ донæй мин февæрайтæ, мæнæ си мæ бæлæстæн раниуазун кæнон! (Дон кæнуй бæлæстæбæл).
Г а г а (киндзæн). Æрсабур уо, мæ хор! Æрсабур уо, Нанай рахес цæстæ! Нæ фалæ ма дæ Нанайæн еу дзæбæх кафт ракæнæ. (Æ цъухæй ин цъæгъдуй æма æ хæццæ кафуй).
Базуг сæмæ аййевæй игъосуй, уæдта æ ронæй хæтæл фелваста æма син цæгъдун райдæдта. Иннетæ æрдзæф кæнунцæ. «Гъаст» истухгин æй.
Б у д з у л а (æрбацудæй). Цард æма уин фарнæ!
Б а з у г. Дæхецæн дæр фарнæ!
Еугурæйдæр ибæл цийнæ кæнунцæ: «Будзула æрбацудæй!
Æгас цо! Кæддæриддæр фæндаг раст уо!»
Б у д з у л а. Дзæбæх ке айтæ. Хуцау зæгъæд, кæддæриддæр уæ кафгæ ма заргæ куд æййафон. (Базугæн.) Фал, еу фæззелæни дæ цагъд бунтон раст нæма ’й. Мæнæ байгъосай! (Хæтæл фелваста, цæгъдуй.) Балæдæрдтæ? Равзарай! (Базуг цæгъдуй.) Хъæбæр хуарз, ме ’рдхуард! Рамулдтай бабæй!
Н а н а (рацудæй). Æгас нæмæ цо, будуйраг иуазæг!
Б у д з у л а. Æгас нин уо берæ æнзти, Нана!
Н а н а. Игъосун дæмæ, Дзула, куд рауадæй дæ балци?
Б у д з у л а. Ци дин зæгъон... Базуги загъдау, магъа... Æртæ бæхи бабæй бафтудæй мæ къохи. Бæргæ сæбæл фæццийнæ кодтон, фал еу афони бон æрбаталингæ ’й, арв æма зæнхæ кæрæдземæ фæллæбурдтонцæ, æма мæ бæхтæй еу билæй рахаудтæй... Мæ бон ин нецибал иссæй.
Н а н а. Дæхуæдæг ке байзадтæ æнæ фидбилизæй!
Б у д з у л а. Иннæ дууæ мин æрбаервазтæнцæ æд хуæцæнгæрзтæ.
Н а н а. Цæй бæрцæ?
Б у д з у л а. Ци фæразтонцæ, уой! Æцæг тугъдон гæрзтæ. Не гасей фагæ нæма уодзæнæнцæ, фал... Хестæрти къуармæ бал уæддæр ести уодзæнæй... Уæдмæ бабæй амæлдтæ кæндзинан!
Н а н а. Дæ цæрæнбон берæ! Æнæ дæу син цитæ кодтайнæ...
Б а з у г. Бахатир кæнтæ... Фæйинæн син нæййес? Кæд гæнæн...
Б у д з у л а. Цæмæннæ син ес?! Æрмæст фæстæдæр. Æнхæст иннетæ дæр сæ куститæй æрбаздæхонцæ æма не гас дæр уартæ фæзæмæ, нæ тугъдон гъæзтитæ кæнунмæ.
О р а з. Нæуæгæй бабæй? Ох, куд сæ нæ уарзун, Нана, куд...
Н а н а. Æз дæр, мæ хъæболæ. Фал нин æндæр гæнæн нæййес! Тухгæнгутæй кæддæриддæр тæссаг æй, мæ хортæ. Гъæуама цæдтæ уайтæ сæ нихмæ ’рлæуунмæ! Гъæуама арæхсайтæ фат æма æндурæй, æндон церхъæй тохунмæ! Гъæуама уæ фиддæлтау уайтæ тухгин æма нифсхаст, уодфедар, æхсист!
Б а з у г. Уома бал си еунæг уæддæр равзарæн. Ци ’нцæ, циуавæр æнцæ, сæ дæргъæ, сæ уæзæ... Æндæра гъелтæбæл исахур ан æма...
Б у д з у л а (фæссценæмæ). Радавайтæ еу кард!
А ц æ (рауадæй церхъи хæццæ). Цæттæ ’й, Дзула! Мæнæ!
Б а з у г. Рахæссай, фæйинон! (Райста кард. Будзулайæн.) Дæу карди хузæн æй.
Б у д з у л а. Дæ фарсбæл æй бабæдтай, федауй дæбæл? (Базуг бæдтуй кард æ фарсбæл.) Мабал æй райхалæ! Раст цума дæуæн конд адтæй! Мадта сæ равзарæн, зæгъис? (Исласта æхе кард).
Б а з у г. Магъа... Равзарæн!
Нихæй нихмæ æрлæудтæнцæ. Сæхе æрцæттæ кодтонцæ.
Б у д з у л а. Не ’скæнæгæн табу!
И н н е т æ. Табу!
Б у д з у л а. Маргæ!
Б а з у г. Маргæ!
Тохунцæ. Еу дзæвгарæ неке хъæбæрдæр кæнуй. Æрæгиау ба Будзулай кард еуварсмæ расхъиудтæй.
Б а з у г. Хатир!
Б у дз у л а еу усмæ фæкъкъех сей). Цæмæн «хатир»? Цæргæ! Аци кардбæл нурмæ некема фæууæлахез æй... Фиццаг хагг фесхъиуттæй мæ къохæй. Æвæццæгæн фæззæронд æй Будзула... Кенæ бафæлладæй уæззау нæдтæбæл... Нæ, нæ, Дзула, лæг æрлæудтæй дæ нихмæ, тухгин тугъдон, алайнаг! Байрæзтæнцæ! Лæггæ ’нцæ! О ме ’скæнæг, арфæ! Нана! Барæ нин радтæ æма нин исковæ, цæмæй абонæй фæстæмæ Базуги хæццæ уæн æрдхуард æнсувæртæ! Сау-Сатæг, ковæн къос!
Сау-Сатæг хæдзари фæммедæг æй.
Н а н а. Уæддæр бабæй тагъд кæнис, Дзула. Лæппо æригон æй нурма, ду ба...
Б у д зу л а. Æз ба зæронд! О, уой балæдæрдтæн нуртæкки! Фал мæ фиди ’рдхуард æхецæй нæ — мæнæй дæр кæстæр адтæй, уотемæй ба сæ Хуцау раст цума кæрæдземæн равардта!
Б а з у г (Будзулайæн). Кæд мæ æцæгæй дæ сæрмæ хæссис, уæд... Корун ди, Нана, цалинмæ нæма æрфæсмон кодта...
Н а н а. Фæсевæд дæр ами нæ ’нцæ æма... Ауæхæн гъуддагæн гъæуама се ’гас дæр æвдесæн уонцæ!
Б у д з у л а. Не ’вдесæнтæ Хуцау æма æ зæнхон минæвар Нана. (Сау-Сатæг бæгæний къос рахаста.) Гъемæ сумах фæндон фæууæд! (Райста бæгæний къос).
Н а н а. Æрдхуард æнсувæрæн агурдæуй бæгъатæр ка уа, лæгдзийнадæ равдесунгъон ка уа, уæхæн сахъ игурдти. Иссердтонцæ кæрæдзей Базуг æма Будзула! Фæндуй сæ абони æнсувæртæ зæгъун. Амондгун бон фæууæд! (Будзула æма Базугæн.) Рахезайтæ ардæмæ! (Етæ дæр æрлæудтæнцæ æ дууæ фарсемæ.) Дзоретæ, мадта, радугай, æз куд дзорон, уотæ! Абонæй фæстæмæ ду — мæ уарзон æнсувæр! Ард хуæрун!
Б у д з у л а. Абонæй фæстæмæ ду - мæ уарзон æнсувæр! Ард хуæрун!
Б а з у г. Абонæй фæстæмæ ду - мæ уарзон æнсувæр! Ард хуæрун!
Н а н а. Цæттæ дæн дæу сæраппонд мæ цард радтунмæ дæр. Ард хуæрун!
Б у д з у л а. Цæттæ дæн дæу сæраппонд мæ цард радтунмæ дæр! Ард хуæрун!
Б а з у г. Цæттæ дæн дæу сæраппонд мæ цард радтунмæ дæр! Ард хуæрун!
Н а н а. Уæ зæрдитæ баеу æнцæ! Нур ба баеу кæнтæ уæ тог! (Будзула æма Базуг фелвастонцæ минкъи кæрдтæ, се ’нгулдзитæй тог рауагътонцæ къосмæ, сластонцæ сæ церхъитæ, кæрæдзебæл федар ниххуæстæнцæ æма еумæ баниуазтонцæ бæгæний къос.) Аци ардбахуæрд кадгинæй хæссетæ уæ рамæлæти бонмæ! Фæнзуйнаг уæд не ’нсувæртæн, нæ хуæртæн, не ’гас адæмæн!
О р а з (æрбауадæй). Нана! Нана!
Н а н а. Ци ’рцудæй, Ораз, дæ лæф-лæф ку ссудæй?
О р а з. Дæлæ нæмæ кадæртæ ’ссæуй. Дууæ лæги.
Н а н а. Рахонæ сæ медæмæ, мæ хор.
Ораз фе ’ндæбилæй. Фæззиндтæнцæ Хъара-Сау æма Бахор. Сæ размæ рахизтæй Нана.
Хъ а р а – С а у. Цард æма уин фарнæ!
Н а н а. Уæхецæн дæр фарнæ!
Хъ а р а – С а у. Мах агорæн, Нана ке хонунцæ, уой.
Б а х о р. Æвæдзи ду дæ?
Н а н а. Æвæдзи. Бадгæ скæнтæ. (Æрбадтæй).
Хъ а р а – С а у. Сбаддзинан, гъай-гъай. Идардæй æй нæ балци. (Æрбадтæнцæ).
Б а х о р. Байамонæн нæхе.
Хъ а р а – С а у. Хъара-Сау мæ хонунцæ.
Б у д з у л а. Будзула мæ ном. Ме ’нсувæр Базуг. (Амонуй Базугмæ).
Хъ а р а – С а у. Мæнæ е ба Бахор,мæ рагон æрдхуард. Нæ гъæу æрбæстон æй фæсхуæнхтæмæ рахезæн æфцæгæн æ тæккæ буни. Рæбундæр цæрæг аци коми нæййес.
Б а х о р. Адæмæй æрвист дæн. Синхаг комæй дæн.
Хъ а р а – С а у. Дæ хабæрттæ дин зонæн. Игъуст æнцæ æгас хуæнхбæсти дæр ацал-ауал анзи.
Б а х о р. Комæй-коммæ æндæр кой нæбал ес.
Хъ а р а – С а у. Гъема нæ рарвистонцæ, базонетæ, дан, ка ’й, ци æй, циуавæр æй, куд æма ’ймæ ци хузи фæккæсæн...
Н а н а. «Фæккæсæн» зæгъис? Уæ цард берæ! О Хуцау, уотæ ку уаййанæ фæккæсунмæ кæддæриддæр, бæргæ! Уæд нæ цард ауæхæн кæуйнаг уавæри нæ уайдæ! Фал нæ...
Б а х о р. Адæм фæрсунцæ, куд дин бантæстæй еци дессæгтæ бакæнун, зæгъгæ?
Хъ а р а – С а у. Куд ратудтай зиндонæй уойбæрцæ сабити? Куд æрбаервæзисæ сæ хæццæ еци тæссаг нæдтæбæл, уал æма уал хатти? Еуæрдигæй лæгмартæ, инне ’рдигæй гъæддаг сирдтæ! Дæу хæццæ ба бæгънæг, судæймæлæг сабитæ... Еу къуар, иннæ къуар, æртиккаг...
Б а х о р. Ацал-ауал анзи се гасей куд багъæуай кодтай?
Н а н а (гъуди кæнгæй). Се ’гасей нæ... Хатир, Хъайтар, се ’гасей нæ багъæуай кодтон... Ка си надбæл, ка мин фиццаг æнзти лæгæти рамардæй, ка зæи буни... ка... Æма мин уонæй алке фесæфт дæр мæ зæрдæ стонæгау адтæй!
Б у д з у л а. Куд неке уи фæззиндтæй уæд æнхусмæ?! Фал нур, сæ къæхтæбæл ку слæудтæнцæ, уæд...
Хъ а р а – С а у. Дзæгъæли нæ ’фхуæрис. Куд дзорунцæ, уотемæй, дан, дæ хæссуйнæгтæй еу устур къуар байурстай коми цæргутæбæл...
Н а н а. Устур къуар? Е фагæ надтæй! Нæ адæми уедагæ ку фæццæй ’скъудæй!
Хъ а р а – С а у. Тухст рæстæг адтæй æма алкедæр æхе сæри кой кæнунбæл фæцæй, æхе уод ервæзунбæл иссæй!
Н а н а. Гъе, гъе, мæ боц иуазгутæ, амонгæ уин нæ кæнун, фал æнхус дæр раст гъеуæхæн тухст рæстæги фæгъгъæуй. Не сæфт дæр гъеуæд æрцудæй æма нæхе сæртæ, нæхе уодтæ нæ бæстæй зинаргъдæр ку схудтан.
Хъ а р а – С а у. Ниххатир кæнæ, фал... дæ маст дзоруй нуртæккæ.
Б а х о р. Æма ци дессаг æй, уал анзи уæхæн фудгъезæмæрдтæ...
Хъ а р а – С а у. Уомæй ба раст дæ. Гъезæмарæ гъæуагæ на дтæй. Фал нурба дессæгтæ æма тæмæстæ: гур-гургæнгæ бийнонтæ. Замманай хæдзарæ. Куд уин бантæстæй уæхæн галауан исаразун?
Н а н а. Цард хъазар æй, тухст лæг — амалгун. Берæ ’йбæл фæхъхъиамæт кодтан, зинтæй, тухститæй... уæддæр æй исаразтан! Нæхе къохтæй! Нæхуæдтæ! Уалинмæ ба æ аллифарс ирæздзæнцæ нæуæг хæдзæртгæ, гъæутæ æма сæ фиццаг цæргугæ уодзинайтæ сумах! Берæ муггæгти хестæртæ уодзинайтæ сумах, Нанай хъæболтæ!
Б а х о р. Хуцау зæгъæд!
Хъ а р а – С а у. Зæгъæд! Фал нæ цуди сæр... Дуккаг хатт æй зæгъæн, бæлвурддæр базонун цæмæй уæмæ фæккæсæн — уæледарæс, хуæлцæй.?
Н а н а. Арфæгонд уотæ. Уонитæй бал ервæзæн бæргæ. Цидæр фонси мортæ исамæлдтæ кодтан... Сæ фид æма се ’хсир — нæ хуæруйнаг, сæ цæрдтæ ’ма сæ цъопп — нæ хуссæнтæ, нæ дарæс. Ес нæмæ зæнхи гæппæлтæ...
Б у д з у л а. Цалдæр анзи сæмæ къæссатæ ма хурдзинтæй сау мæрæ фæххастонцæ. Баси ’йтауæн мæнæуæ, хъæбæрхуар, зæтхæ.
Н а н а. Хуцауи фæрци нæхе дарунгъом фæцан... Фæккæсун ба...
Б у д з у л а. Гъай-гъай гъæудзæнæй фæккæсун, мæнæ хæдзæрттæ аразун ку райдайæн, уæд.
Б а х о р. Хæдзæрттæ, зæгъис?
Н а н а. О, берæ хæдзæрттæ, уæдта алли рауæнти, нæ хестæр лæппотæн. Гъæуама сберæ уонцæ æма нийвулонцæ алли ’рдæмæ. Бæргæ ма син раги æй бийнонти сагъæс кæнун, фал кæстæртæ гъæуй мах! Гъæуама фулдæр кæнæн
цифæнди зинæй дæр! Минкъи адæм исæфтмæ цæунцæ! Минкъи адæм æнæ федæн æнцæ!
Б у д з у л а. Нæ, нæ, уомæй нæ бахезæд Хуцау!
Н а н а. Гъæуама тагъд низмæлонцæ алантæ!
Хъ а р а – С а у. О, берæ нин цæрай алцизонæг, идардмæуинæг Нана! Ме ’скæнæг Хуцауæй уин ард хуæрун — некæд ми байрагæс аддайонцæ аци дессæггæ, мæхе цæстæй сæ кунæ фæйидтайнæ, уæд. Бантæсæнтæ уæ фæндтæ!
Б а х о р. Мах ба цæттæ кæддæриддæр æнхусмæ!
Хъ а р а – С а у. Кæцæй уæмæ ’рцудæй уой бæрцæ хъаурæ?
Н а н а. Кæрæдзей уарзæн!
Хъ а р а – С а у. (исистадæй). Цæй!
Исистадæй Бахор дæр.
Н а н а. Е бабæй куд, Будзула?..
Б у д з у л а. Барæнтæ, цæнхæ, кæрдзин. (Исистадæй).
Хъ а р а – С а у. Кæрдзин æфсес уотæ! Нæ нин ес лæууæн — нæ фæндаг даргъ, нæ ампъез цубур. Цард æма уин фарнæ!
Н а н а. Уæхецæн дæр фарнæ. (Рандæй, Бахор дæр æ фæсте).
Æмбæрзæн
Æвдæймаг фæззинд
Еци тургъæ бабæй. Колдуари дууæ фæрсемæ арæзт бæлæстæ исирæзтæнцæ. Тургъи астæу лæууй Н а н а. Алли фарс - фæсевæд. Еугурæйдæр бæрæгбони дарæси, æнцæ хъæбæр игъæлдзæг.
Н а н а (æ цæнгтæ арвмæ ивазгæй). О, не сфæлдесæг Хуцау, фæдзæхсæн дæбæл нæ фиццаг киндзæхсæвæ! Рæстмæ уæд!
И н н е т æ. Рæстмæ уæд!
Н а н а. Нæ фиццаг бинонтæ Базуг æма Сау-Сатæг амондгун уæнтæ!
И н н е т æ. Амондгун уæнтæ!
Н а н а. Радтæ син берæ байзæдтæггæ, Хуцау! Берæ кæстæртæ!
И н н е т æ. Берæ кæстæртæ!
Н а н а. Не ’скæнæгæн табу!
И н н е т æ. Табу!
Æрбацудæнцæ иуазгутæ.
И у а з г у т и х е с т æ р. Киндзæхсæвæн амонд!
И н н е т æ. Амонд!
X е с т æ р. Исæнтæсæд син берæ кæстæртæ!
И н н е т æ. Берæ кæстæртæ!
X е с т æ р. Алантæ æносмæ!
И н н е т æ. Алантæ æносмæ!
Н а н а. Бахезетæ медæмæ! Ацæ! (Хæдзарæмæ ин райамудта).
А ц æ (иуазгутæн). Табуафси! (Медæмæ сæ бакодта).
Н а н а. Дзæбæх сæмæ фæккæсетæ, мæ хортæ! Идарддæр ба нæ унаффæ зонетæ: абони гъæуама, иуазæгæй, фусунæй равдесайтæ уæ лæгдзийнадæ — фат æма æндурæй, церхъ æма арцæй, догъи уайунæй, гъæбесхуæст æма дортæ есунæй. Лæгдæртæн — кадæ æгъдаумæ гæсгæ. Алцæмæйдæр рæвдзæ ан. Ораз, уартæ гъасти еци фæсевæдæн зæгъетæ: кæдæйуæдæй нæбæл кафæн бон искодта æма фæсхæдзарæ фæзи нæбал, фал мæнæ нæхе тургъи кафæнтæ, нæхе хæдзари! Берæ фæууæд фæсхæдзæрттæ, фæскъумтæн! Уадзæ ма нæ цинæ нæра æгас хуæнхтæбæл, æгас дуйнебæл! Уадзæ ’ма ’й зононцæ: æгас æнцæ алантæ! Кафунцæ, зарунцæ алантæ!
Ораз фæййаууонæй. Æрбацудæнцæ Хъара-Сау æма Б а х о р.
Хъ а р а – С а у. Цард æма уин фарнæ!
Н а н а. Уæхецæн дæр фарнæ!
Хъ а р а – С а у. Киндзæхсæвæн амонд!
Н а н а æма и н н е т æ. Амонд!
Хъ а р а – С а у. Хуцау син радтæд берæ кæстæртæ!
Н а н а æма и н н е т æ. Берæ кæстæртæ!
Хъ а р а – С а у. Алантæ æносмæ!
Н а н а æма и н н е т æ. Алантæ æносмæ!
Н а н а. Хабæрттæй уæ нæма фæрсæн. Медæмæ бал, табуафси!
Хъ а р а – С а у. Фæрсайтæ - нæ фæрсайтæ, хуарз хабæрттæ ’рхастан: дууæ хæдзари дæ кæстæртæн цæдтæ... Зæнхи хæйттæ дæр.
Н а н а. Лæхъуæнтæ мин дзурдтонцæ. Хуцауæй уин арфæ!
И н н е т æ. Арфæ!
Н а н а. Табуафси медæмæ!
Иуазгутæ хæдзарæмæ бацудæнцæ.
А ц æ (æрбауадæй). Нана, догъæнттæ цæдтæ ’нцæ!
Н а н а. Рахæссетæ устур дорин къос æма ниуазæнтæ. Ка фæрраздæр уа, уомæн лæвар! (Ацæ хæдзарæй радавта дорин къос æма иннердмæ фæууайуй.) Цæуæнайтæ, кизгуттæ, уæлиндзæй сæмæ ракæсæн мах дæр. (Естари хæццæ иссудæй уæлхæдзарæмæ. Игъусуй догъæнттæ æма кæсгути хъæлæба. (Æхенимæр.) Исирæзтæнцæ! Ислæгтæ ’нцæ! О, берæ мин цæрайтæ! Нур уæмæ уæ нийергутæ ку ’ракæсионцæ! Тургъæмæ ’рбацудæнцæ гъасти фæсевæд.
О р а з. Æрцæгъдай, Дзула! (Фæсевæдæн.) Еумæйаг кафт!
Б у д з у л а. Уой бæрцæ дæр кафетæ! (Цæгъдуй, уæдта ибæл бафтудæй оркестр).
О р а з. Гага!
Кафунцæ Г а г а й хæцææ, уæдта иннетæ дæр. Кафт истухгин æй.
Н а н а сæмæ кæсуй уæлхæдзарæй.
Н а н а. Уинун бабæй номдзуд аланти гуп кафт. Игъосун бабæй сæ тухгин къахæзмæлдæй зæнхæ куд фенкъусуй уой. О номдзуд алантæ! Нæ ’нцæ æнарæхстдæр, æдухдæр сæ байзæдтæгтæй! (Кафт фæцсей.) Уæ цæрæнбон берæ! Уæ фиддæлти алцæмæйдæр уотæ хуарз фæнзетæ!
А ц æ. Нанайæн еу кафт!
Адæм схор-хор кодтонцæ: «Гъай-гъай, еу кафт! Æнæмæнгæ! Дæ хуарзæнхæй, Нана!»
О р а з. Гъæйдæуай, Нана! Некæд дæ фæйидтан кафгæ!
Нæугæй бабæй аразий хъæлæба. Кадæртæ Нанай æркодтонцæ уæлиндзæй.
Г а г а. (Оразæн сосæггæй). Дзулай хæццæ сæ ракафун кæнтæ.
О р а з. Дæ хуарзæнхæй, Нана, Будзулай хæццæ!
Н а н а. Ку нæ бал исарæхсон, магъа. Ме ’ригонæй нурмæ некæдбал рахизтæн.
О р а з. Исарæхсдзæнæ! Ду алцæмæ дæр дæсни дæ, Нана.
Б у д з у л а. Æма нин цæгъдгæ ба ка кæндзæнæй, цæгъдгæ?
О р а з. Цæгъдгæ ба Базуг! (Амонуй фæссценæмæ.) Æццæйнæ, Нана?
Н а н а (фæссценæмæ). Рауай, мæ хор, рауай. Ци гæнæн ма нин ес (Рахизтæй).
Б а з у г (рацудæй). Магъа...
Н а н а. Ниууадзæ де ’фсæрмитæ, лæппо, хатир дин æй кæнæн! Уæхæн бон æй абони. (Бадзуг райста хæтæл æ фæсронæй, цæгъдуй, уæдта цагъд райста оркестр.) Хатир, Хъайтар! (Кафуй Будзулай хæццæ).
О р а з. Æрдзæф хестæртæн!
Еугурæйдæр исистадæнцæ, æрдзæф кæнунцæ. Æвеппайди Нана фæккиудтæй, фæццæй хаудтæй, фал æй Базуг æма Будзула райахæстонцæ, æрбадун æй кодтонцæ. Адæм исхæлхъой æнцæ. Иуазгутæй дæр кадæртæ рауадæй.
Е с т а р. Нана!
О р а з. Ци кодтай, Нана?
Б у д з у л а. Сабур, сабур, хъæлæба нæ уарзуй.
Е с т а р. Ацал-ауал анзи сæйгæ дæр ку некæд фæцæй, уæд абони...
Б у д з у л а. Нæ’й раевдалдæй сæйгæ кæнунмæ.
Н а н а. Ма тухсетæ... Ма тæрсетæ, мæ хортæ, е уотид... еу минкъи мæ зæрдæ... Рагæй мæ мардта... Нæ уин æй кой кодтон... Дзæгъæли... макæд римæхсетæ хеонтæй уæ рист... Кæрæдзей гъæуай кæнтæ — æнсувæртæ айтæ... Барæнæ, Хъайтар, куд нæ мин хатир кæнис еунæг кафт, гæлæхха. Æной... куд нæ кафон — исæнхæст æй дæ фæдзæхст! Хуарз, хуарз, ма мæстгун кæнæ, фæддæмæ цæун! Кæсис, нæ хъæболтæ — лæгтæ... киндзæхсæвæ... Алантæ бабæй нæуæгæй тухгин уодзæн... (Рамардæй.)
Кизгуттæ ниббогъ-богъ кодтонцæ. Биццеутæй дæр кадæртæ кæуй. Мард æрæвардтонцæ даргъ къелабæл. Адæм фулдæр кæнунцæ. Иуазгутæ дæр рацудæнцæ хæдзарæй.
Е с т а р. Нана! Мах ба?! Кæмæн нæ ниууагътай?!
О р а з. Ма цо, Нана! Ма бакомæ, тухгин ку дæ, Нана!
А ц æ. Ду дæр бабæй нæ расайдтай, Нана?!
Б а з у г. Рохсаг уо, нæ фæлмæнзæрдæ мадæ.
С а у – С а т æ г (рацудæй, æ киндздзон сæрбæттæн исиста, æ дзигготæ æркалдта æма æ сæр хуайуй). Мæнæ мæбæл æмбесонди мæйдар æхсæвæ ку ’рбакодта, мæнæ! Мæнæ мæ зар гъарæнгæмæ куд раздахтæй, Хуцау! О мæ бон! Мæнæ ме стур цийнæ æлгъистаг куд фæцæй...
Хъ а р а – С а у. Уæхебæл фæххуæцетæ, мæ хортæ. Нæ уарзта уæхæн лæмæгъ миутæ уæ Нана... Бафæразетæ, мæ хортæ, бафæразетæ, нæййес æндæр гæнæн!
Б а з у г. Фæразæн, нæ боц иуазгутæ, фæразæн! Зонун æй, мæнæн дзорун дæр не ’мбæлуй, — æгъдæуттæ нин хуарз амудта Нана, — фал мин ниххатир кæнтæ... Алли кæмттæй æрцудайтæ, салам нин æрхастайтæ нæ синхаг адæмтæй. Æрцудайтæ нæмæ цийни бæрæгбонмæ, фал нин раздахтæй бунисæфти бонмæ! Ниххатир кæнтæ — Хуцауи тæрхон æй. Рохсаг уо, Нана.
И н н е т æ. Рохсаг уо!
Б а з у г. Нæ сæртæ хуайгæ фæццæудзинан гъæргæнæг. Æма нæмæ дæ бони æрцæудзæнæй æнæкæрон дзиллитæ! Уомæн æма ду не ’нккæтей мадæ дæ. Ду дæ нæ кадæ, нæ еугæнæг, нæ нифс! Æма дин ард хуæрæн:
Н а н а (гъæлæс). Уодзинан æмтухæ, æмзунд.
Азæлгæ рандæй: «Æмтухæ, æмзунд»... Идарддæрæй — «тухæ... зундæй...». Никки идарддæрæй азæлуй: Ард... ард...
Б у д з у л а (æхенимæр). Хорческæ... Нæртон хори кизгау! Уæлæбæл мин зæрдæ нецæмæй байвардтай... Фал мин нур уæддæр хæссæ мæ уод дæ идард балций дæ хæццæ. Ке ма гъæун ами? Неке. Саунгæ мæхе дæр... (Исиста хæтæл, фæймæ кастæй дзæвгарæ, уæдта ’й рагъавта æ уæрагбæл æрсæттунмæ, фал цидæр рагъуди кодта) Нæ, нæ, мæ хæтæл, æз æма ду гъæуама бакæнæн æнæ ’рцæугæ гъуддаг: заргæ мардбæл! (Æхенимæр, фал цума æ аллифарс, уони фæрсуй, уоййау.) Есгæд фегъустайтæ? Мадта ’й фегъосдзинайтæ, нуртæкки! Ами! (Гъæрдæрæй, се ’гасемæн.) Берæй! Кæугæ нæбал! Рæсугъд фæццардæй, рæсугъд рамардæй! Нивондæн æрхаста æхе! Нивонд ба гъæуама изæдти æмсæр уа!
Б а з у г. Раст зæгъуй Дзула. Ковун аккаг æй! Æма ин æ номбæл нæхе лæгæти скæндзинан ковæндонæ. «Нанай ковæндонæ».
Б у д з у л а. Игъосетæ? «Изæдти æмсæр»! Изæдтæбæл ба кæугæ нæ фæккиндæуй! Зартæ дæбæл кæндзинан, Нана! (Цæгъдуй хæтæлæй, уæдта дзоруй).
Гъей, Нана, нæхе уарзон Нана!
Æностæ ’ма дзамантæ цæудзæнцæ,
Фæлтæртæй еу æййевдзæнæй инней,
Дæ ном æма дæ кадæ цæрдзæнæнцæ
Айдагъ аланти нæ — æгас дуйней!
Гъей, Нана, нæхе уарзон Нана!
Низзардта Нанай зар. Цæгъдуй оркестр.
Фæсевæд бæрзонд исистонцæ мард сæ къохтæбæл.
Æмбæрзæн
1999-2ООО анзти
