Радикулиты хос
Ныхас кæнæм æртæйæ: Къæбойты Мурат, Малиты Васо æмæ æз. Куыд дæ, зæгъгæ, мæ афарста Мурат æмæ йын загътон:
— Ницы мын у, æрмæст мæ радикулит фæхъыгдары.
— Дæ цыппæртыл цу, æмæ дæ радикулит цалдæр бонмæ фесæфдзæн, — дзуры Мурат. — Уымæй йын хуыздæр хос нæй.
Уæд Васо дæр йæ ныхас баппæрста:
— Уæдæ хицæутты цур йæ цыппæртыл чи цæуы, уыдонæн радикулит се ’мгæрæтты дæр нæ цæуы, нæ?
Нæ бæстæйы ном
Малиты Васо сæ хъæуккаг лæппуйы фæзмыдта: цыдæр фыдуаг мийы тыххæй, дам, æй æрцахстой æмæ йæ фæрсынц, кæм цæрыс, зæгъгæ. Уый, дам, сын уырыссагау афтæ:
— На Магурдабонской улице!
Мах дæр ныртæккæ ахæм бæстæйы цæрæм — Мæгуырдæбойнаг бæстæйы.
«Мустыздæхы — мæ уидаг»...
Дзасохты Музафер, Малиты Васо æмæ æз уыдыстæм Васойы райгуырæн хъæу Мустыздæхы. «Куд ма нæмæ фæррæдудтæ?» — цинтæ кодтой Васойыл йæ кæддæры сыхæгтæ. Васо сын сæрыстырæй дзуапп радта: «Мæ уедаг ами ’й, ами!»
Æз ын йæ хъуыды дарддæр ахæццæ кодтон:
Мустыздæхы — мæ уидаг,
Дзæуджыхъæуы — мæ уидыг.
«Дæхицæй дын æй фехъуыстон...»
Уый уыдис æстайæм азты райдайæны. Хъайттаты Сергей Малиты Васойыл уынджы амбæлд æмæ йын цавæрдæр антисоветон анекдот радзырдта. Стæй кæрæдзийæн хæрзбон загътой æмæ алчи йæ фæндаг дардта. Иуцасдæры фæстæ Сергей фæстæмæ раздæхти, Васойы баййæфта æмæ йын афтæ:
— Васо, дæхицæй дын æй фехъуыстон...
Сталинист
Æртæйæ — Хуыгаты Сергей, Малиты Васо æмæ æз фæцæуæм горæты уынджы. Хъазæн ныхæстæ кæнæм. Иу афон Васо афтæ:
— Сергей дæр хорз лæг у, сталинист ма куынæ уаид, уæд.
Къуылыхкъах Сергей йын æваст дзуапп авæрдта:
— Уæллæй, Васо, цин дын фенон, афтæ мын куы зæгъиккат, сталинист мауал у æмæ дын дæ къах банывыл кæндзыстæм, зæгъгæ, уæддæр уын не сразы уаин. Сталиныл мæ зæрдæ сивыны бæсты фæлтау цæрæнбонты къуылыхæй цæудзынæн!
«Дигоризируй»
Цæголты Васили, Малиты Васо æмæ Гусалты Барис иумæ лæууыдысты. Иу афон сæ цурмæ бацыди Тетцойты Таймураз. Салам радтой кæрæдзийæн.
— Æз дæ юбилейон куывды цæуылнæ уыдтæн? — хъазгæмхасæнты Таймуразмæ бадзырдта Васили.
Таймуразæн уый фæхъыг, Василийæн цыдæр æфхæрæн ныхæстæ загъта æмæ тæргайæ ацыди.
— Цæуыл смæсты? — йæ фæстæ дисхуызæй кæсгæйæ баззади Васили.
— Ты иронизируешь, потому он и обиделся, — загъта Васо. Ныхас дарддæр ахæццæ кодта Барис:
— Следующий раз ты не иронизируй, а дигоризируй!
Мания величия
Фынджы уæлхъус бадтыстæм. Æнæзонгæ адæм дзы дзæвгар уыди. Мæн Ходы Камалимæ арæх фемхæццæ кæнынц. Ацы хатт дæр та чидæртæ мæнмæ цæстæй амонгæйæ кæрæдзийæн хъус-хъусы дзурынц: «Ау, æмæ Камалы нæ зоныс?», «Камал у, уæдæ чи у!» Иу та мæм дæле уæлæмæ афтæ дæр ма сдзырдта: «Камал, сидт цæуылнæ рауадзыс?» Ноджы ма сæ Малиты Васо дæр баууæндын кодта, æз Камал кæй дæн, ууыл. Фæстагмæ мын гæнæн нал уыд æмæ сразы дæн семæ, уæдæ цы. Цалдæр хатты сын зæгъгæ дæр кодтон:
— Камал бæргæ дæн, фæлæ мæ адæм Хъодзаты Æхсаримæ цæмæн ивддзаг кæнынц, мæгъа.
Уарзиаты Вилен мæнæй чысыл дæлдæр бадтис. Иу афон æм, иууылдæр мæ куыд хъусой, афтæ бадзырдтон:
— Æццæй, Вилен, æз Ходы Камал нæ дæн?
— Æхсар, по-моему у тебя мания величия! — æвæстиатæй мын дзуапп авæрдта Вилен.
Хахуыргæнæг
Кæддæр иу хуыцауылгъыст литератор фæзынди не ’хсæн æмæ йæм ахæм миниуæг уыди: цыдæриддæр-иу хорзæй фæзынди литературæйы — уайтæккæ-иу сæ адæмы цæсты бафтыдта, сæ авторты та-иу рахуыдта социалистон цардæвæрды знæгтæ. Цæвиттон, нæ фысджыты сæрæндæртæн сæ туг дойныйæн нозта, сæ сæрæн дзы нал уыдысты.
Иуахæмы дзы Малиты Васо афтæ загъта:
— У него собачий нюх на таланты.
См.: Кодзати А.М. Ветер и мякинник: новеллы, миниатюры, рассказы, статьи.
Владикавказ, издательство «Ир», 2011 г.
