САУКУЙТИ СОФЙА – ФИЦЦАГ ДИГОРОН СИЛГОЙМАГ – ПОЭТ
Зæрдæ цæвуй,
Зæрдæ ’хседуй,
Зæрди фæндуй райгъал ун.
Зæрдæ цæвуй,
Зæрдæ ’змæлуй,
Гъуди цæуй æнæ рун.
Аци цæрæццаг рæнгъитæ 1932 анзи исхаудтæнцæ æригон поэтесси цæхæркалгæ зæрдæй. Уæд еци æригон кизгæбæл æдеугурæй цудæй 16 анзи.
Æ кæдзос уоди гъудитæ адæми рæнгъæмæ æнæрунæй, кæдзос зæрдæй рахаста фиццаг хатт Саукуйти Хамбийи кизгæ Софйа.
Æртинæймаг æнзти литературæ, кæд еумæ райсгæй, цард æма догæ æппæлæнти уолæнти дæлбун адтæй, уæддæр си фæззиннидæ, æцæг скурдиадæй хайгин ка адтæй, уæхæн уадзимистæ. Кæд сæ рæстæг уотæ адтæй æма зæрдибунæй ци гъуди кодтонцæ, уой фæндон исзæгъуни барæ н’ адтæй, уæддæр, мæнæ дон æ ауæзнæ куд ратона, уотæ рагулф кæнидæ æцæг поэзи.
Мæнæ куд финста газет «Соц. Осетия» еци æнзти.
Среди современных писателей, сказителей, поэтов, драматургов нашей республики нет почти ни одного, через все творчество которого пролетарская революция не проходила бы красной нитью...
...Нигер, А. Гулуев, Ц. Хутинаев, Х. Ардасенов, Т. Епхиев, Т. Бесаев, Софья Савкуева, С. Чехоев – все они поэты и писатели революции».
Газ. «Социалистическая Осетия», No 260
7 ноября 1940 г.
Рæстæги тæвагæ æнæмæнгæ фæззиндтæй Софйай сфæлдистадæбæл дæр. Æ заргути еу хай æнæхай н’ адтæй уæди доги риторикæй, фал си æхсæн-мæхсæнтæй ци æрдæфæнтæ фесхъиуидæ, етæ ба дзорæг æнцæ, Софйамæ æцæг поэтикон ацъагъуæ ке адтæй, уобæл.
Æхе гъудити хæццæ, æхе федар къахдзæфтæй æрбакъахдзæф кодта æма ибæл уадзгæ дæр æхе фæд никкодта нæ литератури хумзæнхæбæл. Æ байтуд æвзартæ сæ рæстæги агайдтонцæ кæсгути зæрдитæ, кодтонцæ сæ нифсгундæр, цæрæццагдæр, иуæнгрæуæгдæр.
Æ тæккæ фиццаг ампъезтæй дæр бæрæг адтæй, поэт æ цард, æ лирæ, æ хъаритæ æ уарзон адæмæн ке хæсдзæй нивондæн, е.
Мæ цийнæ, мæ хъаурæ,
Мæ лирæ, мæ зар.
Советон курдадзæ,
Кæнун дин лæвар!..
Еци гъуди, еци зундирахаст æ зæрди, æ уоди уотæ исфедар æй æма ибæл, цалинмæ финсунгъон адтæй, уæдмæ не ’сæййивта. Уой медæг æй е 'хсарæ, æ поэтикон æскъуæлхтдзийнадæ.
«Саукуйти Софйа райгурдæй Цæгат Иристони Ирæфи райони Лескени гъæуи. Æ ниййергутæ адтæнцæ рæстæмбес цæрæг бийнонтæбæл нимад. Софйабæл 7 анзи ку исæнхæст æй, уæд æ фидæ фæззиан æй æма æвзонг кизгæбæл æринцадæй уæззау уаргъ, – берæ бийнонти мадæн гъудæй æнхус кæнун. Æма æ бон цæйбæрцæ адтæй, уомæй æ хъауритæбæл нæ ауæрдгæй, æнхус кодта хæдзари кустити.
1926 анзи Лескени скъола арæзт ку æрцудæй, уæд Софйа дæр ахур кæнунмæ бацудæй гъæууон скъоламæ. Зæрдæргъæвд, ахурмæ цибæл кизгæ уайтæгъддæр иссæй ахури раззагдæртæбæл нимад.
1935-36 æнзти Софйа каст фæцæй рабфак æма æ ахур раидарддæр кодта Цæгат Иристони Педагогон институти литературон факультети» (Хъазбегти Хъ. Саукуйти Софйа. «Колхозон фæндур». Раздзурд).
1932 анзæй фæстæмæ Софйай æмдзæвгитæ зиннун райдæдтонцæ Ирæфи райони газет «Сурх Дигори» фæрстæбæл, фæстæдæр ба республикон мухури оргæнти дæр: газеттæ «Рæстдзинад», «Æригон большевик»-и, журнал «Мах дуг»-и. Æма кæд æ фиццаг фæлварæнтæ бустæги æнхæст н’ адтæнцæ техникон æгъдауæй дæр, уæддæр бæрæг ба адтæй, автор ке агоруй æхе сæрмагонд фæндаг, ке нæй фæндуй еске фæнзун, еске цæттæ над къахвæдтæбæл цæун, е. Софйа хуарз лæдæрдтæй, зин ин ке уодзæй æвæд фæндæгтæ æсгарун, уой дæр:
Æрвхуз бæлæу тæхгæ-тæхгæй,
Æ базури рохс кæрæнттæй
Дони суги ке ’рфинста...
Уони сумах хуарз зонетæ...
Софйай финстити адæймаги æргом æхемæ æздахуй е ’взаги хуæрзгъæдæдзийнадæ дæр. Æ кæци финст ин ку бакæсай, уæддæр си еунæг рауæн дæр не ’ссердзæнæ аразгæ дзурбæститæ, кæнгæ, æримисгæ фæлгонцтæ. Æ алли рæнгъæ дæр æхемæ æздахуй кæсæги æ хумæтæгдзийнадæй, нæ си ес дæлгоммæгонд фæлхæнтæ.
Уомæ гæсгæ æнцæ уотæ æнцонлæдæрæн æма зæрдæмæгъаргæ.
Æрхун зæрдæн дæ фæууиндæ,
Рагуалдзæги хори каст.
Гъейт! Æма ма дæ зарунмæ
Искæнæ нур фæндон каст.
«Сау денгизæн».
Софйай æмдзæвгити æрдзи нивтæ дæр æдзард, æррæстæ ивадхузæй æвдист нæ цæунцæ, фал косæг лæги архайди хæццæ æмæзмæлдæ кæнунцæ. Уомæ гæсгæ ба цардæгасæй æристунцæ кæсæги рази. Адæймаги æууæндун кæнуй поэт, æрдзæ æррæстæ нивæ ке нæй, цæстæ ке æстæфуй, фал нæ хæццæ уæлдæфæй æмуолæвд ке кæнуй, уобæл.
Ци æхсицгон æй дæ думгæ,
Куд ниццæвуй дæлахъур!
Дæ идзулдæй æнæ заргæ
Некæд адтæй нæ мæ хъур.
«Сау денгизæн».
Фал уæддæр Софйай сфæлдистæди сæйраг архайæг æй хумæтæги зæнхкосæг лæг. Ци уæззау хъиамæт æй зæнхи куст кæнун, уой æвдесуй е ’цæги.
Хуасгæрдгутæн сæ фæсонтæ
Æрттевунцæ сæ хедæй.
Циргъ цæвгути фæтæн уонтæ
Рæуегъунцæ æндонæй.
Хед кæнунцæ фæйнердæмæ,
Уæледарæс исцъифæй.
Куд ма ес хуасгæрдгути хъиамæт æцæгдæрхузæй равдесæн?
«Софйаæн æ тематикæ æй нæ доги цард, нæ доги æнтæстдзийнæдтæ, нæ доги идзулд цардиуагæй гъæст». (Хъазбегти Хъазбег. «Колхозон фæндур». Раздзурд).
Еумæйагæй раст æй Хъазбеги-фурти гъуди, фал, гъулæггагæн, абони уæнгæ нæ къохи нæма бафтудæй, Софьяйæн ма къохфинстæй ци байзадæй, еци архив, нæма æнцæ кæронмæ æмбурдгонд, газеттæ æма ин журнали фæрстæбæл ци уадзимистæ мухургонд æрцудæй, етæ дæр. Æрæмбурд кæнун ба сæ гъæуй æнæмæнгæ, уомæн æма Софйай сфæлдистадæ комкоммæ баст æй нæ дигорон литератури райдайæни хæццæ.
Зин зæгъæн æй, Софйай литературон сфæлдистадæ идарддæр ци хузи æхе раййивтайдæ, е. Гъулæггагæн, уæззау нез тухгиндæр разиндтæй æма ин фадуат нæбал фæцæй æ æрдзон искурдиади къубулойнæ идарддæр райхалунæн. Фал ин исаразун ци бантæстæй, етæ ба гъæуама махæй – æ фæдонтæй, иронхуати ма изайонцæ, куд нæхе – фиццаг дигорон силгоймаг поэти ном, уотæ. Мæрдтæмæ ди хатир корæн, Софйа, æгæр æрæгиау нæ ке раевдалдæй дæумæ, уомæй æма нур нæ еци рæдуд раст кæнæн.
Дæлдæр ци æмдзæвгитæ мухур кæнæн, етæ ист æрцудæнцæ, Саукуйти Софйайæн æ уодæгасæй ци еунæг киунугæ рацудæй 1940 анзи «Колхозон фæндур», зæгъгæ, уомæй.
СИЛГОЙМАГМÆ
Гъейт! Хонхæй ратахтæн халонау,
Мæ цардмæ æрцудтæн хæстæг!
Æз æнкъард нæбал дæн рагонау,
И нифсæй идзаг æй ме ’стæг!
Æрзарун абони мæ зарæг,
Фæззонун мæ фæндæ æргом.
Советон рохс бæстæ нæ дарæг,
Гъе е нин фæлундуй нæ бон.
Бæлвурдæй æртасун ме ’хæстæ.
Иссердтон рохс цардæн дæгъæл.
Зонун æй, тохи ’нзтæ – нæ æнзтæ,
Минут дæр не ’сæфуй дзæгъæл.
Ахурмæ, ахурмæ æмвæндæ,
Рацо, цæй! Æнгарæ цурддæр.
Партион съезди раст тæрхæнттæ
Базонæ, ма уадзæ дзурд дæр!
Рæуæстæг нæ цийни æрсемæ,
Берæ ’й нур фæсонтæн губур!
Фæсседæ, фæсседæ пъеромæ,
Ниссастон къахкъуæрæн къудур!
1932 анз
ЗÆРДÆ ЦÆВУЙ
Зæрдæ цæвуй,
Зæрдæ ’хседуй,
Зæрди фæндуй райгъал ун!
Зæрдæ цæвуй,
Зæрдæ ’змæлуй,
Гъуди цæуй æнæ рун!
Зæрдæ цæвуй,
Реу рæуегъуй,
Зæрдæ уарзуй уæлахез.
Зæрдæ цæвуй,
Зæрдæ уарзуй
Хъазауат куст æдзæстхез!
Зæрдæ цæвуй,
Зæрдæ фицуй,
Зæрдæн цийнити ’й йе ’ргом.
Зæрдæ цæвуй,
Зæрдæ ходуй, –
Зонуй, йе æй рохси бон!
1932 анз
ХОРИ ТÆФÆЙ
Дæнтти сугтæ сугъзæринау
Æрттевунцæ нæ хорæй.
Фонси къуæрттæ бони сахи
Уолæфунцæ сæ тæнтæй.
Хуасгæрдгутæн сæ фæсонтæ
Æрттевунцæ сæ хедæй.
Циргъ цæвгути – фæтæн уонтæ
Рæуегъунцæ æндонæй.
Хед кæнунцæ фæйнердæмæ,
Уæледарæс исцъифæй.
Хори тæфæй тагъд фицунцæ
Сæ даргъ уестæ рæнгъитæй.
Уоддзæф истуй æнæзмæлгæй,
Æнхъуæт. Содзуй и дуйне.
Лигъз будурти æвецудæй
Фонсæй лæууæг нæбал йе.
Цъуз кæнунцæ и биндзитæ,
Бæлæсти бун сæ лæууæн.
Цъингк кæнунцæ сæ думгутæй,
Игъæлдзæг æй сæ цæрæн.
1932 анз
***
Мæ цийнæ, мæ хъаруæ,
Мæ лирæ, мæ зар.
Советон курдадзæ,
Кæнун дин лæвар!..
КУРОНДОНМÆ
Уайуй, уайуй нæ дони суг,
Æхсæвæ дæр, бонæ дæр.
Калуй пернæ æ цæсти суг.
Фæйнердæмæ, – гъæр-гъæр-гъæр!..
Перни стъæлфæн финкæ кæнгæ.
Дони сæрбæл æсхъеуй.
Куронвидтæ инсад калгæ!..
Зæнхæ уонæй æзмæлуй.
Зелуй пернæ, ’хемæ скъæфуй,
Калуй æртæхбæл æртæх...
И дон уайуй, пернæ кафуй,
Æхе æртайуй дзæбæх!
1932 анз
УАЛДЗÆГ
Къомбохтæ... Талатæ...
Райгъал æй дуйней.
Цъæх зæлди балатæ
Уайунцæ «уай, уай».
Фезмалдæй деденæг.
Рарттивта будур.
Цъæх арвæн аллибон
Цæуй æ гур-гур!
Бандавта бæрзæндти
Фæлмæн хор фæндон.
Ферттивта будурти
Трактор – готон.
Цъибирттæг зæрбатуг
Уоддзæфи гъазуй.
Дæлбилти дони суг
Гум-гумæй заруй.
Ракæсæ, деденæг
Гъолæнттæ хонсар.
«Гъейт! Æрдзæ ме ’скæнæг!..»
Базаруй халсар.
Райгъустæй цъеути зар.
Сау гъæдтæ, кæмттæй.
Рæсугъд маргъ, дзубулдар –
Рагъазуй цийнæй.
Фезмæлгæй цъете дæр
Фескъудтæй хурфæй.
Бæрзæндти уæлхонх дæр
Базмæлуй тулфæй.
«Гъейт» гæнгæй, колхозтæ
Цæунцæ кустмæ.
Йериси заргæнгæ
Рæвдзæ ’нцæ – усмæ.
1933 анз
САУ ДЕНГИЗÆН
Тæходуйтæ ма бафсæдæ,
Нæ Сау денгиз, дæ уиндæй.
Йеунæг хатт ма дæ фæууинæ,
Дæ фæлхъазæнтæй гъазгæй.
Æрхун зæрдæн дæ фæууиндæ, –
Рагуалдзæги хори каст.
«Гъейт!» Æма ма дæ зарунмæ
Искæнæ нур фæндон кафт!
Дæу уорс наутæ ма фæууинæ,
Фегъосæ ма дæ унæр.
Йеунæг хъури дин никкæнæ, –
Уайнæ нигки идзулддæр!..
Ци æхсицгон æй дæ думгæ,
Куд ниццæвуй дæлахъур.
Дæ идзулдæй æнæ заргæ
Некæд адтæй, нæ, мæ хъур!
1933 анз
УАЛДЗÆГ
Бæрзонд рæгътæ, сау гъæдбунтæ
Рарттивтонцæ хъæдавау.
Цæрæгойтæ, деденгутæ
Федаунцæ æнæ фау.
Сæумон думгæ кæдзос хуæнхтæй
Къæразгæбæл багъазуй.
Колхозонтæн се ’дзурд зартæй
И цъæх æрдзæ низзаруй.
Бæрзонд хуæнхтæй дони сæр-сæр.
Цъæх уæлдæфи игъусуй.
Гъæурæбунти кæлæн робас
Зуймон миути имисуй...
Колхозонтæн партий фарнæй
Сæ царди бон идзулуй.
Еумæ кусти соцерисæй
Тог се ’уæнгти ивулуй.
Æгас цæуай, рæсугъд уалдзæг,
Æд деденæг, гæлæбо!
Нур мæ зæрдæ хуæрзигъæлдзæг!
Уо, нивонд ин æрбауо!
1934 анз
МЕ ’МБÆЛТТÆМÆ
Цæрдæг Ирæ, ’ма Фиалетæ, –
Маййи бонау раст уæ конд.
Зæрбатугау æрзаретæ,
Нæ царди хор уæ нивонд.
Æрсеметæ, цæй, мæ Ирæ,
Æрттеветæ куд нæ рохс.
Уæ бахудти – хорзæрийнæ,
Уæ кади бон нæ колхоз.
Мæгур зæрдæн уæ цийни каст
Сæумон хорау æхцæуæн.
Мæ цагъдмæ уин уæ тумбулкафт
Исцæйкæнтæ нæ цардæн.
Нæ рохс доги, цæй, мæ лирæ,
Æрцæйцæгъдæ мæ фæндон.
Уæ цийни уарзт, уо, мæ Ирæ,
Уæд нæ бæсти æносон.
1934 анз
ЙЕХИН КÆРЦÆ
Ци ’й ка ’ргъузуй тæхгæ маргъау
Æ базуртæ æргъувдæй?
Ци ’й ка’ркæрдуй æхсаргардау
И уоддзæфи æвудæй?
Ка исбурстæй тох кæнунмæ
Æрдзи хæццæ нифсгунæй?
Зуймон уоддзæф æ тæхунмæ
Кæмæ резуй мæстгунæй?
Гур-гургæнгæ и тæхгæ маргъ
Кæмæн бурсуй æ комæй?
И цъæх арвæн æ денгизи
Накæ кæнгæй, фæндонæй.
Кæми сæлуй коми тулфæ,
Кæми сæлуй лæги тог.
Уой бæрзонди ма и тухæ
Кæмæн содзуй æ иуонг?
Етæ æнцæ нæ цæргæстæ,
Сурх цæдесæн æ фæлтæр.
Цъæх уоддзæфæн æ уолæнтæ
Радаудтонцæ бæгъатæр.
Тохæй-тохмæ раздзæугутæ
«Æрдзæй тухгиндæр уа лæг!..»
Адтайтæ сумах уæйгутæ,
Искодтайтæ хъазауат!..
1934 анз
ЧЪ. М-МÆ
Бæргæ косис зæрдиуагæй,
Бæргæ «устур æй дæ зунд».
Фал нæ зонун, ци дессаг æй,
Нæ дин лæдæрун дæ дзурд.
Гъур-гъур кæнис, гъунтъуз арсау,
Ласис дзурдтæ бæндæнæй.
Нæ ратдзæнæ фарсти-фарстау,
Ра нæ марис гъенцъунæй.
1934 анз
ГЪЕ, ЙЕ ДИН ДЗУАПП
Кæд йесге дæ рази,
Æхсæз, йе авд анзи
Фу-фуйæй цæруй.
Рæсугъд æй цæсгонмæ,
Фал уæгъдæ йе ’сонмæ
Сайгæ дæ кæнуй.
Кæд зони æвзарун,
Кæд зони бауарзун.
Уæд уодæн йæ апп.
Мæ мæмæ фæззуст уо,
Мæ мæмæ ниддор уо,
Гъе, йе дин дзуапп...
1935 анз
УОЛÆФÆН ХÆДЗАРИ
Ракæсæ, фæууинæ –
Кафдзæнæ зæрдæй.
Деденæг... Бæлæстæ...
Ходунцæ зилдæй.
Фæндуй дæ – искафæ.
Фæндуй дæ – зарæ.
Зонæ нур де ’взагæй
Æма сæ финсæ.
Нæзити бун думгæ
Дæлахъур цæвуй.
Мæ фарсмæ цъетедон
Сæх-сæхæй цæуй.
Зарунгъæр, фæндурдзагъд
Иуæнгти гъазуй.
Фурцийнæй зæрдиуаг
Тæхунмæ гъавуй!..
1934 анз
ЗÆРБАТУГ
Уалдзигон зæрбатуг...
Æртæхæ тагъддæр!
Мæ хъури сурх фæрдуг,
Æрзарæ гъæрдæр.
Дæ сæумон рæсугъд зар,
Дæ уæлдæфи гъазт.
Игъæлдзæг царди дуар
Ку уарзуй, ку, раст.
Дæ рæсугъд базуртæй
Ниттохæ ду мæн.
Дæ зæлдагæ хъуртæй
Ка ’фсæдуй дæуæн.
1935 анз
ЗÆРДÆБÆЛ ДАРУЙНАГ
Нæ агорун мæ финститæн
Устур аргъ æма кадæ.
Мæ гъудийæн, мæ фæууиндæн
Ку нæ кæнонцæ адæ...
Æрмæст есгæд и царди бон
Ку раййева дæ æнгас.
Уæд бакæсæ мæ нуриккон
Баст гъудити ду де ’нгас.
Æрлæудзæнæй уæд зæрдæбæл
Ка нæ ’ргъувта æ æрфуг.
Дæ къох йесгæй дæ фæндагбæл
Ка æгъзалдта цæстисуг...
Нæ агорун мæ финститæн
Устур кадæ, йе æгъдау.
Адгин æмбал зæрди цийнæн
Разиндзæнæй ма дæуау.
1936 анз
Ме ’взаг дзурдбæл нæ фæлхæтгæй,
Кодтон дæумæ фæндон каст.
Зæрдигъæлдзæг, дæ къох райсгæй,
Загътон дæуæн «фæндараст».
Мардзæ, зæнхи ку фæндидæ,
Ку радтидæ мин сæдæ.
Хъоппæгъ мæнæн сау цæститæ, –
Кæсионцæ æгас дæумæ...
1936 анз
КЪОСТАЙÆН
Уæззау мегътæ лæбурдтонцæ
Æппунæдзох и кæмттæй.
Рæсугъд хорæн римахстонцæ
Æ гъар тунтæ нæ зæнхæй.
Уæддæр ду ба бæгъатæрæй
Нæ мæгурти рæвдудтай.
Идзулд бонмæ дæ фæндурæй
Царди радæбæл зардтай.
Нур рагуалдзæг и фæзтæбæл
Ку фæцъцъæх æй и кæрдæг.
Ку рарттивта и тегъæбæл
Сурх-сурхидæй деденæг.
Ходуй Сталин и рохс бони,
Цæуæн размæ æнгонæй.
«Ирон фæндур» нæ сæрбари
Ниццæлхъ кæнæн дæ номæй!
1936 анз
ФÆНДАГБÆЛ ФÆДЗÆХСТ
Фæндагбæл æрлæугæй,
Мæ зинаргъ æмбæлттæ.
Кæнун æз сумахæн мæ зар.
Евгъуд бæнтти фудмаст,
Абони хори каст.
Фæссурдта мæ реуæй мæнæн.
Еумæ куст, еумæ гъазт
Еумæ зар, еумæ кафт.
Уæ хæццæ мæ зæрдæ, мæ цард.
Кумæдæр фæццæуон,
Зинрауæн бафтуйон,
Уæ хæццæ, фæскомтæ, мæ над.
1937 анз
СÆРДТОН ИЗÆР
Сæрдтон изæр... Æвзест мæйдзалх
Арви цъæхбæл исгурдæй.
Бæрзонд хуæнхти и ’хсæйвон къах
Æд сау пæлæз ислæудтæй.
Ферттивтонцæ тумбул симди
Йи стъалутæ зилдæгæй.
Зад будуртæ се ’стур кувди
Фелаунцæ идзулдæй.
Сатæг думгæ цъæх сифтæртæн
Сæ сосæг дзурд æрдавуй.
Рæсугъд изæр хъал кизгуттæн
Сæ уадæлттæ æрдауй.
Коми цъухи къæдзæхрæбун
Рæсог донæн æ хур-хур.
Идзулунцæ бæласи бун
Сахъ фæсевæд хуæрзахур.
Кусти ’нтæстæй се ’дзулдæнгас
Изæри цъæх нихъуæруй.
Гъей, уæрæйдæ, бæстæ æдас!
И зар нæуæг игуруй.
1938 анз
САЛАМ
Салам, салам мæ рохс бæстæн!
Салам дæуæн мæ цийнæй!
Салам дæ хонх, дæ будуртæн,
Арфæ дæ рохс, дæ хорæй.
Хуайун æфсæйнаг курдбадзи,
Есун дзæбокæ рæуæг.
Хъаруæ – денгизау иуæнгти,
Мæ зар нæуæг, игъæлдзæг!
Дасæн мæйтæмæ галуантæ,
’Хседуй арти нæ цæхæр.
Дæуæн, мæ бæстæ, мæ арфæ,
Дæуæн нивонд æй мæ сæр.
1938 анз
НÆУÆГ АНЗ
Нæуæг анзи нæуæг цийнæй,
Нæуæг царди нæуæг рохс.
Уорс закъæ лæг бæгæнийæй
Ку ’рфæлдахуй гъæдин къос.
Нæуæг анзи нæуæг закъон,
Нæуæг хуæрзтæ фæлундуй.
Ирд æхсæви цалхи хузон
И мæйæ дæр идзулуй.
Нæуæг анзи нæуæг зартæй
Æвзонг зæрдæ ку цæуй.
Тумбул цагъдæн Республикæн
Арвбæл æ цъæлхъ æндзæвуй.
Нæуæг анзи нæуæг цийнæй
Нæуæг нифс ес, зæрдæ рохс.
Уорсзакъæ лæг бæгæнийæй
Æрфæлдахуй хъæзин къос!
КОЛИТИ ВИТАЛИ
