АССИЙ ЗАР
Устур Асси ӕрӕмбурдӕнцӕ сӕ гъӕуи 'хсӕнмӕ: «Нур нӕ гъӕуй Стулий ӕфцӕгбӕл ӕфцӕггӕс ниввӕрун ӕма нин ка фӕццӕудзӕнӕй». Бисурхан-ӕлдар Тазӕрет загъта: «Еу лӕгӕй ӕз фӕццӕудзӕнӕн». Иннӕ лӕги бунатмӕ ӕхе балӕвардта Уллу Таухъан (устур Таухъан). Ӕртиггаг лӕгӕн цудӕй Гицци Абай (минкъий Абай), ӕма ой ба нӕ уахтонцӕ иннӕ дууӕ лӕги, дӕхуӕдӕг фӕлхассаг дӕ, зӕгъгӕ. Раззаг дууӕ адтӕнцӕ уӕздӕнттӕй, Абай ба сау адӕнӕй ӕма ибӕл нервӕнстӕнцæ. Ӕмбурди син али фудтӕ фӕдздзурдта: «Бахуӕрунмӕ мӕ ку гъæуй цъеуи бӕрцӕ, исбадунмӕ - карки бӕрцӕ, балӕборунмӕ ку дӕн мӕхуӕдӕг Корай ӕмбес, дууадӕс лӕги мӕхӕуӕдӕг. Ӕрӕги-дурӕги фӕццудӕнцӕ ӕртемӕй дӕр ӕма ӕрбадтӕнцӕ Стулибӕл ӕфцӕггӕс.
Уӕд дууӕ устур лӕги исӕстонгӕнцӕ, Тазӕрет ӕма Таухъан. Гицци Абаййӕн загътонцӕ, мах фиййаутӕмӕ цӕуӕн месин цумунмӕ, ду ба лӕууӕ ами, зӕгъгӕ, ӕма рандӕнцӕ. Уалдӕнги Сари балӕбурдтонцӕ. Гицци Абай ӕхецӕн цъетебӕл къагъд ракодта. Ӕ фарсмӕ ба еу лӕдзӕгбӕл ӕ баслӕхъ ракодта, иннебӕл ӕ нимӕт ӕма сӕбӕл ходтӕ никкодта. Сарий ӕфсад они 'хстонцӕ, е ба син сӕхе. Иссӕкунӕг кодта, отемӕй сӕ раздахта. Иссудӕнцӕ дууӕ ӕмбали дӕр. Ассимӕ ку ниццудӕнцӕ, уӕд гъавтонцӕ сӕхе бози фӕккӕнунмӕ: «Ду бабӕй кӕми адтӕ, мах ӕфсад ку здахтан, уӕд?» Фиййаути бафарстонцӕ, ӕма син етӕ ба загътонцӕ, дууӕ лӕги махмӕ адтӕнцӕ, Гицци Абай ба сӕ еунӕгӕй раздахта, зӕгъгӕ. Асси ӕртӕ лӕги ихуӕрстӕггаг дӕр Абаййӕн равардтонцӕ.
Радзурдта ӕй Кӕлухти Елмӕрза. Ниффинста ӕй Хадати Берди, Сурх-Дигора, 11 август, 1933 анз. ЦИНИИ-йи архив, фольклор № 28, папкӕ 4, ф. 81.
МУСТАФИ И ДЗУБАНДИ
Адтӕй йеу гъӕу, Байсиати гъӕу, зӕгъгӕ. Байсиати гъӕумӕ иссудӕй бохъургин адӕни муггаг. Ӕссӕрвиста уони ногъайаг ӕлдар мӕгур адӕни фонс тӕрунмӕ. Ӕссудӕнцӕ 'ма Байсиати гъӕуи фонсбӕл рагъӕр кодтонцӕ сӕ гъонгӕсти хӕццӕ. Уони уинӕг нӕ фӕццӕй. Дзулати мӕсуги сӕрбӕл ба бадтӕй Азаухан. Азаухан сӕ фӕууидта 'ма фӕндурӕй цагъта мӕсуги сӕрӕй: «Байсиати гъӕу, ракӕсетӕ, уӕ фонс уин фӕттӕрунцӕ бохъургинтӕ», — зӕгъгӕ. Байсиати гъӕу рацудӕнцæ фӕдеси сӕ фонси фӕдбӕл ӕд цъелӕ, ӕд мелӕ. Гъӕугӕрон ӕрӕнбурдӕнцӕ йеугурдӕр. «Ци кӕнӕн мах, кумӕ фӕццӕуӕн, гъӕубӕсти йеунӕг лӕг адтӕй Мустафа, йе дӕр афӕй балци ку рандӕй. Нечи бакӕнджиан мах, — дзӕгъгӕ загътонцӕ, — нӕ раздзӕуӕг Мустафа нӕ хӕццӕ кунӕ уа, уӕд». Йеу-дууӕ лӕхъуни дзорунцӕ: «Мустафа афӕй балчи адтӕй, фал ӕрцудӕй 'ма сӕхемӕ 'й», — зӕгъгӕ.
Ка уодзæнæй нæ фӕсевӕдӕй уӕхӕн, Мустафамӕ нин ка бандеудзӕнӕй аци хабар радзорунмӕ, нӕ хаццӕ раздзӕуӕгӕн, амонӕгӕн рацӕунмӕ. Йеу-дыууӕ лӕхъуӕни загътонцӕ: «Мах имӕ бадзордзиан, мах ин бандеуджиан уӕ захт разӕгъун». Бацудӕнцӕ дууӕ лӕхъуӕни 'ма имӕ бадзурдтонцӕ Мустафамӕ. Сӕ гъуддаг ин загътонцӕ. Мустафа син загъта: «Афӕй балчи адтӕн ӕма топпи хуаллагӕй рӕвдзӕ нæ дӕн», - зæгъгæ. - «Топпи хуаллагӕй дӕ нӕхуӕдтæ исрӕвдзӕ кӕнджиан».
Топпи хуаллаг дӕр гъуддаг ӕй, фал къахи дарӕсӕй дӕр рӕвдзӕ нӕбал дӕн.
Рандӕнцӕ. Нийуагътонцӕ 'ма Байсиати гъӕу сӕхуӕдтӕ фӕдеси рандӕнцӕ. Сӕумӕ Мустафа фестадӕй 'ма ӕ бӕх донмӕ раласта. Дондзау уоститӕ уой ку фӕууидтонцӕ, уӕд кӕрӕджемӕ барӕй гъӕрӕй дзорунцӕ: «А ци дессаг ӕй, Байсиати гъӕу йеугурӕй фӕдеси ку рандæй, уӕд Мустафа ба дондзау уоститӕн гъӕуайгӕсӕн байзадӕй?!» Мустафӕн еци загъд фӕззин ай 'ма сӕхемӕ ку ссудӕй, уӕдта ӕ бийнонтӕн загъта: «Мӕ цохъайӕн мин ӕ думӕккӕгтӕ уӕраги сӕртӕбӕл ӕрбауадзӕ, ӕ дустӕ ба цонгихъолтӕбӕл, 'ма мӕ рарӕвдзӕ кӕнӕ балци цӕунмӕ». Мустафа бӕхбӕл рабадтӕй ӕмӕ рандæй сæ фӕдбӕл. Фӕдес ӕсӕздахтӕнцӕ фӕстӕмӕ 'ма имӕ дзорунцӕ: «Мабал цо, Мустафа, ӕмбурд гъӕубӕстӕй мах ке нӕ бакодтан, уой ду дӕ нӕбал бакӕндзӕнӕ», - зӕгъгӕ. Дзоруй сӕмӕ: «Ӕ сӕрӕн ка 'й, ӕ бон йести кӕмӕн ӕй, йе мӕ хаццӕ раздӕхӕд». Сорун сӕ байдайуй Мустафа.
Йеу рауӕн хуӕнхрӕбун рӕфтбадӕ ӕркодтонцӕ бохъургинтӕ, уотемӕй сӕ раййафта. Мустафа рафестӕг ӕй. Хонхмӕ бацудӕй ӕма йеу къӕбури рӕбун ӕхе барӕвдзӕ кодта. Тохун сӕбӕл райдыдта уордӕги Мустафа. Хауӕккаг сӕ фӕккодта. Сӕ хауӕккаг фӕлледзӕккаг ӕй бохъургинтӕн. Фонс ӕрбаздахта фӕстӕмӕ Мустафа 'ма сӕ истӕруй. Адӕмӕй ма ка райервастӕй дӕлӕмӕ, йетӕ ногъайаг ханмæ фӕххабар кодтонцӕ, атӕ нӕ фесафта йеунӕг лӕг, кӕцӕй нӕ ӕхста, уой дӕр нӕ базудтам, уотемӕй. Ногъайаг хан равардта уонӕн фӕстӕмӕ устур хъаурӕ Мустафи фӕсте рарветунмӕ. Ӕсӕйафтонцӕ и 'фсӕдтӕ. Тохун байдӕдта сӕ хӕццӕ Мустафа. Фӕттухтӕй, цалдӕнгӕ топпи хуаллагӕй хъӕрдтӕй, уӕди уӕнгӕ. Хъӕбӕр бабӕй сӕ базиантӕ кодта, фӕстӕмӕ сӕ ледзунбӕл искодта, уӕдта имӕ ӕхсӕн дзаумау нӕбал адтӕй. Нийахӕстонцӕ Мустафи. Фӕйхастонцӕ ногъайаг ханмӕ. Хан æй хъӕбӕр исчитгин кодта. Райста ӕй ӕхемӕ. Мӕсуги сӕрмӕй искодта. Йеу афони Мустафӕн ӕ зӕрди ӕрӕфтудӕй раледзун уордӕги. Уӕд ханӕн загъта: «Нӕхердигон тунӕй мӕ цохъа скӕнун фӕндуй», зӕгъгӕ. Хан дзурд равардта, 'ма ӕрӕмбурд кӕнун кодта тунтӕ 'ма сӕ Мустафамӕ ӕрвиста. Ахсӕви раледздзӕнӕн, зæгъгæ, имӕ нет куд адтӕй, уотемӕй ба и тунтӕ кӕрӕдзебӕл ниббаста. Тунтӕн сӕ йеу кӕрон уӕллӕй рафедар кодта мӕсуги сӕри, аннӕ ка 'й, уой ба къӕразӕй рагӕлста рахезунмӕ зӕнхӕмӕ. Рауагъта уордӕги ӕхе йечи бӕндӕнтӕбӕл ӕхсӕвӕ. Уинӕг ӕй нӕ фӕццӕй. Рацудӕй ӕма ӕ гъӕубӕстӕмӕ иссудӕй.
Радзурдта æй Галачити Хаджибар Шехмӕрзайы фурт, 6 июль, 1956 анз, Озреки гъæу. Ниффинста ӕй Цагъати Анастаси.
ЦИНИИ-йи архив, фольклор № 175, папкӕ 44, ф. 16-19.
