Геуæргий уодæмбал Зæрæда
Малити Уане
Малити Зӕрӕда, Геуӕргий цардӕмбал, Тагъати Хазбий кизгӕ райгурдӕй Дзинагъай гъӕуи 1909 анзи зӕнхкосӕги хӕдзари.
Нӕуӕг игурд ку адтӕй, уӕд ӕ фидӕ Хазби рамардӕй, гъомбӕл кодта ӕ мадӕ Делетхани къохи. Делетхан адтӕй Етдзати Хъудайнати кизгӕ. Делетхан байзадӕй седзӕргӕсӕй цуппар кизги ӕма дууӕ бииццеуей хӕццӕ. Кизгуттӕ лӕгтӕмӕ ӕрцудӕнцӕ: Сурӕт - Темуртӕмӕ, Аннӕ - Бӕзитӕмӕ, Хӕмисат - Елойтӕмӕ, Зӕрӕда - Малити Геуӕргимӕ. Ӕнсувӕртӕн сӕ нӕмттӕ: Цъӕхлӕг ӕма Хадзимуссӕ. Зӕрӕда куд радзурдта, уомӕ гӕсгӕ уӕди дзамани ахуради гъуддаг хуӕнхбӕсти лӕмӕгъ ӕвӕрд адтӕй. Исахур кодта ӕ фиди ӕнсувӕри кизгӕ Борӕтий хӕццӕ ӕрмӕст еунӕг анз. Ахургӕнӕг син адтӕй Темирати Тазе. Зӕрӕдайӕн идарддӕр ахур кӕнуни равгӕ нӕбал адтӕй, хӕдзари бийнонтӕ берӕ фонс дардтонцӕ. Косун гъудӕй. Фонс дардтонцӕ Толдзгуни гъӕуи, уоми син адтӕй отӕртти бунӕттӕ. Хуӕнхбӕсти дӕр сӕ фиддӕлтӕн берӕ зӕнхитӕ адтӕй. Туйгъантӕ Дзинагъай гъӕуӕй будурмӕ ку ралигъдӕнцӕ, уӕд уони зӕнхитӕ балхӕдтонцӕ. Зӕрӕда Геуӕргий фидтӕлти зонуй хабарӕй. Сӕ бинонтӕ фиццаг цардӕнцӕ Киристонгъӕуи. Сӕ фидӕ Гадо раги рамардӕй, ӕвӕрд ӕй Киристонгъӕуи уӕлмӕрдти. Уордигӕй сӕ цӕрӕн бунат раййивтонцӕ Ӕхсӕрисӕри гъӕумӕ, уоми ба сӕ мадӕ рамардӕй, ӕвӕрд ӕй Æхсӕрисӕри уӕлмӕрдти.
Æхсӕрисӕри бинонтӕ берӕ нӕ рацардӕнцӕ. Уорсгвардион хъазайхӕгтӕ гъӕуи цӕрӕг адӕми. хӕдзӕрттӕ басугътонцӕ, уонӕн дӕр сӕ хӕдзарӕ сугъд ӕрцудӕй ӕма сӕ цӕрӕн бунат раййивтонцӕ Мостиздӕхи гъӕумӕ. Еу дууӕ уати кӕми адтӕй, уӕхӕн рӕстӕгмӕ хӕдзарӕ исаразтонцӕ саман дортӕй, цардӕй си Геуӕргий ӕнсувӕр Темболат. Зӕрӕда киндзи ӕрцудӕй Геуӕргимӕ еци цӕрӕнбунатмӕ.
Мостиздӕхӕй Дзинагъамӕ Геуӕргий ахургӕнӕгӕй косунмӕ ӕрбахудта еу хъӕбӕр хуарз лӕг Хъузелтӕй, Хъурман хундтӕй ӕ ном. Уотӕ дан ин загъта: "Ахургӕнӕгӕй нӕмӕ косунмӕ ӕрбацо Дзинагъамӕ". Е'рбацуди уӕнгӕ Зӕрӕда Геуӕргий хабарӕй дӕр нӕ зудта, ӕригон кизгӕ ма адтӕй, киндздзон кизги бӕрцӕ ибӕл ӕнзтӕ нӕма цудӕй. Геуӕрги ку ӕрбацудӕй, уӕд ӕй Зӕрӕдай мадӕ Делетхан гъӕунги кӕмидӕр фиццаг хатт (…) «…гъӕунги еу уӕхӕн сауцъарӕ лӕг фӕууидтон ӕма дессаг».
- Цӕй бӕрцӕ рӕстӕг рацудӕй, уой нӕ гъуди кӕнун, уӕдта дин уӕртӕ е (Геуӕргий Зӕрӕда ӕ номӕй некӕд хонуй) искорӕг ӕй, ӕвӕдзи мӕ ескӕми фӕууидта, ӕз ба имӕ нӕ кумдтон, цалинмӕ ме'нсувӕр Цъӕхлӕг уосӕ ӕрхудтайдӕ, уӕдмӕ. Ке нӕ кумдтон лӕгмӕ цӕун, уомӕ гӕсгӕ мин дзорун райдӕдта мӕ фиди ӕнсувӕри лӕхъуӕн Тагъати Дӕбули, уатмӕ мӕ бахудта ӕма мин хилӕ кодта, ду, дан, ӕнӕзунд дӕ, неци зонис, Геуӕргийӕн сувӕллӕнттӕ ку райгура, уӕд етӕ дӕр хуарз уодзӕнӕнцӕ, ахургӕндтитӕ. Æз ба ин загътон, Геуӕрги ахургонд лӕг ӕй, ӕз ба ӕнахургонд ӕма фӕстагмӕ уотӕ рацӕуй гъуддаг, ахургонд ӕма ӕнахургонд рахецӕн унцӕ кӕрӕдземӕй царди медӕгӕ. Мӕ еци гъудитӕ Геуӕрги ку базудта, уӕд загъта: "Ахургонд кизгуттӕ берӕ ес, фал мӕн ахургонд кизгӕ нӕ гъӕуй". Равардтонцӕ мӕ, фал ма ӕвзонг кизгӕ ке адтӕн, уомӕ гӕсгӕ анзи бӕрцӕ курдуати фӕббадтӕн, уӕдта имӕ ӕрцудтӕн, фӕххудтонцӕ мӕ Мостиздӕхмӕ, уоми фӕцан еу мӕйи бӕрцӕ, уӕдта фӕстӕмӕ Дзинагъамӕ рандӕан. Геуӕрги нӕуӕгӕй райдӕдта косун ахургӕнӕгӕй. Цардан Дзинагъай скъолай азгъунсти еу уати, иннӕ уати ба лӕвардта сувӕллӕнттӕн уроктӕ. Азгъунстбӕл дууердиги дӕр адтӕй къӕрӕзгитӕ, къала сӕр хуарз конд, дзӕбӕх бор хурст. Дзинагъай гъӕуи ӕрмӕстдӕр еци азгъунстбӕл адтӕй къала сӕр, иннӕ хӕдзӕрттӕбӕл ба уӕлиндзсӕртӕ.
Кӕми цардан ӕма уроктӕ ци уати лӕвӕрдта Геуӕрги, уони'хсӕн адтӕй медӕггойнӕ. Сувӕллӕнттӕн уроктӕ лӕвардта, еу уӕхӕн рӕстӕги ба нӕ цӕрӕн уатмӕ ӕрбацӕуидӕ, стъоли размӕ сбадидӕ, ӕ гъудитӕ ниффинсидӕ, уӕдта фестидӕ, бацӕуидӕ уроктӕ дӕдтунмӕ.
Геуӕрги мадзора адтӕй, еʻмдзӕвгитӕ некӕд дзоридӕ, ӕхе меднимӕр архайдта ӕма финста, ӕрмӕст игъӕлдзӕг дзубанди ку кӕнидӕ еске хӕццӕ, уӕд ракӕнидӕ ӕмдзӕвгӕ. Еу хатт ӕз ӕма Борӕтибӕл уӕхӕн ӕмдзӕвгӕ ракодта: "Зӕрӕда'ма Борӕти, Геуӕрги син горӕти". Адӕм ӕй хъӕбӕр берӕ уарзтонцӕ, ӕхцул сӕбӕл адтӕй.
Ӕ кустӕй раевдӕлгӕй, рацӕуидӕ Дзинагъай гъӕуи нихӕсмӕ. Зӕронд лӕгтӕн газет бакӕсидӕ, ӕнгъӕл имӕ кӕсиуонцӕ: "Геуӕрги бабӕй ӕрбацӕудзӕнӕй'ма нин газет бакӕсдзӕнӕй". Нихӕси бадӕг лӕгти хӕццӕ къенти ӕма гъолти дӕр гъазидӕ кӕсалгдзауӕни дӕр ахид цӕуидӕ.
Бӕрӕгбӕнтти, уӕдта ӕнӕуой косарт никкӕнгӕй дӕр адӕм Геуӕргий сӕхемӕ хониуонцӕ, хъӕбӕр сӕ фӕндидӕ фӕххинцун. Гобати Биса ин нард фидтӕ никкӕрдидӕ, хуӕздӕр ӕй фӕххинцон, зӕгъгӕ. Геуӕргийӕн нард фидтӕ хуӕрун ӕ бон нӕ уидæ ма сӕмӕ бӕрӕгбони хундмӕ цӕунмӕ зийнадӕгомау кӕнидæ нард фидтӕ мин хуӕздӕрӕн ниввӕрунцӕ фингӕбӕл, мӕнӕн ба сӕ мӕ бон хуӕрун нӕ фӕууй, зӕгъгӕ.
Дзинагъай гъӕуи ахургӕнӕгӕй фӕккуста фараст анзи бӕрцӕ. Еци рӕстӕги нӕмӕ еу хатт ӕрбацудӕй Къосирати Сӕрмӕт. Геуӕргий хӕццӕ уӕхӕн лимӕнтӕ адтӕнцӕ ма дессаг, сӕ хузтӕ дӕр исистонцӕ. Дзинагъай гъӕуӕй рацудан Уорсдонмӕ, уоми анзи бӕрцӕ бакуста ахургӕнӕгӕй. Скъолай азгъунст раздӕр адтӕй Хъубадти хӕдзарӕ. Нӕ фалдзос цардӕнцӕ Лолатӕ ӕма Созайтӕ. Геуӕргимӕ ахур кодта Цӕргӕстӕй Ахурбек, еу дзӕбӕх биццеу, иннетӕй некебал гъуди кӕнун. Уорсдонӕй рацудан Мостиздӕхмӕ. Куста ахургӕнӕгӕй, финсгӕ дӕр кодта. Мостиздӕхи ку цардан, уӕд нӕмӕ еу мӕйи бӕрцӕ фӕццардӕй хуарз иуазӕг - Абайти Васо, куста ирон ӕвзаги дзурдуат исаразунбӕл. Васо ӕма Геуӕргий ӕхсӕн цудӕй берӕ дзубандитӕ дзурдуат исаразуни туххӕй.
Геуӕрги сувӕллӕнттӕн фӕлмӕн адтӕй, зуст дзурд сӕмӕ некӕд искодта, хуарз син адтӕй. Ӕз ба син карз адтӕн, нӕмгӕ дӕр сӕ ракӕнинӕ, е ба сӕмӕ ӕвналун нӕ уагъта, тӕрегъӕд син кӕнидӕ, ма уотӕ зӕгъидӕ: "Ду сувӕллӕнттӕн марг дӕ, марг". Ахургӕнӕгӕй дӕр куста, финсгӕ дӕр берӕ кодта. Ӕ финстити гӕгъӕдитӕн бафснайунмӕ стур чумӕдан нӕ фагӕ кодта.
Геуӕрги ахӕст ку нӕма ӕрцудӕй, уӕди уӕнгӕ нӕ бинонти царди уавӕртӕ хуарз адтӕнцӕ, мӕн колхози куститӕмӕ дӕр нӕ уагъта, фондз сувӕллони уӕледарӕсӕй, хуӕруйнагӕй гъӕстаг нецӕмӕй адтӕнцӕ.
1937 анзи нӕ бинонти сабур цард ӕвеппайди, ӕнӕнгъӕлти фехалдӕй, нийнод ӕй. Æхсӕвигон нин нӕ хӕдзари дуар ӕрбахуастонцӕ, ӕз фестадтӕн, дуар байгон кодтон, дууӕ лӕги ӕваст медӕмӕ ӕрбагӕпп кодтонцӕ, исдзурдтонцӕ: "Ду ахӕст дӕ! Рацо!" Геуӕрги ӕ уӕледарӕс искодта, рацудӕй. Мӕнмӕ ма исдзурдта: "Мӕ сахат байзадӕй ма'й бафснайдзӕнӕ. Сувӕллӕнттӕмӕ кӕсӕ..." Ӕз ниууадтӕн Геуӕргий ӕнсувӕр Темболатмӕ 'ма ин загътон: "Нӕ лӕги нин ракодтонцӕ". Ӕндегӕй машинӕ лӕудтӕй. Еци ӕхсӕвӕй фӕстӕмӕ Геуӕргий нӕбал фӕууидтон. Фондз сувӕллоней хӕццӕ байзадтӕн, ӕхсӕзӕймаг - Васгӕ ба игурд нӕма адтӕй, губуни байзадӕй, ӕ фидӕ Геуӕргий рохс цӕсгон нӕ бафӕсмардта, нӕй зонуй. Седзӕргӕсӕй, ӕфхуӕрд ӕма мӕгурӕй ӕхсӕз сувӕллоней хӕццӕ мӕ цард ӕрвистон. Еугурӕй дӕр зиндонӕмӕ бахаудтæн. Еци дзамани мин колхози косунӕй уӕлдай неци барӕ адтӕй. Зӕгъиуонцӕ: "Дӕуӕн дӕ лӕг ахӕст ӕй, адӕми знаг ӕй ӕма косгӕ кӕнӕ". Сувӕллӕнтти дӕр ахур кӕнун нæ уагътонцӕ, хецауадӕ сӕмӕ лӕгъуз цӕстӕй кастӕй. Еу хатт хестӕр кизгӕ Зӕйрат Дигори райони хецауадӕмӕ фӕццудӕй, цидӕр гӕгъӕди ӕй гъудӕй ахурмӕ бацӕуни туххӕй ӕма ин нӕ равардтонцӕ, дӕ адӕми знаг фидӕ дӕу хузӕн исафуйнаг бӕдӕлттӕ ӕ фӕсте берӕ ниууагъта, зӕгъгӕ. Фӕстӕмӕ ӕрбаздахтӕй кӕугӕй, ӕ цӕстисугӕй ӕхе нихснадта. Мӕнмӕ дӕр нӕ гъӕуи хецауадӕ фудцӕстӕй кастӕнцӕ. Туканмӕ ести товартӕ ку ӕрбаласиуонцӕ, уӕд мин неци лӕвардтонцӕ, зӕгъиуонцӕ "Сумахӕн "не полагается", уӕ лӕг ахӕст ӕй".
Колхози хецӕуттӕй мӕмӕ еу (ӕ ном ин барӕй нӕ зӕгъун ӕ уосӕ ма ӕ сувӕллӕнттӕ хуарз адтӕнцӕ ӕма ӕнцӕ) куд не'мбӕлуй, уотӕ лӕгъуз цӕстӕй кастӕй. Ӕдзохдӕр мин мӕ цӕстӕмӕ уӕхӕн зӕгътитӕ дардта: "Дӕуӕн дӕ лӕг ахӕст ӕй, адӕми знаг ӕй, дзоргӕ дӕр ма кӕнӕ, дӕ сувӕллӕнттӕ дӕр колхози косӕнтӕ". Сувӕллӕнттӕ ба ахурбӕл фӕццӕфстӕнцӕ, 'ма алли кустмӕ дӕр сӕ бӕсти мӕхуӕдӕг лӕстӕн, ӕхсӕвӕ 'ма бон нӕ зонгӕй, зумӕги цъемоси мӕ къӕхтӕбӕл мӕ дзабуртӕ ниссӕлиуонцӕ
Æз дӕр хецауӕн зӕгъинӕ: "Силгоймаг лӕгбӕл дзуапп нӕ дӕдтуй. Дӕуӕн ба дӕ дууӕ ӕнсувӕри ахӕст ку'нцӕ, лӕг ку дӕ, ма сӕбӕл уӕд ду дӕр дзуапп кӕнӕ". Е уӕхӕн лӕгъуз дзаман адтӕй, ӕма нӕмӕ мӕ мади ӕнсувӕртӕ бонигон исцӕун дӕр не'ндиудтонцӕ, ӕхсӕвигон еу исцудӕнцӕ, ӕнхус мин кодтонцæ. Малитӕй мӕмӕ хъӕбӕр хуарз цӕстӕй кастӕй Дзега, хуарз лӕг адтӕй, рохсаг уӕд. Уотӕ зӕгъта:
"Зӕрӕда сувӕллӕнттӕ махӕн ку ниууагътайдӕ, уӕд махӕн хӕссуйнаг адтайуонцӕ, ӕгайтима сӕ нӕ ниууагъта, ӕнхус кӕнун ин гъæуй". Еу нартихуари голлагӕ ӕма нин мӕнӕуи пут дӕр равардта.
Еци рӕстӕги зин цӕрӕн адтӕй, е устур ӕнхус адтӕй бийнонтӕн. Иннӕ хӕстӕгутӕй дӕр ке равгӕ куд адтӕй, уотӕ естӕмӕйти ӕнхус кодтонцӕ. Æхсӕз сувӕллони, еу иннемӕй минкъийдӕр, тухмадзӕлттӕй гъомбӕл кодтон, седзӕргӕс куд фӕууй, уотӕ. Немуцаг фашисттӕ ку ӕрбалӕбурдтонцӕ, уӕд мӕ устурдӕр сагъӕссаг гъуддаг адтӕй сувӕллӕнттӕ мӕлӕтӕй фӕййервӕзун кӕнун. Ци ракодтайнӕ? Мӕ арми ци бафтудӕй, уой бакодтон. Нӕ дзӕхӕрай зӕнхи гъӕдин дзаумауӕн бунат искъахтон, уордӕмӕ'й ниггӕлстон, мӕнӕуӕ си никкодтон, ӕнгом ӕй нимбарзтон, уӕдта 'йбӕл сигит никкалдтон, бӕрӕг куд нӕ адтайдӕ, уотӕ. Нӕ пеци плита истудтон ӕма уой дӕр зӕнхи буни банимахстон. Геуӕргий финститӕ чумӕдани идзаг нӕ хӕдзари тугури сӕрмӕ исгӕлстон, уони дзӕбӕх бафснайун мин нӕбал бантӕстӕй, катаййи бафтудтӕн, ледзӕги фӕцан. Геуӕргий финститӕ дзӕбӕх бафснайун мӕ сӕри зунд нӕбал ниййахӕста ӕма мин еци гъуддаг мӕ царди кӕронмӕ зӕрди незӕн байзадӕй, бӕргӕ фӕсмоң кӕнун, фал ма ци ракӕнон, фӕстӕмӕ нецибал ес раздахӕн. Сувӕллӕнтти хӕццӕ фестӕгӕй фиццаг фӕллигъдтӕн гъӕди хурфӕмӕ, Васгӕ ӕма Таи къохтӕбӕл хуӕцгӕй. Уӕд мин сӕ еу, уӕд иннӕ ӕ къах естӕбӕл бакъуӕридӕ ӕма размӕ бахауидӕ. Гъӕдӕй ба фӕллигъдан станицӕ Змейкӕмӕ. Фидибӕсти тугъди фӕсте исӕздахтан Мостиздӕхмӕ нӕ хӕдзарӕмӕ, фал си нецибал исӕййафтан. Фашисттӕ нин нӕ хӕдзарӕ ниппурх кодтонцӕ, мулкӕй син ци бӕзтӕй, уой фӕххастонцӕ, ци сӕ нӕ гъудӕй, уоци циййес ба басугътонцӕ. Хӕдзари пец нийхалдтонцӕ, азгъунстбӕл къӕрӕзгитӕ ӕма дуӕрттӕ нӕбал адтӕй, Геуӕргий финститӕ чумӕдани'дзаг фесавдӕнцӕ. Æрмӕст ма нин исбӕзтӕй зӕнхи буни гъӕдин дзау мауи ци мӕнӕуӕ нимӕхст адтӕй, е. Геуӕргий финститӕ мин ке нӕ бантӕстӕй бафснайун, ӕма ке фесавдӕнцӕ, е мин ӕй стур нез мӕ уодӕн. Ӕ финститӕ кӕсунмӕ дӕр мӕ нӕ евдалдӕй алли хузи куститӕй, ӕхсӕвӕй - бонӕй не'нцадтӕн, хуссӕг мӕ нӕ ахӕста, цалинмӕ сувӕллӕнттӕ сӕ къӕхтӕбӕл ислӕудтӕнцӕ, багъомбӕл ӕнцӕ, уӕдмӕ.
Геуӕргий берӕ финстити ӕхсӕн адтӕй еу поэмӕ, киунугӕгонд, къохфинст, хундтӕй "Кӕфхъундар". Уацау финст адтӕй иронау, ирон æвзагбӕл. Ӕвдист си цудӕй зудӕгӕнагӕ, мулкӕй бафсес кӕмӕн на'дтӕй, соцъагӕнагӕ, хийнӕйдзаг, фудзӕрдӕ лӕгъуз лӕг, цидӕр фудцъух ӕмбалхуар адӕймаг.
Геуӕрги советон хецауади нихмӕ ести финста, уой нӕ зонун, фал си фесинмӕ загъд ба некӕд фегъустон. Мӕнӕ аци ӕмдзӕвгӕ:
"Ниууæйæ кӕнтӕ уæ бӕхтæ,
Мæхъæл æма цӕцæнæн,
Ниббуцӕу кӕнтӕ уæ къӕхтæ –
Мах колхозмӕ нæ цӕуӕн!"
мӕнмӕ гӕсгӕ уой финст нӕй. Цъифкалгутӕ, цъуххӕсгутӕ, соцъагӕнгутӕ, адӕймаг уӕйӕгӕнгутӕ алли рӕстӕгути дӕр берӕ фӕууй, уӕлдайдӕр ба уӕд, нур дӕр уӕхӕн адӕймӕгтӕ берӕ ес. Фал уӕддӕр рӕстӕги бӕлахӕй, ӕ уод раст уогӕй, Геуӕрги фесавдӕй, ӕ зартӕ адӕмӕн кӕронмӕ нӕ фӕззардта, берӕ ци адӕми уарзта, уонӕн ци зар кодта, е ӕмбесбӕл раскъудӕй, ӕ сӕр сибийраг бацӕй, уацари бахаудтӕй, ӕ ингӕн кӕми ӕй, е бӕрӕг дæр нæй.
Геуӕрги ахӕстӕй ниффинста, ка'й фесафта, еци мӕнгӕвдесӕн лӕгти нӕмттӕ. Нур сӕ нӕ зӕгъун, фал ка цӕра, е ба сӕ еу уӕхӕни базондзӕнӕй.
Ахӕсти бунатӕй си адтӕй еу пъисмо, финста (куд ӕй багъуди кодтон, уотӕ'й дзорун): "Зин рауӕн дӕн, сау гъӕди хурфи, адӕймаг уӕлӕмӕ ку искӕсуй бӕлӕсти цъонггитӕмӕ, уӕд ӕ сӕрӕй ходӕ рахауй, гъе, уӕхӕн гъӕди хурфи ан. Зинтӕ ӕвзарун. Мӕ цубур кӕрцӕ рауӕйӕ кӕнӕ, дзабуртӕ бахуйӕ, ӕхца дзабури къели буни ниввӕрӕ, бахуйӕ ӕма посылкӕ рарветӕ". Уотӕ бакодтон, фал ибӕл посылкӕ исӕмбалдӕй, ӕви нӕ, е не'сбӕрӕг ӕй. Пъисмо си нӕбал райстон. Лӕг фесавдӕй гъезӕмарӕй ахӕсти, мах дӕр ами нӕ цард ӕрвистан мӕгур ӕма ӕфхуӕрдӕй.
- "Нӕ лӕг уоми еунӕгӕй ахӕст адтӕй, мах ба ами авдемӕй", загъта Зӕрӕда.
Кӕд Зӕрӕда байзадӕй седзӕргӕсӕй, берӕ сувӕллӕнтти хӕццӕ, берӕ зинтӕ фӕууидта, алли хузи уӕззау кустити ӕ къохти гъӕнтӕй берӕ тог фӕккалдӕй, ӕ дзигкотӕй берӕ хӕлттӕ ӕма гӕппӕлтӕ будури кустити байзадӕнцӕ, фӕллад исуадзун ци ӕй, уой нӕ зудта, уӕддӕр Геуӕргий фӕндонтӕбӕл, сувӕллӕнттӕбӕл ӕ хуӕст не'суагъта, царди сӕ раст фӕндӕгтӕбӕл аразта, ӕма си ӕнахургондӕй неке байзадӕй. Сувӕллӕнттӕ еугурӕйдӕр каст фӕцӕнцӕ астӕуккаг скъола, уӕдта исахур кодтонцӕ идарддӕр. Хестӕр кизгӕ Зӕйрат ахур кодта Мӕскуй хореографион училищей. Уой фӕсте цӕрунмӕ рандӕй Ленинградмӕ, ӕ амонд иссирдта ами. 1992 анзи ба'йбӕл, ӕ хӕдзари куститӕгӕнгӕй, фицгӕ дон ракалдӕй'ма фесавдӕй..." Цалдӕр бони ма сӕйгӕдони фӕцӕй, фал ӕ лӕгӕн махмӕ телеграммӕ дӕттун нӕ бауагъта - мӕлгӕ-мӕлун дӕр ма махбӕл тухстӕй..." Зоя фӕцӕй бухгалтери дӕсниадӕ, куста алли рауӕнти, нур дӕр ма косуй. Мурат каст фӕцӕй медицинон институт, иссӕй хирург, бакуста дууӕ анзи Казахстани, Нальчики, уӕдта Дзӕуӕгигъӕуи, адтӕй Кирови райони сӕйгӕдони сӕйраг дохтур. Нуртӕккӕ ӕй хирургон хайади хецау. Ӕ хуарз кусти туххӕй ин лӕвӕрд ӕрцудӕй берӕ хецауадон хуӕрзеугутӕ. Рая каст фӕцӕй ветеринарон техникум, бакуста Æрӕдони бӕхтӕдарӕн заводи лабораторий, фӕстаг рӕстӕги ба косуй Дзӕуӕгигъӕуи республикон ветеринарон лабораторий.
Тая фӕцӕй каст педагогон училище, дууӕ анзи бакуста ахургӕнӕгӕй, фӕстӕдӕр каст фæцæй медицинон институт, куста дохтурӕй Мӕздӕги райони. Нур косуй Октябрьский гъӕуи тагъд ӕнхуси дохтурӕй. Ӕ кусти ихӕстӕ хуарз ке ӕнхӕст кӕнуй, уомӕ гӕсгӕ ин лӕвӕрд ес кади бӕрӕггӕнӕнтӕ.
Васо райгурдӕй Мостиздӕхи, ӕ фидӕ Геуӕрги ахӕст ку ӕрцудӕй, уӕд игурд нӕма адтӕй, мади губуни байзадӕй, уомӕ гӕсгӕ ӕ фиди нӕ бафӕсмардта, гъомбӕл кодта куд иннӕ сувӕллӕнттӕ, седзӕрӕй. Астӕуккаг скъола фӕууогӕй, идарддӕр исахур кодта Педагогон институти филологон факультети. Куста газет "Рӕстдзинади" уацхӕссӕгӕй, радио ӕма телеуинунунади комитети редакторӕй. Уой фӕсте ӕрвист ӕрцудӕй Мӕскумӕ дууӕ анзи литературон уӕлдӕр курситӕмӕ. Фӕккуста паддзахадон рауагъдади аййев литературон редакций хецауӕй, финсгути Цӕдеси сӕрдари хуӕдӕййевӕгӕй, уӕдта сӕрдарӕй. Нуртӕккӕ ӕй журнал "Ирӕфи" сӕйраг редактор.
Зӕдӕлески Нанай хузӕн, сувӕллӕнттӕ ервӕзунгӕнӕг ӕма гъомбӕлгӕнӕг, ӕгъдаугин, хъиамӕтгун, уӕздан, ӕнӕсайд, кӕдзос уод мадтӕлтӕй нӕ Иристони бӕстӕ гъӕздуг ӕй. Уонӕй сӕ еу ӕй Малити Зӕрӕда, нӕ дзилли кадгиндӕр зарӕг Геуӕргий цардӕмбал. Зӕрӕда еугур зин царди уавӕртӕбӕл дӕр фӕууӕлахез ӕй. Цума имӕ еци хъаурӕ кӕцӕй цудӕй, куд бафӕразта фӕууӕлахез ун еци зинтӕбӕл, седзӕргӕс уогӕй? Куд бухстӕй. Аци фарстатӕн дзуапп дӕттӕг ӕй уӕхӕн зунди рахаст. Зӕрӕда архайдта, цӕмӕй Геуӕргий кадӕ нӕ фӕккиудтайдӕ, уобӕл. Ӕ рохс ном ин некӕд феронх ӕй, ӕгъдау ин лӕвардта, ӕ уоди фарнӕ ин мӕрдти бӕстӕмӕ нӕ рауагъта. Стур аргъ ӕма ӕгъдау равардта Малити муггагӕн, ӕхе муггаг Тагъатӕн, ӕ мадӕ ӕма фиди рохс цӕсгом некӕд феронх ӕй, фидтӕлти ӕгъдӕуттӕбӕл хуӕцгӕй, ӕ цард аразта, Геуӕрги берӕ ци адӕм уарзта, уонӕн ӕгъдау лӕвардта ӕма дӕдтуй. Зӕрӕда арфӕ кӕнуй ӕ кӕстӕртӕн, ӕ хуӕрти, ӕнсувӕрти цӕуӕтӕн, зин царди рӕстӕги ин ка ӕнхус кодта, уонӕн. Хеуонтӕ, хӕстӕгутӕй рабӕрӕг кӕнунцӕ, сӕ цӕрӕнбонтӕ берӕ уӕнтӕ, сӕ салам берӕ уӕд. Дзӕбӕхӕй ма нин берӕ фӕццӕрӕ, Нана, дӕ фарнӕ берӕ уӕд, дӕ берӕ хъиамӕттӕбӕл фӕсмойнаг нӕ дӕ.
1994 анз.
Журнал «Ирæф» 1995 (№3)
